ភ្នំពេញ ៖ ការប្រឡងសញ្ញាប័ត្រមធ្យមសិក្សាទុតិយភូមិ ឬបាក់ឌុបនៅឆ្នាំនេះ បេក្ខជនជាប់និទ្ទេសAមានការកើនឡើងជិត១០ដងបើធៀបនឹងឆ្នាំមុន តែចំនួននេះវាប្រហាក់ប្រហែលនឹងឆ្នាំ២០១៣ដែរដែលជាឆ្នាំ ដែលក្រសួងអប់រំនៅមិនទាន់ធ្វើកំណែទម្រង់។
យោងតាមសេចក្ដីប្រកាសព័ត៌មានរបស់ក្រសួងអប់រំ ដែលបានចេញផ្សាយកាលពីរសៀល ថ្ងៃទី១២ ដែលជាថ្ងៃប្រកាសលទ្ធផលប្រឡងសម្រាប់មណ្ឌលភ្នំពេញ និងខេត្តកណ្ដាល និងថ្ងៃទី១៣ខែកញ្ញានៅតាមខេត្តផ្សេងៗទៀតបានឲ្យដឹងថា បេក្ខជនប្រឡងជាប់សម័យប្រឡងឆ្នាំ២០១៥នេះ មានចំនួន៤៦៥៦០នាក់ត្រូវជា៥៥,៨៨ភាគរយនៃបេក្ខជនវត្តមានចំនួន៨៣៣២៥ នាក់ ក្នុងនោះមានបេក្ខជនជាប់និទ្ទេសAមានចំនួន១០៨នាក់ និទ្ទេសBមាន១០៨៥ និទ្ទេសC៣២៩២ និទ្ទេសD ៦០៩៣ និងនិទ្ទេស E ៣៥៩៨២។ ក្នុងចំណោមបេក្ខជនជាប់ និទ្ទេសAទាំង១០៨នាក់នោះមកពីរាជធានីភ្នំពេញ៤៨នាក់, សៀមរាប១៤នាក់, បាត់ដំបង៧នាក់, ត្បូងឃ្មុំនិងតាកែវ៦នាក់ក្នុង១ខេត្ត ,ខេត្តកណ្ដាល និងកំពង់ចាម៥នាក់ក្នុង១ខេត្ត, កំពត៤នាក់, ព្រះវិហារ កំពង់ធំ បន្ទាយមានជ័យ ក្រចេះ និងព្រះសីហនុ២នាក់ក្នុង១ខេត្ត ហើយកំពង់ស្ពឺ ស្វាយរៀង និងប៉ៃលិន ម្នាក់ក្នុង១ខេត្ត។
ចំនួននេះបើប្រៀបធៀបទៅនឹងឆ្នាំមុនឃើញថាមានការកើនឡើងជិត១០ដង ដែលឆ្នាំមុនប្រឡងបាក់ឌុបឆ្នាំ២០១៤គឺជាឆ្នាំដែលក្រសួងអប់រំយុវជន និងកីឡាបានធ្វើកំណែទម្រង់ជាលើកដំបូងមាន បេក្ខជនជាប់និទ្ទេស A ចំនួន១១នាក់ និងនិទ្ទេស B ចំនួន២៨០នាក់ សម្រាប់ការប្រឡងលើក ទី១ក្នុង ចំណោមបេក្ខជនប្រឡងជាប់ចំនួន២៣១២៦នាក់ ត្រូវជា ២៥,៧២ ភាគរយក្នុងចំណោម បេក្ខជន ចូលរួម ប្រឡងជិត៩ម៉ឺននាក់។រីឯប្រឡង លើកទី២វិញ មិនមានបេក្ខជនប្រឡងជាប់និទ្ទេស Aនិង Bទេគឺទទួលបាននិទ្ទេស C ចំនួន១នាក់ និទ្ទេសD ចំនួន៥៥នាក់ និងនិទ្ទេស E ចំនួន ១០.៨១៥ នាក់ក្នុងបេក្ខជនប្រឡងជាប់១០៨៧១នាក់ត្រូវជា១៧,៩៤ភាគរយ។សរុបមកឆ្នាំមុនមានបេក្ខជនប្រឡងជាប់ចំនួនជាង៣៣៩៩៧នាក់ស្មើនឹងជាង៤០,៦៧%ភាគរយ។ប៉ុន្តែឆ្នាំនេះក្រសួងអប់រំយុវជននិងកីឡាមិនរៀបចំប្រឡងលើកទី២ដូចកាលពីឆ្នាំ២០១៤កន្លងទៅនោះទេ។
