សភាជាន់ខ្ពស់របស់ជប៉ុនបានអនុម័តច្បាប់ដែលផ្តល់អំណាចបន្ថែមទៀតដល់កងកម្លាំងប្រដាប់អាវុធ។ វាបានរួមបញ្ចូលទាំងការអនុញ្ញាតឲ្យយោធាដើម្បីទៅប្រយុទ្ធប្រឆាំងនៅក្រៅប្រទេសផងដែរដែលជាអ្វីត្រូវបានហាមឃាត់៧០ឆ្នាំមកហើយចាប់តាំងពីសង្គ្រាមលោកលើកទីពីរ។
សម័យប្រជុំចុងក្រោយរបស់សភាជាន់ខ្ពស់បានកោះហៅកាលពីយប់ថ្ងៃសុក្រនឹងបានបញ្ចប់នៅព្រឹកថ្ងៃសៅរ៍ជាមួយនឹងការអនុម័តនៃសេចក្តីព្រាងច្បាប់សន្តិសុខដ៏ចម្រូងចម្រាសចំនួនពីរ។
លោកនាយករដ្ឋមន្ត្រីជប៉ុនស៊ីនហ្សូ អាបេដែលកំពុងកាន់អំណាចបាននិយាយថា ប្រទេសជប៉ុនចាំបាច់ត្រូវដោះស្រាយបញ្ហាប្រឈមក្នុងពិភពលោកសព្វថ្ងៃនេះដូចជា ការកើនឡើងនៃការគម្រាមកំហែងពីសំណាក់ប្រទេសចិន។
សភាជាន់ទាបបានអនុម័តសេចក្តីព្រាងច្បាប់នេះនៅថ្ងៃទី១៦ ខែកក្កដាដែលជាទង្វើមួយត្រូវបានអមដោយរលកនៃការតវ៉ានៅទូទាំងប្រទេសនេះ។ កិច្ចពិភាក្សាជាក្រុមមួយនៅក្នុងសភាកាលពីថ្ងៃព្រហស្បតិ៍ត្រូវបានចលាចលដោយសារតែការប្រវាយប្រតប់គ្នា។
ច្បាប់នេះគឺមានជាប់ទាក់ទងជាមួយនឹងច្បាប់សន្តិសុខចំនួន១០ដែលបច្ចុប្បន្នចូលជាធរមាន។ ឥឡូវនេះជប៉ុននឹងមានសិទ្ធិរដ្ឋធម្មនុញ្ញដាក់ពង្រាយកងទ័ពនៅបរទេសនិងជាជំនួយក្នុងអំឡុងពេលប្រតិបត្តិការយោធាដែលពាក់ព័ន្ធនឹងកម្លាំងបរទេស ឬចម្រុះជាតិសាសន៍នៅក្នុងករណីដែលប្រទេសជប៉ុនប្រឈមនឹង “ការគម្រាមកំហែងការរស់នៅរបស់ខ្លួន”។ ការផ្លាស់ប្ដូរនេះអាចបង្ខំឲ្យប្រទេសជប៉ុនចូលទៅក្នុងជម្លោះដែលដឹកនាំដោយអាមេរិក។
ទោះបីជាយ៉ាងណាក៏ដោយ ភាគច្រើននៃប្រជាជនរបស់ប្រទេសជប៉ុនបានប្រឆាំងចំពោះការអនុម័តច្បាប់យោធានិយមនេះ។ ការស្ទង់មតិរបស់ប្រព័ន្ធផ្សព្វផ្សាយមួយដែលបានចេញផ្សាយដោយកាសែត Asahi Shimbun នៅថ្ងៃចន្ទបានបង្ហាញថា មានអ្នកឆ្លើយសំណួរចំនួន៥៤ភាគរយបានប្រឆាំងនឹងច្បាប់នេះដោយមានត្រឹមតែ២៩ភាគរយប៉ុណ្ណោះដែលពេញចិត្ត។
គួរបញ្ជាក់ថា សេចក្តីព្រាងច្បាប់ដែលមិនមានប្រជាប្រិយភាពនេះបានបង្កឲ្យមានរលកនៃកំហឹងក្នុងចំណោមជនជាតិជប៉ុនដែលនៅតែប្រកាន់គោលនយោបាយប្រកបដោយសន្តិភាព។ មនុស្សរាប់ពាន់នាក់បានចេញមកតាមដងផ្លូវនៅក្នុងទីក្រុងតូក្យូកាលពីថ្ងៃអាទិត្យមុនដោយបានកាន់បដាសរសេរថា “សង្គ្រាមគឺចប់ហើយ” ឬ “សន្តិភាពមិនមានសង្គ្រាម”។ ដោយឡែកបាតុកម្មដ៏ខ្លាំងក្លាមួយដែលមានមនុស្សចូលរួមចំនួន១២០០០០នាក់ក៏ត្រូវបានធ្វើឡើងផងដែរកាលពីខែមុន៕
RT
សភារបស់ប្រទេសជប៉ុនសម្រេចអនុម័តសេចក្តីព្រាងច្បាប់សន្តិសុខ
0 Comments