ឯកអគ្គរដ្ឋទូតអាមេរិកប្រចាំអង្គការសហប្រជាជាតិលោកស្រី Samantha Power បានធ្វើដំណើរទស្សនកិច្ចលើកដំបូងទៅកាន់បេសកកម្មរបស់អង្គការសហប្រជាជាតិ នៅប្រទេសគុយបា ក្នុងរយៈពេលជាងកន្លះសតវត្សមកនេះ កាលពីថ្ងៃសុក្រ។
អ្នកនាំពាក្យបេសកកម្មរបស់អាមេរិកលោកស្រី Hagar Chemali បាននិយាយថា លោកស្រី Power បានពិភាក្សាពីភាពប្រក្រតីនៃទំនាក់ទំនងរវាងប្រទេសទាំងពីរ និងអាទិភាពនៅអង្គការសហប្រជាជាតិ ក្នុងអំឡុងពេលជួបប្រជុំជាលើកដំបូងដែលមិនធ្លាប់មានជាមួយលោកឯកអគ្គរដ្ឋទូតរបស់អង្គការសហប្រជាជាតិរបស់ប្រទេសគុយបា គឺលោក Rodolfo Reyes Rodriguez។
ប្រទេសគុយបា និងសហរដ្ឋអាមេរិកបានកាត់ផ្តាច់ទំនាក់ទំនងការទូតនៅក្នុងឆ្នាំ១៩៦១ ក្នុងអំឡុងពេលសង្គ្រាមត្រជាក់ដ៏តានតឹង។ បន្ទាប់ពីជិត៥៤ឆ្នាំនៃអរិភាពលោកប្រធានាធិបតីសហរដ្ឋអាមេរិកបារ៉ាក់ អូបាម៉ា និងលោកប្រធានាធិបតីគុយបា Raul Castro បានប្រកាសនៅថ្ងៃទី១៧ ខែធ្នូថា ពួកគេនឹងចរចាគ្នាដើម្បីស្តារទំនាក់ទំនងឡើងវិញ។ រឿងនេះបានកើតឡើងនៅថ្ងៃទី២០ ខែកក្កដា នៅពេលដែលប្រទេសទាំងពីរបានបង្កើតទំនាក់ទំនងការទូតឡើងវិញជាផ្លូវការ។
លោកស្រី Power បានឲ្យដឹងនៅក្នុងសេចក្តីថ្លែងការណ៍មួយថា លោកអូបាម៉ា បានគិតផ្ទុយពីគោលនយោបាយ៥០ឆ្នាំលើប្រទេសគុយបា ព្រោះគាត់ជឿថា យើងអាចធ្វើបានច្រើនដើម្បីគាំទ្រដល់ប្រជាជនគុយបា និងលើកកម្ពស់គុណតម្លៃរបស់យើងតាមរយៈការចូលរួម។ លោកស្រីបាននិយាយទៀតថា នៅទីបំផុតយើងនឹងធ្វើបន្ថែមទៀតដើម្បីជួយដល់ប្រជាជនគុយបា ជាជាងគោលនយោបាយនៃអតីតកាលដែលហួសសម័យ។
គួរបញ្ជាក់ថា លោកស្រី Power បានកំណត់គោលដៅផ្ទាល់ខ្លួនចំពោះការទៅមើលបេសកកម្មរបស់អង្គការសហប្រជាជាតិនៃប្រទេសទាំងអស់ដែលសហរដ្ឋអាមេរិក មានទំនាក់ទំនងការទូតជាមួយ ហើយបើយោងតាមមន្ត្រីអាមេរិក បានឲ្យដឹងថា គុយបាគឺជាប្រទេសទី១២៧៕
AP
ប្រេសិត UN បំពេញទស្សនកិច្ចបេសកកម្មរបស់ UN នៅគុយបា ជាលើកដំបូង
0 Comments