ភ្នំពេញ ៖ ទីតាំងហ្គេមបាញ់ត្រីមួយកន្លែង ដែលមានក្មេងៗចូលលេងច្រើន និងជាល្បែងមួយដែលរដ្ឋអំណាចហាមឃាត់ផងនោះ មកដល់ពេលនេះ ត្រូវបានកម្លាំងអាជ្ញាធរខណ្ឌពោធិ៍សែនជ័យចុះទៅបង្ក្រាបជាក់ស្ដែង ដោយបានរឹបអូសយកទូហ្គេម និងសម្ភារៈមួយចំនួនទៀត ព្រមទាំងហៅម្ចាស់មកអប់រំ។
ប្រតិបត្តិការនេះបានធ្វើឡើងកាលពីវេលាម៉ោង១០និង១០នាទីព្រឹកថ្ងៃទី២៩ ខែកញ្ញា ឆ្នាំ២០១៥ នៅក្នុងភូមិព្រៃព្រីងខាងជើង សង្កាត់ចោមចៅ ខណ្ឌពោធិ៍សែនជ័យ។
ម្ចាស់ទីតាំងមានឈ្មោះវ៉ែន ពេជ្រ ភេទប្រុស អាយុ៣៧ឆ្នាំ ស្នាក់នៅក្នុងភូមិកើតហេតុ។សមត្ថកិច្ចដកហូតបានទូហ្គេមចំនួនបីគ្រឿង ម៉ូតូចំនួនបីគ្រឿង ទូរទស្សន៍ចំនួនមួយគ្រឿង។
តាមសមត្ថកិច្ចបានឲ្យដឹងថា ដោយសារមានប្រជាពលរដ្ឋរាយការណ៍ថាមានគេដាក់ទូហ្គេមដោយគ្មានច្បាប់ត្រឹមត្រូវ និងមានក្មេងៗជាកូនសិស្សចូលលេងច្រើនប៉ះពាល់ដល់ការសិក្សារបស់ពួកគេ ទើបអាជ្ញាធរខណ្ឌពោធិ៍សែនជ័យដឹកនាំដោយលោកឃឹមស៊ុនសូដា អភិបាលរងខណ្ឌចុះទៅបង្ក្រាបជាក់ស្ដែងនៅពេលនោះតែម្ដង។
ប្រជាពលរដ្ឋក្នុងមូលដ្ឋានបានរិះគន់ទៅសមត្ថកិច្ចនគរបាលប៉ុស្តិ៍ចោមចៅហាក់លាក់ទុកមិនព្រមរាយការណ៍បង្ក្រាបនោះទេ ទុកសម្រាប់ចិញ្ចឹមឆ្នាំងបាយព្រោះថាទីតាំងនៅជិតប៉ុស្តិ៍ តែគេមិនបង្ក្រាបនោះឡើយ៕
អាជ្ញាធរខណ្ឌពោធិ៍សែនជ័យបង្ក្រាបទីតាំងហ្គេមបាញ់ត្រី
0 Comments