ភ្នំពេញ ៖ ចៅក្រមសភាស៊ើបសួរសាលាឧទ្ធរណ៍ កាលពីវេលាម៉ោង១៥និង៤០នាទីថ្ងៃទី១៧ ខែកញ្ញា ឆ្នាំ២០១៥នេះ បានសម្រេចមិនឲ្យលោក ហុង សុខហួរ នៅក្រៅឃុំទេ ពោលគឺបន្តឃុំខ្លួនក្នុងគុកដើម្បីទុកឲ្យតុលាការចាត់ការតាមច្បាប់។ សវនាការនេះមិនមានលោក ហុង សុខហួរ ជាជនជាប់ចោទចូលរួមទេ គឺមានតែមេធាវីរបស់លោក ហ្ង សុខហួរ ប៉ុណ្ណោះបានចូលរួម។
លោក ជួង ជូងី មេធាវី ការពារឲ្យលោក ហុង សុខបួរ បានថ្លែងថា ការសម្រេចរបស់សាលាឧទ្ធរណ៍មិនត្រឹមត្រូវទេ លោកនឹងប្ដឹងសាទុក្ខទៅតុលាការកំពូលទៀត។ លោក ឃុន លាងម៉េង ជាប្រធានក្រុមប្រឹក្សាជំនុំជម្រះបានសម្រេចថា សាលាឧទ្ធរណ៍សម្រេចតម្កល់សេចក្ដីសម្រេចរបស់តុលាការក្រុងទុកជាបានការដដែល។
លោក ហុង សុខហួរ ត្រូវបានលោក កោ វណ្ឌី ចៅក្រមស៊ើបសួរសាលាដំបូងរាជធានីភ្នំពេញ សម្រេចកាលពីព្រឹកថ្ងៃទី១៦ ខែសីហា ឆ្នាំ២០១៥ ឃុំខ្លួនដាក់ពន្ធនាគារ ក្រោមការចោទប្រកាន់របស់លោក មាស ច័ន្ទ ពិសិដ្ឋ ព្រះរាជអាជ្ញារងអមតុលាការក្រុងភ្នំពេញចោទប្រកាន់ពីបទក្លែងបន្លំឯកសារសាធារណៈ បទប្រើប្រាស់ឯកសារសាធារណៈក្លែង និងបទញុះញង់ឲ្យប្រព្រឹត្តបទឧក្រិដ្ឋជាអាទិ៍ តាមមាត្រា ៦២៩, ៦៣០ និងមាត្រា៤៩៥ នៃក្រមព្រហ្មទណ្ឌ។
មួយសប្ដាហ៍ក្រោយមក មេធាវីរបស់លោក ហុង សុខហួរ បានដាក់ពាក្យសុំនៅក្រៅឃុំ តែលោកចៅក្រមបានបដិសេធ ទើបក្រុមមេធាវីបន្តប្ដឹងមកសាលាឧទ្ធរណ៍ ហើយសាលាឧទ្ធរណ៍បានសម្រេចនារសៀលថ្ងៃនេះមិនឲ្យលោក ហុង សុខហួរ នៅក្រៅឃុំដដែល។ សូមបញ្ជាក់ថា កាលពីរសៀលថ្ងៃទី១៧ ខែសីហា ឆ្នាំ២០១៥ ព្រឹទ្ធសភាបានសម្រេចដកអភ័យឯកសិទ្ធិលោក ហុង សុខហួរ ប្រយោជន៍ដើម្បីឲ្យតុលាការបន្តនីតិវិធី។
លោក ហុង សុខហួរ ត្រូវបានចាប់ខ្លួនដោយសារតែលោកបានក្លែងសន្ធិសញ្ញាកម្ពុជា-វៀតណាម ពាក់ព័ន្ធនឹងបញ្ហាព្រំដែន ហើយបង្ហោះឯកសារក្លែងទាំងនោះនៅក្នុងហ្វេសប៊ុករបស់គាត់ បណ្ដាលឲ្យរាជរដ្ឋាភិបាលត្រូវតែចាត់ការចំពោះអ្នកញុះញង់ទាំងនោះ៕
សភាស៊ើបសួរសាលាឧទ្ធរណ៍សម្រេចមិនឲ្យលោក ហុង សុខហួរ នៅក្រៅឃុំ
0 Comments