កំពង់ឆ្នាំង ៖ យោងតាមបទបញ្ជាលេខ ០១ បប របស់រាជរដ្ឋាភិបាលកម្ពុជា រួមនិងអនុសាសន៍៧ចំណុចរបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្រោមការចង្អុលបង្ហាញពីលោកយុទ្ធ ភូថង រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និង ឯកឧត្តម អេង ជាសាន្ត អគ្គនាយកដ្ឋានជលផល និង ឯកឧត្តម ឈួរ ច័ន្ទឌឿន អភិបាលខេត្តកំពង់ឆ្នាំង កម្លាំងចម្រុះមានកម្លាំង ខណ្ឌរដ្ឋបាលជលផលខេត្ត បញ្ជាផ្ទាល់ពីលោក សោម ភារុណ នាយខណ្ឌរដ្ឋបាលជលផលខេត្ត ដឹកនាំដោយ លោក ម៉ប់ សាមុន នាយរងខណ្ឌរដ្ឋបាលជលផលខេត្ត និងចូលរួមដោយ លោក ផៅ ស្រៀង អភិបាលរងស្រុកកំពង់លែង កម្លាំងរដ្ឋបាលជលផលផ្នែក សង្កាត់ ដឹកនាំដោយលោក ពុំ សុផល នាយសង្កាត់រដ្ឋបាលជលផលកំពង់លែង កម្លាំងនគរបាល សហគមន៍នេសាទ អាជ្ញាធរមូលដ្ឋាន នៅព្រឹកថ្ងៃទី២៨ ខែកញ្ញា ឆ្នាំ២០១៥ បានប្រតិបត្តិការចុះបង្ក្រាបរបាំងសាច់អួននៅចំណុចចុងព្រែកផ្លូវទូក ចំណុចព្រែកលួង ចំណុចសោកម៉ោក ក្នុងភូមិសាស្ត្រស្រុកកំពង់លែង ខេត្តកំពង់ឆ្នាំង កម្លាំងចូលរួម២៥នាក់ មធ្យោបាយកាណូត បាឡាចំនួន០៨គ្រឿង។
ជាលទ្ធផល កម្លាំងចម្រុះរដ្ឋបាលជលផលក្នុងយុទ្ធនាការបង្ក្រាបខាងលើនេះ បង្ក្រាបបាន របាំង សាច់អួនចំនួន២៥កន្លែងស្មើ២១០០ម៉ែត្រ លបលូ៣១មាត់ បង្គោល១០៥០ដើម ចាក់លែងកូនត្រីចម្រុះចំនួន១៩០គីឡូក្រាមចូលក្នុងបឹងធម្មជាតិវិញ។
នាយរងខណ្ឌរដ្ឋបាលជលផលខេត្តកំពង់ឆ្នាំង លោក ម៉ប់ សាមុន នាឱកាសនោះបានថ្លែងឲ្យដឹងថា ក្រោមការចង្អុលបង្ហាញពីលោកយុទ្ធ ភូថង រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងលោក អេង ជាសាន្ត អគ្គនាយកដ្ឋានជលផល និងលោកឈួរ ច័ន្ទឌឿន អភិបាលខេត្តកំពង់ឆ្នាំង បានខិតខំប្រឹងប្រែង ដោយកម្លាំងជំនាញ សមត្ថកិច្ច អាជ្ញាធរមូលដ្ឋាន បានខិតខំអនុវត្តការពារ និងបង្ក្រាបបទល្មើសនេសាទ ដើម្បីការពារមច្ឆាជាតិរបស់យើងទាំងអស់គ្នា។ លោកបានធ្វើការផ្សព្វផ្សាយនិងណែនាំច្បាប់ស្តីពីជលផល និងផ្សព្វផ្សាយប្រកាសលេខ ១៩៧ អនក្រ.បក ស្តីពីការកំណត់ដែនព្រៃលិចទឹកជុំវិញបឹងទន្លេសាប ចុះថ្ងៃទី២៩ ខែសីហា ឆ្នាំ២០១១ ដល់ក្រុមអ្នកនេសាទនៅទីនោះ សូមធ្វើការនេសាទជៀសវាងប្រើឧបករណ៍ដែលត្រូវហាមឃាត់ជាដាច់ខាត ដោយអនុវត្តតាមប្រកាសលេខ ៤៥៨ ក.ស.ក ស្តីពីការប្រើប្រាស់ឧបករណ៍នេសាទជាលក្ខណៈគ្រួសារ និងជៀសវាងធ្វើការនេសាទក្នុងដែនអភិរក្សដែលជាហេតុនាំអោយជាប់ទោសទណ្ឌ។ សូមអោយមានការគោរពច្បាប់ជលផលទាំងអស់គ្នានាំអោយមានការកើនឡើងវិញនូវមច្ឆាជាតិទុកសម្រាប់កូនចៅជំនាន់ក្រោយនិងសូមរាយការណ៍ជូនសមត្ថកិច្ចមូលដ្ឋាន ក៏ដូចជាសមត្ថកិច្ចជំនាញក្នុងករណីជួបបទល្មើស អោយបានទាន់ពេលវេលាផងដែរ៕
យុទ្ធនាការបង្ក្រាបបទល្មើសនេសាទនៅស្រុកកំពង់លែង
0 Comments