លោកកៅ គឹមហួន រដ្ឋមន្ត្រីប្រតិភូអមនាយករដ្ឋមន្ត្រីបានថ្លែងប្រាប់អ្នកយកព័ត៌មាននៅព្រលានយន្តហោះអន្តរជាតិភ្នំពេញថា មិនមានមហាបាតុកម្មប្រឆាំងនិងដំណើរទស្សនកិច្ចរបស់សម្ដេចតេជោនាយករដ្ឋមន្ត្រី ហ៊ុន សែននៅទីក្រុងញីវយ៉ក ដូចមនុស្សមួយចំនួនបានលើកឡើងនោះទេ គឺមានមនុស្សតែម្នាក់ឬពីរនាក់ប៉ុណ្ណោះ ប៉ុន្តែត្រូវគេបានដាក់ឲ្យនៅឆ្ងាយ ពីទីកន្លែងប្រជុំ ជាមួយបាតុករថៃឡង់ដ៏ និងបាតុករចិនជាដើម។ល។
បន្ទាប់ពីបានអញ្ជើញចូលរួម កិច្ចប្រជុំកំពូលអង្គការសហប្រជាជាតិ ដើម្បីអនុម័តរបៀបវារៈអភិវឌ្ឍន៍ក្រោយឆ្នាំ ២០១៥ ដែលប្រព្រឹត្តទៅនៅទីក្រុងញីវយ៉ក សហរដ្ឋអាមេរិកនោះ នាវេលាម៉ោង ៤និង ១០នាទីរសៀលថ្ងៃទី ២៩ ខែកញ្ញា ឆ្នាំ២០១៥ គណៈប្រតិភូជាន់ខ្ពស់រាជរដ្ឋាភិបាលកម្ពុជា ដឹកនាំដោយសម្ដេចអគ្គមហាសេនាបតីតេជោ ហ៊ុន សែន បានធ្វើមាតុភូមិនិវត្តន៍ប្រកបដោយសុវត្ថិភាពមកដល់កម្ពុជាវិញហើយ តាមជើងយន្តហោះពិសេស។
អញ្ជើញទទួលដំណើរនិវត្តន៍របស់គណៈប្រតិភូជាន់ខ្ពស់ ដល់ព្រលានយន្តហោះអន្តរជាតិភ្នំពេញ មានវត្តមាន សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ លោកឧបនាយករដ្ឋមន្ត្រី សុខ អាន រដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី លោកឧបនាយករដ្ឋមន្ត្រីប្រចាំការ គាត ឈន់ និង ឥស្សរជន សំខាន់ៗមួយចំនួនទៀត។
លោករដ្ឋមន្ត្រីប្រតិភូអមនាយករដ្ឋមន្ត្រីបានឲ្យដឹងទៀតថា ក្នុងឱកាសស្នាក់នៅ ទីក្រុងញីវយ៉ក សហរដ្ឋអាមេរិក សម្ដេចតេជោនាយករដ្ឋមន្ត្រី ក៏បានជួបសម្ភាសន៍ និង អ្នកផលិតខ្សែភាពយន្តនៃក្រុមហ៊ុន Ithaca Film Works ព្រមទាំង ជួបសំណេះសំណាលដោយផ្ទាល់ ជាមួយបងប្អូនជនរួមជាតិខ្មែរចំនួនប្រមាណជាង ២០០នាក់ ដែលកំពុងរស់នៅ សហរដ្ឋអាមេរិក ប្រទេសកាណាដា បារាំងនិងសហព័ន្ធអាល្លឺម៉ង់។ ជាមួយនេះដែរនូវ ក្នុងកិច្ចប្រជុំកំពូលអង្គការសហប្រជាជាតិ ដើម្បីអនុម័តរបៀបវារៈអភិវឌ្ឍន៍ក្រោយឆ្នាំ២០១៥ សម្ដេចតេជោនាយករដ្ឋមន្ត្រី ក៏បានថ្លែងសន្ទរកថាមួយនៅថ្ងៃទី២៦ ខែកញ្ញាឆ្នាំ២០១៥ ក្រោមប្រធានបទ «ការផ្លាស់ប្ដូរពិភពលោកតាមរយៈការសម្រេចបាននូវរបៀបវារៈអភិវឌ្ឍន៍ក្រោយឆ្នាំ២០១៥» និងផ្ដល់នូវចំណុចសំខាន់ៗសម្រាប់ការចូលរួមមតិ នៅថ្ងៃទី២៧ ខែកញ្ញាឆ្នាំ២០១៥នៅក្នុង«កិច្ចប្រជុំប្រមុខដឹកនាំពិភពលោក ស្ដីពីសមភាពយ៉េនឌ័រនិងការលើកកម្ពស់សិទ្ធិអំណាចស្ត្រីៈ ការប្ដេជ្ញាចិត្តឆ្ពោះទៅរកវិធានការ » ផងដែរ។ ជារួមទស្សនកិច្ចរបស់សម្ដេចតេជោ នាយករដ្ឋមន្ត្រី គឺបាននាំមកនូវជោគជ័យសម្រាប់ប្រទេសជាតិ ជាពិសេសសម្រាប់រាជរដ្ឋាភិបាលកម្ពុជា ក្នុងការជំរុញនយោបាយការបរទេសរបស់ប្រទេសកម្ពុជា ក្នុងក្របខណ្ឌពហុភាគី និងបន្តបង្កើនកិត្យានុភាពព្រះរាជាណាចក្រកម្ពុជា ក្នុងឆាកអន្តរជាតិ៕
រដ្ឋមន្ត្រីប្រតិភូអមនាយករដ្ឋមន្ត្រី ៖ ពុំមានមហាបាតុកម្មប្រឆាំងនិងដំណើរទស្សនកិច្ចរបស់សម្ដេចតេជោនៅទីក្រុងញីវយ៉កនោះទេ
0 Comments