បេក្ខជនដែលប្រឡងជាប់ បាននិទ្ទេស A ១១នាក់ ក្នុងនោះនៅភ្នំពេញ ជាប់A៣នាក់១. ផាង វ៉េងឣាន (ប្រុស) ២. សម្បត្តិ វិបុលរ័ត្ន (ស្រី) ៣. នាង បូរា (ប្រុស)។ កណ្តាល ជាប់និទ្ទេសA២ នាក់៤. រ៉េន សុខពេជ្រ (ប្រុស) ៥. ឈីវ ស៊ីសាង (ប្រុស)។ កំពង់ឆ្នាំង ១ នាក់៦. ចាន់ ពិចិត្រ (ប្រុស)កំពង់ចាម ១ នាក់៧. អិត ស្រីពៅ (ស្រី)ព្រៃវែង ១ នាក់ ៨. យាន សោភា (ស្រី )សៀមរាប ២ នាក់ ៩. អ៊ិន សុខផល្គុន (ស្រី) ១០. វណ្ណ លីដា (ប្រុស)កំពង់ស្ពឺ ១ នាក់ ១១. ចាន់ កិត្យាភារ៉ា(ស្រី)។ពួកគេទាំង១១នាក់ បានទទួលការគាំទ្រយ៉ាងខ្លាំងពីសំណាក់ប្រមុខរាជរដ្ឋាភិបាលថ្នាក់ដឹកនាំក្រសួង និងស្ថាប័ននានាផ្តល់រង្វាន់លើកទឹកចិត្តដល់ពួកគេពិសេសពីប្រជាពលរដ្ឋទូទាំងប្រទេសតែម្តង។
ប៉ុន្តែយ៉ាងណាក៏ដោយចំនួនបេក្ខជនប្រឡងជាប់និទ្ទេស A នៅឆ្នាំនេះមានចំនួនប្រហាក់ ប្រហែលនឹង ឆ្នាំ២០១៣ដែលជាឆ្នាំដែលក្រសួងអប់រំយុវជន និងកីឡានៅមិនទាន់ ធ្វើកំណែទម្រង់នៅឡើយពោលគឺជំនាន់លោកអ៊ឹមសិទ្ធីជារដ្ឋមន្ត្រី។
តាមរបាយការណ៍បានឲ្យដឹងថា កាលពីឆ្នាំ២០១៣មានបេក្ខជនប្រឡងជាប់បាក់ឌុបចំនួន៨៦,៤៨%ក្នុងចំណោមបេក្ខជនចូលរួមប្រឡងសរុប១១៤៤១៤នាក់។ ក្នុងចំណោមនោះដែរមានបេក្ខជនប្រឡងជាប់និទេ្ទសAចំនួន១០៥នាក់ដែល៥៨នាក់នៅមណ្ឌលប្រឡងរាជធានីភ្នំពេញ និងនិទ្ទេសBមាន៣៥០៥នាក់ និទ្ទេសC១៧៨០១នាក់ និទ្ទេសD៣៧៥២២នាក់ និងនិទ្ទេសEមាន៣៧០៩០នាក់។
ពាក់ព័ន្ធនឹងបេក្ខជនប្រឡងជាប់ច្រើនជាងឆ្នាំមុននេះដែរលោកហង់ជួនណារ៉ុនរដ្ឋមន្ត្រីក្រសួងអប់រំយុវជន និងកីឡាបានមានប្រសាសន៍ថា មូលហេតុដែលសិស្សមានអត្រាប្រឡងជាប់ច្រើនជាងឆ្នាំមុនគឺដោយសារតែនៅឆ្នាំនេះសិស្សបានត្រៀមលក្ខណៈបានល្អប្រសើរពោលគឺពួកគាត់បានទទួលការបំប៉នបន្ថែមមេរៀនសំខាន់ៗចំនួន៤គឺរូបវិទ្យា,ជីវវិទ្យា,គីមីវិទ្យានិងគណិតវិទ្យាដែលមានការជួយជ្រោមជ្រែងពីក្រសួងអប់រំយុវជន និងកីឡាសហភាព សហព័ន្ធយុវជនកម្ពុជា ក្រុមការងារថ្នាក់ជាតិចុះជួយតាមមូលដ្ឋានលោកគ្រូអ្នកគ្រូដែលធ្វើឲ្យសិស្សប្រឡងឆ្នាំនេះមានសមត្ថភាពពិតប្រាកដ។ លោករដ្ឋមន្ត្រីបន្តថា «សិស្សជាប់ឆ្នាំនេះគឺជាប់ដោយសមត្ថភាពពិតប្រាកដគឺថាសិស្សពូកែគឺពូកែមែន»។
លោកហង់ជួនណារ៉ុនបានសំណូមពរដល់សិស្សដែលប្រឡងធ្លាក់សូមកុំអស់សង្ឃឹមអាចចូលរៀនឡើងវិញ។ បើមិនចង់រៀនទេអាចទៅស្វែងរកមុខជំនាញវិជ្ជាជីវៈតាមសាលាបណ្តុះបណ្តាលនានាឬអាចរៀនបំពេញវិជ្ជាឬស្វ័យរិនក៏បាន។
អ្នកជំនាញផ្នែកអប់រំបានផ្តល់យោបល់ ថាការប្រឡងធ្លាក់ មិនមានន័យថា បេក្ខជន ដើរដល់ចំណុចទាល់ច្រកទេពោលគឺមានផ្លូវជាច្រើនដែលត្រូវជ្រើសរើសដើរ។ មានជម្រើសចំនួន៣ប្រភេទ ដែលសិស្ស និងបេក្ខជនស្វ័យរិន អាចបន្តរៀនបានគឺ ទី១ អាចរៀនត្រួតថ្នាក់ទី១២ឡើងវិញ ទី២អាចរៀនជំនាញបច្ចេកវិជ្ជាផ្សេងៗ និងទី៣ អាចរៀនបរិញ្ញាបត្ររង១ឆ្នាំ បូកនឹងមួយឆមាស ហើយបន្តរៀន៤ឆ្នាំ យកបរិញ្ញាបត្រ។ ការរៀនពីបរិញ្ញាបត្ររង ទៅជាបរិញ្ញាបត្រនេះ គឺជាសញ្ញាប័ត្រចុងក្រោយ ដែលក្រសួងអប់រំ បានទទួលស្គាល់ ថាមានតម្លៃជាងសញ្ញាប័ត្រមធ្យមសិក្សាទុតិយភូមិ ដែលពួកគេមិនបានប្រឡងជាប់នោះ។
ប្រឡងបាក់ឌុបឆ្នាំនេះបានប្រព្រឹត្តទៅកាលពីថ្ងៃទី២៤និង២៥ ខែសីហានៅគ្រប់រាជធានីខេត្ត ចំនួន ១៥០ មណ្ឌល ចែកចេញជា ៣៤២៧ បន្ទប់ មានបេក្ខជនប្រឡងចំនួន៨៣៣២៥នាក់ក្នុងនោះបេក្ខជន៧០៩៧៣នាក់មកពីគ្រឹះស្ថានសិក្សារដ្ឋ និងបេក្ខជន៤៥២៧នាក់មកពីគ្រឹះស្ថានសិក្សាឯកជន និងបេក្ខជនចំនួន៣៤៩៤ជាបេក្ខជនស្វ័យរិន។ ក្នុងដំណើរការប្រឡងឆ្នាំនេះក្រសួងអប់រំបានចំណាយថវិកាប្រមាណ៣លានដុល្លារអាមេរិកដោយប្រើប្រាស់បុគ្គលិកប្រមាណ២ពាន់នាក់ពោលគឺក្នុងចំណោមបេក្ខជនម្នាក់ចំណាយប្រមាណ១៣ម៉ឺនរៀល។
នៅក្នុងរយៈពេលពីរថ្ងៃនៃការប្រឡងបាក់ឌុបនៅឆ្នាំនេះមានបេក្ខជនប្រឡងមានបញ្ហាសុខភាពចំនួនជិត៧០នាក់ក្នុងនោះមានបេក្ខជនខ្លះដួលសន្លប់ ហើយពិសេសនៅថ្ងៃទី២៥ ខែសីហាដែលជាថ្ងៃប្រឡងបញ្ចប់នៃការប្រឡងមានរឿងគួរឲ្យភ្ញាក់ផ្អើលបានកើតឡើងនៅមណ្ឌលប្រឡងខេត្តកោះកុង។ ដោយមានបេក្ខនារីម្នាក់ នៅមណ្ឌលអនុវិទ្យាល័យជាស៊ីមស្មាច់មានជ័យ ខេត្តកោះកុងបាន ឈឺពោះសម្រាលកូន ដោយពុំបានប្រឡងមួយវិញ្ញាសាចុងក្រោយនៃថ្ងៃបញ្ចប់ទៀតផង៕
បេក្ខជនជាប់និទ្ទេសAឆ្នាំនេះកើនជាងឆ្នាំមុនជិត១០ដង តែប្រហាក់ប្រហែលនឹងឆ្នាំ២០១៣
0 Comments