ភ្នំពេញ ៖ ក្រសួងព័ត៌មាន បានរៀបចំវគ្គបណ្តុះបណ្តាល សម្រាប់ក្រុមការងារបច្ចេកទេសរៀបចំតាក់តែងសេចក្តីព្រាងច្បាប់ ស្តីពីសិទ្ធិទទួលព័ត៌មាននៅកម្ពុជា នាព្រឹកថ្ងៃទី១៧ ខែកញ្ញា ឆ្នាំ២០១៥នេះ នៅសណ្ឋាគារកាំបូឌីយ៉ាណា ក្រោមវត្តមានលោក ហ៊ុយ សារ៉ាវុធ អនុរដ្ឋលេខាធិការក្រសួងព័ត៌មាន និងលោកស្រី Anne Lemaistre តំណាងអង្គការយូណេស្កូប្រចាំកម្ពុជា។
លោក ហ៊ុយ សារ៉ាវុធ អនុរដ្ឋលេខាធិការក្រសួងព័ត៌មានថែ្លងថា នេះជាវគ្គ បណ្តុះបណ្តាលលើកទី២ហើយ ដែលក្រសួងព័ត៌មានបណ្តុះបណ្តាលសម្រាប់ក្រុមការងារបច្ចេកទេសរៀបចំតាក់តែងសេចក្តីព្រាងច្បាប់ស្តីពីសិទ្ធិទទួលព័ត៌មាន ក្រោមប្រធានបទ«ច្បាប់ស្តីពីសិទ្ធិទទួលព័ត៌មាន នៅបណ្តាប្រទេសអាស៊ាន» ដើម្បីដកស្រង់ខ្លឹមសារ អត្ថន័យ និងចំណុចសំខាន់ៗនៃនីតិវិធីក្នុងការតាក់តែងច្បាប់ ស្តីពីសិទ្ធិទទួលយលព័ត៌មាន ពីបណ្តាប្រទេសជាសមាជិកអាស៊ានមួយចំនួន ដែលបានអនុវត្តហើយ មកធ្វើការសិក្សាស្រាវជ្រាវប្រមូលបានធាតុចូល សម្រាប់យកមកធ្វើការកែលម្អ នៅក្នុងសេចក្តីព្រាងច្បាប់ស្តីពីសិទ្ធិទទួលព័ត៌មានកម្ពុជាយើង។ លោកក៏សង្ឃឹមជឿជាក់ថា បន្ទាប់ពីចូលរួមបណ្តុះបណ្តាលនេះហើយ ក្រុមការងារបច្ចេកទេស និងសមាជិកក្រុមការងាររៀបចំតាក់តែងសេចក្តីព្រាងច្បាប់ ដែលជាមន្ត្រីវ័យក្មេងជំនាន់ក្រោយនឹងទទួលបាននូវចំណេះដឹង និងចំណេះធ្វើ ព្រមទាំងបទពិសោធន៍ថ្មីៗបន្ថែមទៀតក្នុងការតាក់តែងសេចក្តីព្រាងច្បាប់ ពីបណ្តាប្រទេសនៃសមាជិកអាស៊ានមួយចំនួនដែលបានអនុវត្តហើយ៕
ក្រសួងព័ត៌មាន ៖ បណ្តុះបណ្តាល ក្រុមការងារបច្ចេកទេសរៀបចំតាក់តែងសេចក្តីព្រាងច្បាប់ស្ដីពីសិទ្ធិទទួលព័ត៌មាន
0 Comments