ភ្នំពេញ ៖ ប្រធានគណបក្សអំណាចខ្មែរ លោក សួន សេរីរដ្ឋា ព្រមទាំងលោកស្រី លីណា តាន់ អនុប្រធាន និងលោកបណ្ឌិត Preston C. Oppenheimer ទីប្រឹក្សានយោបាយ នឹងដឹកនាំសមាជិកប្រតិភូគណបក្សចំនួន១៧ រូប មកពីសហរដ្ឋអាមេរិក កាណាដា និងសហគមន៍ អឺរ៉ុប នឹងវិលត្រឡប់មកប្រទេសកម្ពុជាជាលើកដំបូង បន្ទាប់ពីចាកចេញអស់រយៈពេល៨ ឆ្នាំ និង៩ ខែ។
យោងតាមសេចក្តីប្រកាសព័ត៌មានរបស់គណបក្សអំណាចខ្មែរចុះថ្ងៃទី២៨ ខែកញ្ញា ឆ្នាំ២០១៥ បានឲ្យដឹងកាលពីវេលាម៉ោង៦និង១០ នាទីល្ងាចថា ប្រតិភូថ្នាក់ដឹកនាំគណបក្សអំណាចខ្មែរ នឹងមកដល់ប្រទេសខ្មែរ តាមជើងយន្តហោះបាងកកអ៊ែរវ៉េ លេខ PG 931 ចុះចតនៅព្រលានយន្តហោះអន្តរជាតិភ្នំពេញ នាវេលាម៉ោង៩ និង៣០នាទីព្រឹកថ្ងៃទី០១ ខែតុលា ឆ្នាំ២០១៥។
តាមសេចក្តីប្រកាសព័ត៌មានបានបញ្ជាក់ថា ពិធីបដិសណ្ឋារកិច្ចនៅព្រលានយន្តហោះនាពេលនោះរួមមាន ព្រះសង្ឃចំនួន៣០ អង្គ សូត្រជយន្តោជូនប្រតិភូថ្នាក់ដឹកនាំហើយមានមន្ត្រី តំណាងខេត្ត រដ្ឋធានី និងសមាជិកអ្នកគាំទ្រគណបក្សចំនួន១០០០ នាក់រង់ចាំទទួល។ លោក សួន សេរីរដ្ឋា នឹងផ្តល់បទសម្ភាសន៍ខ្លីជូនអ្នកសារព័ត៌មានជាតិ-អន្តរជាតិ រួចបន្តដំណើរទៅកាន់ទីស្នាក់ការកណ្តាលគណបក្ស ដើម្បីបើកសម្ពោធស្នាក់ការបក្សជាផ្លូវការ និងថ្លែងការណ៍នយោបាយលើកដំបូងទៅកាន់ក្រុមអ្នកគាំទ្រ។
ដោយឡែកថ្ងៃទី០២ ខែតុលា ឆ្នាំ២០១៥ ពេលព្រឹកម៉ោង៩ ធ្វើសន្និសីទសារព័ត៌មាននៅទីស្នាក់ការកណ្តាលរបស់គណបក្សក្រោមប្រធានបទ “ទិសដៅនៃការបង្កើតសម្ព័ន្ធគណបក្សនយោបាយដែលគ្មានសំឡេងក្នុងសភាដើម្បីធ្វើការតស៊ូនយោបាយរួម និងយុទ្ធសាស្ត្រនយោបាយគោលនយោបាយទាំង៣ជំហាន” របស់គណបក្សអំណាចខ្មែរ ហើយពេលរសៀលចេញដំណើរទៅជួបជុំអ្នកគាំទ្រ និងធ្វើបុណ្យនៅស្រុកគីរីវង្ស ខេត្តតាកែវ ដែលជាស្រុកកំណើតរបស់លោកស្រី អនុប្រធាន លីណា តាន់។
នៅថ្ងៃទី០៣ ខែតុលា ឆ្នាំ២០១៥ ចាប់ពីម៉ោង៧ ព្រឹករហូតដល់ម៉ោង៥ លោក សួន សេរីរដ្ឋា និងលោកបណ្ឌិត Dr. Preston C. Oppenheimer ជួបជាមួយនឹងព្រះសង្ឃ យុវជន សិស្ស និងនិស្សិតនៅសណ្ឋាគារសាន់វ៉េ ក្រុងភ្នំពេញ ដើម្បីបើក “វេទិកាបណ្តុះបណ្តាល ភាពជាអ្នកនយោបាយ” ដែលវេទិកានោះ នឹងផ្តល់ឲ្យអ្នកចូលរួមទាំងអស់អាចចោទសួរនូវសំណួរនយោបាយទូទៅដោយសេរីនិងចំហ។
នៅថ្ងៃទី០៤និងទី០៥ ខែតុលា ឆ្នាំ២០១៥ លោកសួន សេរីរដ្ឋា ថ្នាក់ដឹកនាំនិងមន្ត្រីអមដំណើរធ្វើបិណ្ឌ កាន់បុណ្យភ្ជុំវេនទី៧ នៅវត្តខ្នាចរមាស ឃុំខ្នាសរមាស ស្រុកបវេល ខេត្តបាត់ដំបង ដែលជាស្រុកកំណើតរបស់លោកប្រធាន សួន សេរីរដ្ឋា៕
លោក សួន សេរីរដ្ឋា ប្រកាសចូលមកប្រទេសកម្ពុជានាថ្ងៃទី០១ខែតុលាខាងមុខ
0 Comments