ភ្នំពេញ ៖ មេបញ្ជាការរងនៃកងរាជអាវុធហត្ថលើផ្ទៃប្រទេសបានថ្លែងថា អ្នកដែលផ្សព្វផ្សាយថា “ផែនទីដែលរាជរដ្ឋាភិបាលបានប្រើប្រាស់សម្រាប់បោះបង្គោលព្រំដែនជាមួយប្រទេសជិតខាងថាជាផែនទីក្លែងក្លាយហើយមានភស្តុតាងគ្រប់គ្រាន់នឹងត្រូវចាប់ខ្លួនបញ្ជូនទៅតុលាការចាត់ការតាមច្បាប់”។
លោកឧត្តមសេនីយ៍ឯកប្រាក់ សិទ្ធ មេបញ្ជាការរងកងរាជអាវុធហត្ថលើផ្ទៃប្រទេសបានដាក់បទបញ្ជាខាងលើនេះដល់មន្ត្រីកងកងរាជអាវុធហត្ថរាជធានីភ្នំពេញក្នុងពិធីផ្សព្វផ្សាយ “ការងារអប់រំចិត្តសាស្ត្រ”ប្រចាំឆមាសទី២ ឆ្នាំ២០១៥នៅទីបញ្ជាការដ្ឋានកងរាជធានីភ្នំពេញកាលពីថ្ងៃទី១៥ ខែកញ្ញា ឆ្នាំ២០១៥កន្លងមកថ្មីៗនេះដោយមានមន្ត្រីកងរាជអាវុធហត្ថរាជធានីភ្នំពេញជាង២០០នាក់ចូលរួម។
លោកប្រាក់ សិទ្ធបន្តថា បន្ទាប់ពីរាជរដ្ឋាភិបាលបានខ្ចីផែនទីរបស់អ.ស.ប.និងរបស់ប្រទេសបារាំងមកផ្ទៀងផ្ទាត់បានបង្ហាញឲ្យឃើញថា ផែនទីដែលរាជរដ្ឋាភិបាលបានប្រើប្រាស់សម្រាប់បោះបង្គោលព្រំដែនជាមួយប្រទេសជិតខាងគឺដូចគ្នាបេះបិទទៅនឹងផែនទីខាងលើនេះ។ ដូច្នេះអ្នកដែលបានផ្សព្វផ្សាយថា”ផែនទីក្លែងក្លាយ”ទោះជានៅទីណា ឬក៏ក្នុងបណ្ដាញសង្គមហ្វេសប៊ុកក៏ដោយសមត្ថកិច្ចទាំងអស់ត្រូវស្វែងរកភស្តុតាងឲ្យបានច្បាស់លាស់ហើយចាប់ខ្លួនបញ្ជូនទៅតុលាការតែម្តង។
គួររំលឹកថា សម្ដេចតេជោហ៊ុន សែន ធ្លាប់មានប្រសាសន៍កាលពីថ្មីៗនេះថា ចាប់ពីពេលនេះតទៅសម្ដេចមិនអនុគ្រោះទៀតឡើយ ចំពោះអ្នកណាដែលផ្សព្វផ្សាយតាមបណ្ដាញសង្គមហ្វេសប៊ុក ឬតាមប្រព័ន្ធអ្វីមួយក៏ដោយបំផ្លើសថា រាជរដ្ឋាភិបាលប្រើប្រាស់ផែនទីក្លាយក្នុងការបោះបង្គោលព្រំដែនជាមួយប្រទេសជិតខាងនោះសមត្ថកិច្ចត្រូវតែតាមស្រាវជ្រាវចាប់ខ្លួនជននោះមកផ្ដន្ទាទោសតាមច្បាប់ជាធរមាន។.
