ភ្នំពេញ ៖ លោកប៉ា សុជាតិវង្សអភិបាលនៃគណៈអភិបាលរាជធានីភ្នំពេញបានមានប្រសាសន៍លើកឡើងថា ដំណើរការអភិវឌ្ឍរាជធានីភ្នំពេញពិតជាមិនអាចកាត់ផ្ដាច់ចេញពីជំនួយពីមិត្តបរទេសដែលជាប្រទេសជាមិត្តនោះទេ។ ការលើកឡើងរបស់លោកប៉ា សុជាតិវង្សនេះត្រូវបានធ្វើឡើងក្នុងឱកាសជួបសំណេះសំណាលជាមួយឯកអគ្គរដ្ឋទូតអង់គ្លេសប្រចាំកម្ពុជាលោកWilliamBillLonghurstកាលពីព្រឹកថ្ងៃទី២៩ ខែកញ្ញានេះនៅសាលារាជធានីភ្នំពេញ។
លោកអភិបាលបន្តថា នៅរាជធានីភ្នំពេញ យើងចាំបាច់ត្រូវតែគិតពីស្ថិរភាពនយោបាយ បើភ្នំពេញអស្ថិរភាពនយោបាយវានឹងប៉ះពាល់ដល់ទូទាំងប្រទេសដែលធ្វើឲ្យសង្គមច្របូកច្របល់ប្រជាពលរដ្ឋបាត់ជំនឿអ្នកវិនិយោគ និងទេសចរណ៍ពិតជាមិនហ៊ានចូលគឺជាគ្រោះថ្នាក់សម្រាប់ជាតិ។ ដូច្នេះយើងត្រូវប្រឹងប្រែងរក្សាឲ្យបានបញ្ហាសន្តិសុខ សណ្ដាប់ធ្នាប់ក្នុងទីក្រុង។
ក្រៅពីនេះលោកអភិបាលក៏បានលើកឡើងពីបញ្ហាប្រឈមចំនួន៧ចំណុចដែលសាលារាជធានីភ្នំ ពេញកំពុងតែខិតខំអនុវត្តទាំងសន្តិសុខ សណ្ដាប់ធ្នាប់ បញ្ហាចរាចរណ៍ ការកសាងផ្លូវ ប្រព័ន្ធលូ បញ្ហាបរិស្ថាន ក៏ដូចជាបញ្ហាសហគមន៍ក្រីក្រជាដើម។
លោកWilliam Bill Longhurst មានប្រសាសន៍ថា អ្នកទេសចរបរទេសតែងនិយាយថាពេលមកកម្ពុជាគេត្រូវតែទៅដល់ប្រាសាទអង្គរវត្តនៅខេត្តសៀមរាប។ ប៉ុន្តែគេមិនត្រូវភ្លេចរាជធានីភ្នំពេញដែលកំពុងតែមានភាពទាក់ទាញនេះទេ។ លោកឯកអគ្គរដ្ឋទូតបានកត់សំគាល់ថា នៅប៉ុន្មានឆ្នាំចុងក្រោយនេះរាជធានីភ្នំពេញមានការអភិវឌ្ឍយ៉ាងខ្លាំងទាំងវិស័យសំណង់ និងការអភិរក្សបេតិកភណ្ឌ វប្បធម៌ដែលមានក្នុងរាជធានីភ្នំពេញ។ ជាមួយគ្នានេះលោកក៏បានសំណូមពរដល់អាជ្ញាធររាជធានីភ្នំពេញឲ្យជួយទប់ស្កាត់ និងបង្ក្រាបឲ្យមានប្រសិទ្ធភាពចោរឆក់សម្ភារៈជនបរទេសដែលក្នុងនោះក៏មានជនជាតិអង់គ្លេសផងដែរ ហើយស្ថានទូតតែងជួយសម្រួលបែបបទដល់ពូកគេជាច្រើនករណី៕
ការអភិវឌ្ឍរាជធានីភ្នំពេញឲ្យមានការរីកចម្រើនមកដល់ពេលនេះគឺមិនអាចកាត់ផ្ដាច់ពីមិត្តបរទេសនោះទេ
0 Comments