កំពង់ស្ពឺ ៖ រថយន្តសង្គ្រោះមួយគ្រឿងជារបស់មន្ទីរពេទ្យបង្អែកខេត្តព្រះសីហនុដឹកមនុស្សទៅសង្គ្រោះ រួចបានបើកលឿនជ្រុលវ៉ាកុងតឺន័រ បណ្ដាលឲ្យធ្លាក់ផ្លូវរងរបួស ទាំងអ្នករបួសស្រាប់ និងអ្នកកំដរ ព្រមទាំងអ្នកបើកបរថែម៤នាក់ទៀត សរុប០៦នាក់ត្រូវសង្គ្រោះទាំងអស់។
ករណីនេះបានកើតឡើងថ្ងៃទី១៥ ខែកញ្ញា ឆ្នាំ២០១៥ វេលាម៉ោង០០និង៣០នាទី លើផ្លូវជាតិលេខ៤ គីឡូម៉ែត្រ៩០-៩១ ចំណុចថ្លុកត្រសេក ស្រុកភ្នំស្រួច ខេត្តកំពង់ស្ពឺ ខណៈរថយន្តសង្គ្រោះបានបើកវ៉ាជែងជាមួយឡានកុងតឺន័រ រួចបានរេចង្កូតបុកគល់ឈើក្រឡាប់។ រថយន្តនោះត្រូវបានគេដឹងថា ជារថយន្តសង្គ្រោះរបស់មន្ទីរពេទ្យបង្អែកខេត្តព្រះសីហនុពាក់ស្លាកលេខរដ្ឋ12 2.0912។
តាមសមត្ថកិច្ចនៅគោលដៅខាងលើបានឲ្យដឹងថា រថយន្តនោះជិះគ្នា៦នាក់ ក្នុងនោះត្រូវបានគេដឹងថាមានអ្នកជំងឺស្រាប់២នាក់ និងអ្នករួមដំណើរ៤នាក់។
សាក្សីបានឲ្យដឹងថា រថយន្តស៊ីរ៉ែននេះបានបើកពីទិសដៅពីលិចទៅកើត ដល់ចំណុចខាងលើ បានវ៉ារថយន្តកុងតឺន័រ១គ្រឿង រួចជ្រុលចង្កូតទៅឆ្វេងដៃបុកដើមឈើ បណ្ដាលឲ្យរងរបួសទាំងអស់គ្នា ក្នុងនោះមានម្នាក់ធ្ងន់ជាងគេ។
តាមការសន្និដ្ឋាន និងសាក្សីឃើញហេតុការណ៍បានឲ្យដឹងថា អ្នកបើករថយន្តពេទ្យហាក់បើកបរក្នុងស្ថានភាពប្រថុយប្រថាន ខណៈមេឃកំពុងភ្លៀងបណ្ដាលឲ្យឡានរអិលបង្កការគ្រោះថ្នាក់បែបនេះ។ នេះជាទង្វើមិនសមរម្យ ពីព្រោះអាចបង្កដល់មនុស្សដែលកំពុងធ្វើដំណើរផ្សេងទៀត។ ដូច្នេះទាមទារឲ្យអង្គភាពរថយន្តពេទ្យដាក់បទបញ្ជាឲ្យបានតឹងរ៉ឹងជាងនេះ ដោយសារកន្លងមកក៏មានរថយន្តប្រភេទនេះបុករះម៉ូតូ និងមនុស្សជាច្រើនផងដែរ៕
រថយន្តសង្គ្រោះបើកលឿនធ្លាក់ផ្លូវ រងរបួសទាំងអ្នកជំងឺ និងអ្នកកំដរ
0 Comments