កូរ៉េខាងជើងបាននិយាយកាលពីថ្ងៃចន្ទថា ខ្លួនបានត្រៀមរួចជាស្រេចក្នុងការបាញ់បង្ហោះផ្កាយរណបនៅលើគ្រាប់រ៉ុក្កែតរយៈចម្ងាយឆ្ងាយដើម្បីប្រារព្ធខួបរបស់គណបក្សកុម្មុយនិស្តដែលកំពុងកាន់អំណាចនៅខែក្រោយនេះដែលការធ្វើបែបនេះត្រូវបានគេរំពឹងថា គឺជាសារគំរាមមួយផ្ញើទៅឲ្យគូសត្រូវកូរ៉េខាងត្បូងនិងសហរដ្ឋអាមេរិក។
នាយកនៃការគ្រប់គ្រងការអភិវឌ្ឍអវកាសជាតិបាននិយាយថា កូរ៉េខាងជើងកំពុងបង្កើត “សមិទ្ធផលដ៏ត្រចះត្រចង់” នៅក្នុងវិស័យអភិវឌ្ឍន៍អវកាសនៅមុនថ្ងៃនៃខួបលើកទី៧០ឆ្នាំនៃបក្សពលករ។ នាយកដដែលបាននិយាយថា អ្នកវិទ្យាសាស្ត្រ និងអ្នកបច្ចេកទេសកំពុងជំរុញឆ្ពោះទៅដំណាក់កាលអភិវឌ្ឍន៍ចុងក្រោយសម្រាប់ផ្កាយរណបសង្កេតមើលផែនដីថ្មីនេះដើម្បីទុកជាការព្យាករអាកាសធាតុ។
នាយករូបនេះបានប្រាប់ទីភ្នាក់ងារព័ត៌មាន Korean Central ថា “ការអភិវឌ្ឍន៍លំហអាកាសសម្រាប់គោលបំណងសន្តិភាពគឺជាសិទ្ធិស្របច្បាប់ហើយប្រជាជនកូរ៉េខាងជើងបានតាំងចិត្ដយ៉ាងពេញលេញដើម្បីអនុវត្តសិទ្ធិនេះ”។
ការបាញ់បង្ហោះនេះនឹងក្លាយជាការប្រឈមមុខដាក់គ្នាជាអន្តរជាតិជាមួយនឹងទីក្រុងសេអ៊ូលនិងវ៉ាស៊ីនតោនព្រមទាំងប្រទេសជិតខាងផ្សេងទៀតផងដែរ ដែលបានថ្កោលទោសចំពោះការបាញ់បង្ហោះនាពេលកន្លងមកថា ជាការបន្លំធ្វើតេស្តបច្ចេកវិទ្យាមីស៊ីលរយៈចម្ងាយឆ្ងាយរបស់កូរ៉េខាងជើង។
ជាមួយគ្នានោះក្រសួងការពារជាតិរបស់ប្រទេសកូរ៉េខាងត្បូងបាននិយាយនៅថ្ងៃអង្គារថា ការបាញ់មីស៊ីលរយៈចម្ងាយឆ្ងាយគឺជាការរំលោភបំពានយ៉ាង “ធ្ងន់ធ្ងរ” ដល់សេចក្តីសម្រេចរបស់អង្គការសហប្រជាជាតិ។
បន្ទាប់ពីការបរាជ័យជាច្រើនលើក ប្រទេសកូរ៉េខាងជើងបានដាក់ផ្កាយរណបរបស់ខ្លួនលើកដំបូងចូលទៅក្នុងលំហជាមួយការបាញ់គ្រាប់រ៉ុក្កែតរយៈចម្ងាយឆ្ងាយនៅចុងឆ្នាំ២០១២។អង្គការសហប្រជាជាតិបាននិយាយថា ខ្លួនបានហាមឃាត់ការធ្វើតេស្ដចំពោះបច្ចេកវិទ្យាមីស៊ីលឆ្លងទ្វីបព្រមទាំងបានដាក់ទណ្ឌកម្ម។
ដោយសារតែមានការខឹងសម្បារកូរ៉េខាងជើងបានធ្វើការសាកល្បងអាវុធនុយក្លេអ៊ែរលើកទីបីរបស់ខ្លួននៅក្នុងខែកុម្ភៈ ឆ្នាំ ២០១៣ ដែលបានធ្វើឲ្យមានការថ្កោលទោសកាន់តែខ្លាំងនិងការដាក់ទណ្ឌកម្មកាន់តែតឹងរ៉ឹងពីសំណាក់អន្តរជាតិ។
ទីក្រុងវ៉ាស៊ីនតោនបានយល់ឃើញថា ការខិតខំប្រឹងប្រែងនៃអាវុធនុយក្លេអ៊ែរ និងមីស៊ីលផ្លោងរបស់កូរ៉េខាងជើងគឺជាការគំរាមកំហែងដល់សន្តិសុខពិភពលោកមួយ និងសម្ព័ន្ធមិត្តអាស៊ីរបស់ខ្លួនដូចជា ជប៉ុននិងកូរ៉េខាងត្បូង។
គួរបញ្ជាក់ថា សេចក្តីប្រកាសរបស់កូរ៉េខាងជើងកាលពីថ្ងៃចន្ទបានលើកឡើងពីសញ្ញាចុងក្រោយនៃការសង្ស័យអំពីការកាត់បន្ថយការស្អប់គ្នារវាងកូរ៉េទាំងពីរដែលបានព្រមព្រៀងគ្នារៀបចំការជួបជុំគ្នាវិញ ចំពោះគ្រួសារដែលបំបែកដោយសង្គ្រាមនៅខែក្រោយ។ កូរ៉េទាំងពីរធ្លាប់បានគំរាមកំហែងគ្នាដោយសង្គ្រាមនៅក្នុងខែសីហាដោយសារការផ្ទុះមីនដែលត្រូវបានបន្ទោសទៅលើទីក្រុងព្យុងយ៉ាងដែលបានបណ្ដាលឲ្យពិការទាហានកូរ៉េខាងត្បូងចំនួនពីរនាក់៕
AP
កូរ៉េខាងជើងនឹងបាញ់ផ្កាយរណបដើម្បីប្រារព្ធខួបគណបក្ស
0 Comments