ក្រុមបឹងកេតអង្គរ ដែលកំពុងតែប្រដេញកំពូលតារាងបានប្រទះពាក្យបរាជ័យហើយក្រោមកណ្ដាលដៃក្រុមបៀលប្រាយយូណាយធីត ក្នុងប្រកួតសប្ដាហ៍ទី១៦ នៃពានរង្វាន់មិត្តហ្វូនខេមបូឌានលីក២០១៥ (Metfone Cambodian League 2015) នៅល្ងាចថ្ងៃព្រហស្បត្តិ៍ ទី ១៧ ខែ កញ្ញា ឆ្នាំ ២០១៥ ម្សិលមិញនេះ ខណៈលទ្ធផល២ប្រកួតផ្សេងទៀតក្រុម ណាហ្គាវើល ឈ្នះវេស្ទើន ហើយស្វាយរៀងអែហ្វស៊ី ស្មើគ្នាជាមួយអគ្គស្នងការដ្ឋាននគរបាលជាតិ (ប៉ូលិស)
ក្រុមបឹងកេតអង្គរ បានប្រកួតចាញ់ក្រុមបៀលប្រាយយូណាយធីត ៣ ទល់ ២ នៅល្ងាចថ្ងៃ ព្រហស្បត្តិ៍ ទី ១៧ ខែកញ្ញា ឆ្នាំ ២០១៥ លើទីលានកីឡដ្ឋានស្ដាតចាស់។ អ្នករកគ្រាប់បាល់ជ័យជម្នះឱ្យក្រុម៣ គ្រាប់ឱ្យបៀលប្រាយមាន កីឡាករJoseph, រ៉ឹង ប៊ុនហៀង និងកីឡាករ Momoh។ ចំណែក ២ គ្រាប់របស់បឹងកេតអង្គរ រកបានដោយកីឡាករប្រធានក្រុម ឃួន ឡាបូរ៉ាវី នៅនាទី ៥២ ហើយខ្សែការពារ សុខ សុវណ្ណ រកគ្រាប់ចុងក្រោយនៅនាទី ៧។
ដោយឡែកនាល្ងាចម្សិលមិញដែរនៅទីលានពហុកីឡដ្ឋានជាតិវិញ ក្រុមណាហ្គាវើល បានយកឈ្នះក្រុមវេស្ទើនភ្នំពេញ ដោយលទ្ធផល ៨ ទល់ ។ ៨គ្រាប់របស់ណាហ្គាវើលរកបានដោយកីឡាករ Alpha Oumar Lelouma Barry ៤គ្រាប់ម្នាក់ឯង កីឡាករ ឈឹម សំបូរ រកបាន២គ្រាប់ម្នាក់ឯង ហើយប្រធានក្រុម ស៊ុន សុវណ្ណរិទ្ធី និង ទៀង ទីនី រកបានម្នាក់ ១គ្រាប់។ ចំណែកក្រុមវេស្ទើន វិញវាយបកបាន ២ គ្រាប់ ដោយ មី ហុង និង នុត ស៊ីនួន។
ចំណែកប្រកួតរវាងក្រុមស្វាយរៀងអេហ្វស៊ី និង អគ្គស្នងការដ្ឋាននគរបាលជាតិ បញ្ចប់ទៅដោយលទ្ធផល ១ ទល់ ១ លើទីលានពហុកីឡដ្ឋានជាតិ។ កីឡាករ ប្រាក់ មុន្នីឧត្តម បានរកគ្រាប់បាល់នាំមុខឱ្យក្រុមស្វាយរៀងអែហ្វស៊ី នៅនាទី ៣២ ប៉ុន្ដែខ្សែប្រយុទ្ធរបស់ក្រុមអគ្គស្នងការដ្ឋាននគរបាលជាតិ នួន បុរី បានរកគ្រាប់បាល់តាមស្មើ ១ ទល់ ១ វិញនៅនាទី ៣៩ មុនបញ្ចប់តង់ទី។
សរុបតារាងចំណាត់ថ្នាក់បណ្ដោះអាសន្នប្រចាំប្រកួតទី ១៦ នេះក្រុមភ្នំពេញក្រោន ឈរកំពូលតារាងមាន ៣៩ ពិន្ទុ តាមពីក្រោយដោយក្រុមភ្នំពេញក្រោន មាន៣៨ ពិន្ទុតែសល់១ប្រកួតក្នុងដៃ។ ក្រុមខេមបូឌានថាយហ្គឺរ បន្តឈរនៅលេខ ៣ ហើយក្រុមណាហ្គាវើល ក៏បន្តឈរនៅលេខ ៤ ដូចគ្នា។ ចំពោះ២ក្រុមដែលនៅតំបន់គ្រោះថ្នាក់បាតតារាងមាន វេស្ទើនភ្នំពេញ ឈរលេខ ១១ មាន ១០ ពិន្ទុ ហើយក្រុមគីរីវង់សុខសែនជ័យ ចំណាត់ថ្នាក់លេខ ១២ មាន ៥ ពិន្ទុប៉ុណ្ណោះ៕
បឹងកេតអង្គរ ចាញ់ជាលើកដំបូង ស្របពេលណាហ្គា ឈ្នះហើយស្វាយរៀង ស្មើជាមួយប៉ូលិស
0 Comments