ក្នុងចំណុចសំខាន់ៗ ក្នុងការចូលរួមមតិរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នៅក្នុងកិច្ចប្រជុំប្រមុខដឹកនាំពិភពលោក ស្ដីពីសមភាពយ៉េនឌ័រ និងការលលើកកម្ពស់សិទ្ធអំណាចស្ត្រី នាទីក្រុងញីវយ៉ក ថ្ងៃទី ២៧ ខែកញ្ញាឆ្នាំ២០១៥នោះ សម្ដេចតេជោមានប្រសាសន៍ថា គួរបន្តផ្ដោតអាទិភាព ការបង្កើនការវិនិយោគទៅលើសមភាពយ៉េនឌ័រ ពិសេសតាមរយៈការពិនិត្យឡើងវិញលើគោលនយោបាយសារពើពន្ធ ដើម្បីបង្កើត និងបង្កើន ចំណាយសាធារណៈទៅលើសមភាពយ៉េនឌ័រ ព្រមទាំងពិនិត្យ និងវិភាគផលប៉ះពាល់នៃចំណាយសាធារណៈទៅលើវិសមភាពយ៉េនឌ័រ តាមរយៈកម្មវិធីថវិកាដែលឆ្លើយតបទៅនឹងបញ្ហាយ៉េនឌ័រ។
សម្ដេចតេជោនាយករដ្ឋមន្ត្រីបន្តថា ការធានានូវការការពារសិទ្ធិរបស់ស្ត្រី ព្រមទាំងការចូលរួមពេញលេញ និងស្មើភាពរបស់ស្ត្រី នៅក្នុងការធ្វើសេចក្ដីសម្រេចចិត្តនៅគ្រប់កម្រិត។ ការពង្រឹងយន្តការគណនេយ្យភាពសម្រាប់សមភាពយ៉េនឌ័រ តាមរយៈការពង្រឹងស្ថាប័នរដ្ឋាភិបាល ព្រមទាំងការប្រើប្រាស់មធ្យាបាយនៃការតាមដានត្រួតពិនិត្យ វឌ្ឍនភាពទាំងឡាយប្រកបដោយប្រសិទ្ធភាព និងការធានាផ្ដល់ធនធានឲ្យបានគ្រប់គ្រាន់សម្រាប់ការងារយ៉េនឌ័រ។ ការបន្តលើកកម្ពស់ការចូលរួមរបស់ស្ត្រីក្នុងសេដ្ឋកិច្ច និងហិរញ្ញវត្ថុសម្រាប់ស្ត្រី ពិសេសតាមរយៈការបង្កើនការយល់ដឹងអំពីសេវាអភិវឌ្ឍអាជីវកម្មសំខាន់ៗ សម្រាប់សហគ្រាសស្ត្រី ខ្នាតមីក្រូ ខ្នាតតូច និងមធ្យម ការបង្កើតនូវកម្មវិធីនានា ដើម្បីជួយឲ្យស្ត្រីទទួលបាននូវជំនាញបច្ចេកទេស សហគ្រិនភាព និង សេវាហិរញ្ញវត្ថុ គាំទ្រស្ត្រីក្នុងការធ្វើពិធីកម្ម និងពាណិជ្ជនីយកម្មលើវិស័យកសិកម្ម ព្រមទាំងកិច្ចសហការជាមួយភាគីពាក់ព័ន្ធនានានៅក្នុងទីផ្សារការងារ ដើម្បីលុបបំបាត់ការរើសអើងស្ត្រីនៅកន្លែងការងារ រៀបចំស្តង់ដារពលកម្មស្ត្រី ផ្ដល់ការគាំពារសង្គម និងជួយដោះស្រាយវិវាទជាដើម។ល។
សម្ដេចតេជោគូសបញ្ជាក់ថា កម្ពុជាបានចូលរួមយ៉ាងសកម្មជាមួយបណ្ដាប្រទេសសមាជិកនៃអង្គការសហប្រជាជាតិ ក្នុងការអនុវត្តគោលនយោបាយ យុទ្ធសាស្ត្រ កម្មវិធីនិងផែនការសកម្មភាពនានាសំដៅលើកកម្ពស់សមភាពយ៉េនឌ័រ និងសិទ្ធិអំណាចស្ត្រី ហើយសម្រេចបាននូវវឌ្ឍនភាពជាច្រើនតាមវិស័យសំខាន់ៗរួមមាន ការអនុម័តច្បាប់ និង ក្របខណ្ឌនិយ័តកម្ម ដើម្បីផ្ដល់ការគាំពារ លុបបំបាត់ការរើសអើង និងកាត់បន្ថយអំពើហិង្សាលើស្ត្រី និងកុមារ។ ការលើកកម្ពស់សមភាពយ៉េនឌ័រនៅក្នុងវិស័យអប់រំ តាមរយៈការបង្កើនការចុះឈ្មោះចូលរៀនរបស់ក្មេងស្រីនៅគ្រប់កម្រិតបឋមសិក្សានិងមធ្យមសិក្សា ការលើកស្ទួយការចូលរួមរបស់ស្ត្រីក្នុងវិស័យសេដ្ឋកិច្ច និងការបង្កើនភាពងាយស្រួលដល់ស្ត្រី ក្នុងការទទួលបានសេវាហិរញ្ញវត្ថុ សំដៅបង្កើនភាពឯករាជ្យផ្នែកហិរញ្ញវត្ថុរបស់ស្ត្រី។ ការលើកកម្ពស់ស្ថានភាពសុខភាពរបស់ស្ត្រី និងកុមារ ពិសេសតាមរយៈការសម្រេចបាននូវគោលដៅអភិវឌ្ឍន៍សហស្សវត្សរ៍លើមរណភាពមាតា និងការលើកកម្ពស់ការការចូលរួមរបស់ស្ត្រី នៅក្នុងកិច្ចការនយោបាយ និងការសម្រេចចិត្តលើកិច្ចការនានារបស់សង្គម ក្នុងគ្រប់ស្ថាប័នជាតិ និងគ្រប់កម្រិត ជាអាទិ៍ ស្ថាប័ននីតិបញ្ញត្តិ ស្ថាប័ននៃរាជរដ្ឋាភិបាល និងស្ថាប័នផ្សេងៗទៀតទាំងនៅថ្នាក់ជាតិ និងថ្នាក់ក្រោមជាតិ។
សម្ដេចតេជោថ្លែងបញ្ជាក់ដែរថា ឆ្នាំ២០១៥នេះ គឺជាឆ្នាំប្រវត្តិសាស្ត្រមួយសម្រាប់ពន្លឿនវឌ្ឍនភាពឆ្ពោះទៅរកសមភាពយ៉េនឌ័រ និងការលើកកម្ពស់សិទ្ធិអំណាចស្ត្រី។ ជាការពិតកិច្ចប្រជុំនេះ នឹងក្លាយជាវេទិកាដ៏សំខាន់សម្រាប់យើងទាំងអស់គ្នា ក្នុងការបន្តខិតខំប្រឹងប្រែង និងប្ដេជ្ញាចិត្តបន្ថែមទៀត ដើម្បីសម្រេចនូវសមភាពយ៉េនឌ័រ និងធ្វើឲ្យគោលដៅនេះក្លាយជាការពិតសម្រាប់ស្ត្រី និងក្មេងស្រីទាំងអស់នៅទូទាំងពិភពលោក៕
សម្ដេចតេជោ ៖ «បន្តផ្ដោតអាទិភាព ការបង្កើនការវិនិយោគទៅលើសមភាពយ៉េនឌ័រ»
0 Comments