កំពង់ឆ្នាំង ៖ អនុវត្តន៍នូវវិធានការការពារធនធានជលផលជាតិ និងដើម្បីឆ្លើយតបទៅនឹងលិខិតជូនដំណឹងលេខ៥៩៦៧ កសក របស់ក្រសួងកសិកម្ម រុក្ខាប្រមាញ់ និងនេសាទ ស្តីពីការរំលឹកការបញ្ឈប់សកម្មភាពការចិញ្ចឹមត្រីឆ្ដោរ និងត្រីរ៉ស់ នៅថ្ងៃទី១៧ ខែកញ្ញា ឆ្នាំ២០១៥នេះ លោកចេង ញ៉ាន់ អភិបាលរងខេត្ត និងលោកសោម ភិរុណ នាយខណ្ឌរដ្ឋបាលជលផលកំពង់ឆ្នាំងបានដឹកនាំកម្លាំងសមត្ថកិច្ចចម្រុះចុះបង្ក្រាបស្រះចិញ្ចឹមត្រីឆ្ដោរចំនួន៧កន្លែង និងកូនត្រីឆ្ដោរ២ម៉ឺន៥ពាន់កូនត្រូវបានសម្លាប់។
កិច្ចប្រតិបត្តិការនេះបានធ្វើឡើងនៅក្នុងភូមិទន្លេក្រៅ ឃុំជលសា ស្រុកជលគីរី ខេត្តកំពង់ឆ្នាំង ដែលមានការចូលរួមពីលោកសំ សត្យា អនុប្រធាននាយកដ្ឋាននីតិកម្ម និងវិវាទជាតំណាងរដ្ឋបាលជលផល និងលោកព្រះរាជអាជ្ញារងអមសាលាដំបូងខេត្តកំពង់ឆ្នាំងផងដែរ។
នៅថ្ងៃទី១៧ ខែកញ្ញា ពីម៉ោង៨និង០៥នាទីព្រឹករហូតដល់ម៉ោង១រសៀល លោកអភិបាលរងខេត្តបានឲ្យកម្លាំងសមត្ថកិច្ចចម្រុះរួមមាន ខណ្ឌរដ្ឋបាលជលផលកំពង់ឆ្នាំង, កម្លាំងនគរបាលខេត្ត,កម្លាំងកងរាជអាវុធហត្ថខេត្ត និងអាជ្ញាធរឃុំស្រុក សរុបចំនួន៣២នាក់ចុះកៀរយកកូនត្រីឆ្តោពីក្នុងស្រះទាំង៧កន្លែង ដោយប្រមូលបានកូនត្រីឆ្ដោរប្រមាណជាង២ម៉ឺនក្បាល យកមកសម្លាប់ និងប្រគល់ ត្រីងាប់ទាំងនោះឲ្យម្ចាស់ដើមវិញ។
លោក សោម ភិរុណ នាយខណ្ឌរដ្ឋបាលជលផលកំពង់ឆ្នាំងបានឲ្យដឹងថា ថ្ងៃនេះអាជ្ញាធរខេត្តស្រុកឃុំ រួមនឹងសមត្ថកិច្ចចម្រុះ បានបង្ក្រាបទីតាំងចិញ្ចឹមត្រីឆ្ដោរ៧កន្លែង ដោយឡែកស្រះដទៃទៀតដែលនៅសេសសល់ សមត្ថកិច្ចចម្រុះនឹងបន្តចុះបង្ក្រាបជាបន្តបន្ទាប់ទៀតដើម្បីលុបបំបាត់ឲ្យអស់នូវសកម្មភាពចិញ្ចឹមត្រីឆ្ដោរ និងត្រីរ៉ស់ ព្រោះត្រីទាំង២ប្រភេទនេះ ដែលជាត្រីស៊ីសាច់ត្រីជាអាហារ គឺបានប៉ះពាល់យ៉ាងធ្ងន់ធ្ងរណាស់ដល់ធនធានជលផលធម្មជាតិរបស់យើង នៅពេលម្ចាស់ស្រះត្រីទាំងនោះស្វែងរកចំណីផ្ដល់ឲ្យវា។ លោកនិយាយទៀតថា ប្រជាពលរដ្ឋគួរតែបង្វែរការចិញ្ចឹមត្រីឆ្ដោរ និងត្រីរ៉ស់ មកចិញ្ចឹមប្រភេទត្រីណាដែលមិនមានផលប៉ះពាល់ដល់ធនធានជលផលជាតិរបស់យើង ព្រោះការចិញ្ចឹមត្រីឆ្ដោរ និងត្រីរ៉ស់ គឺមានការចំណាយទុនធំ ហើយមិនមានផលចំណេញនោះទេ នេះបើយោងតាមការស្រាវជ្រាវរបស់អ្នកជំនាញរដ្ឋបាលជលផល តែប្រជាពលរដ្ឋមួយចំនួនតូចតែងតែជឿតាមឃោសនារបស់ឈ្មួញជាអ្នកលក់កូនត្រីឆ្ដោរ។
ក្នុងឱកាសនោះលោក ចេង ញ៉ាន់ អភិបាលរងខេត្តកំពង់ឆ្នាំងបានធ្វើការពន្យល់ណែនាំប្រជាពលរដ្ឋថា ការចិញ្ចឹមត្រីឆ្ដោរ និងត្រីរ៉ស់នេះមានផលប៉ះពាល់ធ្ងន់ធ្ងរណាស់ដល់ធនធានជលផលជាតិទើបច្បាប់មិនឲ្យចិញ្ចឹម និងមួយផ្នែកទៀតប៉ះពាល់ដល់ជីវភាពបងប្អូនប្រជានេសាទជាលក្ខណៈគ្រួសារ ព្រោះថាអ្នកចិញ្ចឹមត្រីឆ្ដោរ និងត្រីរ៉ស់ត្រូវការចំណី ដែលជាកូនត្រីគ្រប់ប្រភេទពីជនខិលខូចមួយចំនួនដែលដាក់បទល្មើសតាមបឹងទន្លេយកមកលក់។ នៅពេលអស់កូនត្រីគ្រប់ប្រភេទ ថាតើប្រជានេសាទរាប់ពាន់គ្រួសារ គាត់មានអ្វីចិញ្ចឹមជីវិត។
លោកអភិបាលរងខេត្ត បានដាក់គោលការឲ្យគណៈបញ្ជាការឯកភាពស្រុក ចុះផ្សព្វផ្សាយអោយអ្នកចិញ្ចឹមត្រីឆ្ដោរ ត្រីរ៉ស់ ដែលនៅសេសសល់ទាំងអស់ ឲ្យស្ម័គ្រចិត្តបញ្ឈប់ការចិញ្ចឹមត្រីឆ្ដោរ និងត្រីរ៉ស់ជាបន្ទាន់ ដើម្បីកុំឲ្យខាតបង់លុយកាក់របស់គាត់បន្តទៀត។
ក្រោយពីលោកអភិបាលរងខេត្តបានណែនាំរួចមក ប្រជាពលរដ្ឋជាម្ចាស់ស្រះទាំង៧កន្លែងដែលសមត្ថកិច្ចចម្រុះបានបង្ក្រាប បានសំណូមពរដល់លោកអភិបាលរងខេត្ត និងសមត្ថកិច្ចចម្រុះទាំងអស់ជួយធ្វើការបង្ក្រាបអ្នកចិញ្ចឹមត្រីឆ្ដោរ ត្រីរ៉ស់ទាំងអស់ ឲ្យបានគ្រប់គ្នា កុំឲ្យបង្ក្រាបមួយទុកមួយ នោះគឺមិនយុត្តិធម៌ឡើយ។
អ្នកចិញ្ចឹមត្រីខុសច្បាប់ទាំង៧កន្លែង ត្រូវបានសមត្ថកិច្ចជំនាញ ហៅឲ្យធ្វើកិច្ចសន្យាបញ្ឈប់ការចិញ្ចឹមត្រីប្រភេទនេះជាបន្តទៀត តែបើថ្ងៃក្រោយនៅតែចិញ្ចឹម ខណ្ឌរដ្ឋបាលជលផលនឹងអនុវត្តទៅតាមច្បាប់ស្ដីពីជលផលមិនលើកលែងឡើយ៕
កូនត្រីឆ្ដោរចិញ្ចឹមខុសច្បាប់ជាង២ម៉ឺនក្បាល ត្រូវបានបង្ក្រាបនៅស្រុកជលគីរី
0 Comments