សូមបញ្ជាក់ថា លោកឧត្តមសេនីយ៍ឯកប្រាក់ សិទ្ធមេបញ្ជាការរងកងរាជអាវុធហត្ថលើផ្ទៃប្រទេសបានអញ្ជើញចូលរួមជាវាគ្មិនក្នុងពិធីខាងលើនេះប្រារព្ធធ្វើ៣ថ្ងៃចាប់ពីថ្ងៃទី១៥ដល់១៧ ខែកញ្ញា ឆ្នាំ២០១៥ ក្នុងគោលបំណងពង្រឹងជំហរមន្ត្រីទាំងអស់ឲ្យស្គាល់”មិត្តនិងអមិត្ត”ក្នុងការបំពេញភារកិច្ចជូនរាជរដ្ឋាភិបាល ប្រជាពលរដ្ឋ និងសង្គមជាតិ។
មន្ត្រីអាវុធហត្ថបានឲ្យដឹងថា យោងតាមផែនការលេខ: ៣៣/២០១៥ ផក របស់បញ្ជាការដ្ឋានកងរាជអាវុធហត្ថលើផ្ទៃប្រទេស ស្ដីពីការផ្សព្វផ្សាយការងារ អប់រំចិត្តសាស្ត្រប្រចាំឆមាសទី២ ឆ្នាំ២០១៥ ចុះថ្ងៃទី១១ ខែសីហា ឆ្នាំ២០១៥ និងដើម្បីក្តាប់ជាប់ការងារសតិអារម្មណ៍ និងការវិវឌ្ឍន៍របស់កម្លាំងកងរាជអាវុធហត្ថ ក្នុងគោលបំណងបង្កើនចំណេះដឹងដល់នាយទាហាន នាយទាហានរង និងពលទាហាន នៃកងរាជអាវុធហត្ថឲ្យយល់ជ្រួតជ្រាបនូវតួនាទី ភារកិច្ច និងបេសកកម្មក្នុងការបម្រើជាតិមាតុភូមិ និងប្រជាពលរដ្ឋប្រកបដោយមនសិការស្នេហាជាតិ មានឆន្ទៈមោះមុត ស្មោះត្រង់ដាច់ខាតចំពោះ ជាតិ សាសនា ព្រះមហាក្សត្រ និងរាជរដ្ឋាភិបាល។
ជាពិសេសលើកកម្ពស់សមត្ថភាព ចំណេះដឹងជំនាញ ចំណេះដឹងទូទៅច្បាប់បទបញ្ជា បទវិន័យ ក្រមសីលធម៌ វិជ្ជាជីវៈ កម្មវិធីគោលនយោបាយ របស់ថ្នាក់ដឹកនាំ និងបទបញ្ជា៦ចំណុចរបស់សម្ដេចតេជោ ហ៊ុន សែន។
លោកឧត្តមសេនីយ៍ឯកប្រាក់ សិទ្ធមានប្រសាសន៍ថា ការផ្សព្វផ្សាយនេះនឹងបន្តធ្វើទូទាំងប្រទេសរហូតដល់ចុងខែតុលា ដើម្បីឲ្យនាយទាហាន នាយទាហានរង និងពលទាហាននៃកងរាជអាវុធហត្ថជ្រួតជ្រាបទាំងអស់គ្នា។
លោកក៏បានលើកឡើងនូវសភាពការណ៍នៅបណ្ដាប្រទេសមួយចំនួនដែលកំពុងកើតមានសង្គ្រាម មានជម្លោះផ្ទៃក្នុងពិសេសបណ្ដាប្រទេសដែលកំពុងកើតឡើងនូវបដិវត្តន៍ពណ៌លឿងហើយលើកយកបទពិសោធន៍ទាំងនោះមកបង្ការ និងទប់ស្កាត់នៅប្រទេសកម្ពុជា ដើម្បីថែរក្សាសន្តិសុខ សន្តិភាពជូនសង្គមជាតិ ដើម្បីអភិវឌ្ឍន៍ប្រទេសឲ្យមានការរីកចម្រើន៕
អ្នកដែលផ្សព្វផ្សាយថា"រាជរដ្ឋាភិបាលប្រើផែនទីក្លែងក្លាយ"ប្រឈមនឹងការចាប់ខ្លួន
0 Comments