កណ្ដាល ៖ បុរសម្នាក់បានចេញពីផ្ទះទៅដាំកូនឈើ ពេលត្រឡប់មកវិញក៏ចុះងូតទឹកព្រែកខាងក្រោយផ្ទះបណ្ដាលឲ្យលង់ស្លាប់ ព្រឹកឡើងម៉ោង១១ទើបអ្នកជិតខាងរាវរកឃើញសពនៅក្នុងព្រឹកនោះ។
ហេតុការណ៍នេះបានកើតឡើងនៅថ្ងៃទី១៧ ខែកញ្ញា ឆ្នាំ២០១៥នៅចំណុចមាត់ព្រែកខាងក្រោយផ្ទះជនរងគ្រោះ ស្ថិតនៅភូមិស្វាយអំពារ ឃុំស្វាយអំពារ ស្រុកមុខកំពូល ខេត្តកណ្ដាល។
នគរបាលស្រុកមុខកំពូលបានឲ្យដឹងថា ជនរងគ្រោះឈ្មោះចាន់ សុខា ភេទប្រុសអាយុ៣៥ឆ្នាំជនជាតិខ្មែរ មុខរបរកសិករ មានទីលំនៅភូមិស្វាយអំពារ ឃុំស្វាយអំពារ ស្រុកមុខកំពូលខេត្តកណ្តាល។
នគរបាលស្រុកមុខកំពូលបានបន្តទៀតថា នៅថ្ងៃទី១៦ ខែកញ្ញា ឆ្នាំ២០១៥វេលាម៉ោង១៣រសៀល ជនរងគ្រោះបានចេញពីផ្ទះទៅដាំកូនឈើនៅចំណុចចម្ការបណ្ដុះកូនឈើខាងកើតភូមិមុខវត្តស្វាយអំពារជាមួយឈ្មោះអ៊ុន ថេន ឈ្មោះរស់ សុវណ្ណ និងឈ្មោះ កែម ផា។ លុះដល់ម៉ោង១៧ល្ងាចទើបឈប់នាំគ្នាដើរត្រឡប់ទៅផ្ទះបែកគ្នារៀងខ្លួន។
ប្រភពដដែលបន្តទៀតថា នៅថ្ងៃដដែលវេលាម៉ោង១៧និង៣០នាទីឈ្មោះថន សេរីរ័ត្ន ភេទស្រីត្រូវជាប្អូនថ្លៃជនរងគ្រោះបានឃើញជនរងគ្រោះមកដល់ផ្ទះ ហើយឡើងទៅលើផ្ទះផ្លាស់ខោអាវរួចដើរចុះទៅមុជទឹកព្រែកនៅក្រោយផ្ទះចម្ងាយប្រហែល១០ម៉ែត្រ។ ចំណែកឈ្មោះថន សេរីរ័ត្នពុំបានចាប់អារម្មណ៍ រហូតដល់ម៉ោង១៨ល្ងាចក៏បានឡើងទៅលើផ្ទះបាត់តែម្តង ដោយមិនបានមើលបងថ្លៃឡើងពីមុជទឹកទេ។ ម្យ៉ាងទៀតជនរងគ្រោះសម្រាកពេលយប់តែនៅក្នុងអង្រឹងក្រោមផ្ទះទេ។លុះនៅព្រឹកថ្ងៃទី១៧ ខែកញ្ញា ឆ្នាំ២០១៥វេលាម៉ោង៦ព្រឹកឈ្មោះ ចាន់ ប៊ុននី ភេទប្រុស(ប្អូនជនរងគ្រោះបង្កើត) បានឃើញប្រអប់សាប៊ូនៅមាត់កំពង់ តែមិនចាប់អារម្មណ៍ក៏រើសប្រអប់សាប៊ូយកទៅទុកនៅផ្ទះ។ បន្ទាប់មកនៅម៉ោង៩ព្រឹកក៏ចុះទៅមើលមងក្នុងព្រែក បានឃើញស្បែកជើងរបស់បង(ជនរងគ្រោះ)១គូរអណ្ដែតទឹកខាងជើងផ្ទះចម្ងាយប្រហែល១៥ម៉ែត្រ ហើយក៏រើសស្បែកជើងនោះមកទុក និងមានការសង្ស័យក៏ជិះម៉ូតូតាមសួររកឈ្មោះចាន់ សុខាពីមិត្តភ័ក្ដិដែលធ្លាប់ដើរជាមួយគ្នា គេប្រាប់ថាអត់ឃើញទេ។ បន្ទាប់មកក៏ឲ្យឈ្មោះវ៉ាត់ តេ ទូរស័ព្ទទៅជនរងគ្រោះចូលតែពុំមានអ្នកលើកទូរស័ព្ទ រួចជិះម៉ូតូមកផ្ទះវិញដើររកមើលឃើញទូរស័ព្ទជនរងគ្រោះនៅក្នុងហោប៉ៅខោព្យួរនៅមុខផ្ទះកៀនរបងខាងត្បូង។ បន្ទាប់មកនៅម៉ោង១១ព្រឹក អ្នកជិតខាងឈ្មោះរស់ សារ៉េនបានចុះរកក្នុងទឹកកន្លែងកើតហេតុទើបប្រទះឃើញជនរងគ្រោះឈ្មោះចាន់ សុខាលង់ទឹកស្លាប់រួចក៏នាំគ្នាស្រង់សពជនរងគ្រោះមកដាក់លើគ្រែក្រោមផ្ទះតែម្តង។
ក្រោយការពិនិត្យសពឃើញ មានវត្ថុរាវលាយឈាមហូរតាមត្រចៀកខាងស្តាំ និងវត្ថុរាវ(ទឹក)
ហូរចេញតាមច្រមុះនិងមាត់នៅពេលដែលសមត្ថកិច្ចក្រឡាប់សពធ្វើការពិនិត្យ។ ចំណែកស្លាកស្នាមផ្សេងទៀតពុំមានអ្វីកត់សម្គាល់ពាក់ព័ន្ធនឹងបទល្មើសព្រហ្មទណ្ឌឡើយ។
ក្រោយពីធ្វើការពិនិត្យសព រួចម្តាយជនរងគ្រោះឈ្មោះសោម ប៊ុនបានទទួលស្គាល់ថាកូនឈ្មោះចាន់សុខាពិតជាស្លាប់ដោយលង់ទឹកប្រាកដមែន ហើយសមត្ថកិច្ចបានប្រគល់សពជូនក្រុមគ្រួសារធ្វើបុណ្យតាមប្រពៃណីជាតិ៕
មកពីដាំកូនឈើ ចុះងូតទឹកព្រែកត្រូវលង់ស្លាប់ ដោយមានឈាមហូរតាមត្រចៀក
0 Comments