ភ្នំពេញ ៖ នៅព្រឹកថ្ងៃទី២៨ ខែកញ្ញា នេះ តំណាងយុវជនបរិស្ថានចំនួន៥នាក់ បានដាក់ញត្តិស្នើសុំឲ្យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សប្រចាំនៅកម្ពុជា ដើម្បី ធ្វើអន្តរាគមន៍ទៅរដ្ឋាភិបាលប្រទេសឡាវ ឲ្យបញ្ឈប់គម្រោងសាងសង់ទំនប់វារីអគ្គិសនីដន សាហុង លើព្រំប្រទល់ទឹកនៃទន្លេមេគង្គខ្មែរ ឡាវ ហើយរហូតដល់ម៉ោង៩ និង៤៥ នាទីមុននេះ ពួកគេកំពុងជួបជាមួយតំណាង UN មិនទាន់ចេញវិញនៅឡើយ។
តាមញត្តិរបស់ពួកគេបានសរសេរថា បើទំនប់វារីអគ្គិសនីនេះត្រូវបានសាងសង់ នឹងបង្កគ្រោះមហន្តរាយធំធេងដល់ជីវភាពរស់នៅរបស់ប្រជាពលរដ្ឋរាប់លាននាក់ ដែលកំពុងតែរស់នៅតាមដងទន្លេមេគង្គ និងនៅតាមដងទន្លេសាប ដូចជា ប៉ះពាល់ដល់ការនេសាទ កសិកម្ម នាវាចរណ៍ ការផ្លាស់ទីលំនៅរបស់ប្រជាពលរដ្ឋខ្មែររស់នៅតាមដងទន្លេមេគង្គជាដើម ទន្ទឹមនឹងនោះក៏អាចបណ្តាលមានផលប៉ះពាល់ដល់ធនធានធម្មជាតិក្នុងទឹកដូចជា ត្រី សត្វផ្សោតដែលជាសត្វកម្រជាដើម។
តំណាងយុវជនការពារសង្គម និងបរិស្ថាន បានសូមឲ្យឧត្តមស្នងការអង្គការសហប្រជាជាតិ ទទួលបន្ទុកផែនផ្នែកសិទ្ធិមនុស្សប្រចាំនៅកម្ពុជា មេត្តាត្រួតពិនិត្យ និងជួយធ្វើអន្តរាគមន៍ស្នើទៅរដ្ឋាភិបាលឡាវ ដើម្បីបញ្ឈប់ការសាងសង់ទំនប់វារីអគ្គិសនី ដន សាហុង នៅតាមព្រំប្រទល់ទឹកនៃទន្លេមេគង្គ ខ្មែរ ឡាវ៕
ក្រុមយុវជនការពារបរិស្ថានស្នើឲ្យអ.ស.បអន្តរាគមន៍បញ្ឈប់គម្រោងសាងសង់ទំនប់វារីអគ្គិសនីដនសាហុងនៅឡាវ
0 Comments