ប្រដាល់ ៖ អ្នកប្រដាល់ជើងខ្លាំងរបស់កម្ពុជា បឺត ខាំ ក្លិបសាលវ័ន្តកីឡា និងពេជ្រ សីហា អ្នកប្រដាល់សមាគមក្រសួងការពារជាតិប្រកួតឈ្នះអ្នកប្រដាល់ថៃទាំងពីរនាក់ក្នុងព្រឹត្តិការណ៍ជម្រុះដណ្ដើមខ្សែក្រវាត់ខារ៉ាបាវវគ្គII ទម្ងន់៦៩គីឡូក្រាមជុំចុងក្រោយ កាលពីយប់ថ្ងៃអាទិត្យ ទី២៧ ខែកញ្ញា ឆ្នាំ២០១៥ នៅលើសង្វៀនបាយ័នស្ទឹងមានជ័យ។
បឺត ខាំ បានវាយឈ្នះអ្នកប្រដាល់ Watcharalek OR. Kwanmueng ដោយពិន្ទុទាំងប្រផឹតប្រផើយក្នុងការប្រកួតគ្នាប្រាំទឹកពេញនោះ។ ជ័យជំនះរបស់ បឺត ខាំ នេះ បានធ្វើឲ្យគេរក្សាភាពឈ្នះមិនដែលចាញ់ក្នុងជម្រុះខ្សែក្រវាត់ខារ៉ាបាវវគ្គIIនេះ ដោយ៤ប្រកួត ឈ្នះទាំង៤ប្រកួត បាន១២ពិន្ទុ។ ចំណែក Watcharalek ដែលឈ្នះ៣ប្រកួតជាប់ៗគ្នាកន្លងមក ពេលនេះគេស្គាល់ការចាញ់ម្តងហើយ ក្នុង៤ប្រកួតដោយបាន១០ពិន្ទុ។ ទោះជាយ៉ាងណា Watcharalek ក៏នៅតែបានឡើងទៅពាក់កណ្ដាលផ្ដាច់ព្រ័ត្រដែរ ព្រោះក្នុងអ្នកប្រដាល់ថៃ៤រូប គឺមានតែ Watcharalek ដែលមានពិន្ទុលើគេ។
ពេជ្រ សីហា អ្នកប្រដាល់ជើងខ្លាំងរបស់កម្ពុជា ក៏ប្រកួតឈ្នះអ្នកប្រដាល់ថៃ Jongangfight Luk. Champachai ដោយពិន្ទុដែរ ក្រោយពីប្រកួតគ្នា៥ទឹកពេញនោះ។
Jongangfight នេះមិនដឹងថាបានឡើងឬអត់នោះទេ? ព្រោះ៤ប្រកួត ឈ្នះ១ ចាញ់២ប្រកួត បាន៥ពិន្ទុ គឺរង់ចាំអ៊ុតមើលគ្នាគេពីរនាក់ទៀតដែលប្រកួតនៅសប្ដាហ៍ក្រោយជាមួយ ឡៅ ស៊ីណាត និងវង្ស ណយនោះ។
ចំពោះ ពេជ្រ សីហា វិញ ទោះបីជាឈ្នះ Jongangfight នេះក្តី ក៏មិនបានឡើងដែរ ព្រោះគេចាញ់ពិន្ទុ ឡៅ ស៊ីណាត ក្នុងពេលដែល ស៊ីណាត ប្រកួតលើកក្រោយនោះ គេដឹងថាឈ្នះដោយស្វ័យប្រវត្តិបាត់ទៅហើយ ព្រោះដៃគូរបស់បោះបង់ការប្រកួតទៅហើយនោះ។ នេះតាមលោក ឯម ចាន់សុផល អ្នកផ្គូផ្គងកីឡាករឲ្យដឹង។
ចំពោះអ្នកប្រដាល់ជើងខ្លាំងវ័យក្មេងរបស់កម្ពុជា ឡៅ ចន្ទ្រា ក្លិបកងពលតូចទ័ពឆ័ត្រយោង៩១១ ឡើងប្រកួតលើកនេះ ជួបសំណាងអាក្រក់មិនធ្លាប់ដែលមានកន្លងមក ដោយត្រូវអ្នកប្រដាល់ថៃ Kaophong Chaiphumវាយឲ្យសន្លប់ក្នុងទឹកទី២។ នេះជាការបរាជ័យលើកទី៣របស់ ឡៅ ចន្ទ្រាហើយ ក្នុងប្រវត្តិប្រកួតរបស់គេជាង៥០លើក កន្លងមកនេះ។
ចំពោះអ្នកប្រដាល់ ផល សោភ័ណ្ឌ ក្លិបតាឡីដំរីមានរិទ្ធ គេបានផ្ដួលអ្នកប្រដាល់ថៃKhun Phen Keajpetch Noy ជើងខ្លាំងមកពីប្រទេសថៃឲ្យសន្លប់ក្នុងទឹកទី២វិញ។
*ជម្រុះខ្សែក្រវាត់LEOជុំទី៦
ប្រដាល់ ៖ ក្នុងការប្រកួតជម្រុះជុំទី៦ ឈានទៅដណ្ដើមខ្សែក្រវាត់Leo ទម្ងន់៦៧គីឡូក្រាម នៅលើ សង្វៀនបាយ័នបឹងស្នោនេះដែរ វី សេរីចាន់ឌីន អ្នកប្រដាល់ក្លិបខ្លារខិនមានរិទ្ធ បានបំបាក់ សល់ ប៊ុនហ៊ូវ អ្នកប្រដាល់ក្លិបកុសលកីឡាឲ្យបោះបង់ចោលការប្រកួតក្នុងទឹកទី២។ ជាមួយជ័យជំនះនេះ ធ្វើឲ្យ៦ប្រកួតរបស់ សេរី ចាន់ឌីន ឈ្នះ៣ ចាញ់៣ប្រកួត មាន១២ពិន្ទុ។ ឯ សល់ ប៊ុនហ៊ូវ ៦ប្រកួតដូចគ្នា ចាញ់ទាំង៦ប្រកួតមាន៦ពិន្ទុ ត្រូវជ្រុះធ្លាក់ ហើយទោះបីនៅសល់មួយប្រកួតទៀតក្តី។
ចំពោះការប្រកួតជម្រុះមួយគូទៀតនោះ អ្នកប្រដាល់ ពុទ្ធ ផនកុសល ក្លិបពុទ្ធសេរីវង្សកីឡា ប្រកួតឈ្នះអ្នកប្រដាល់ ធា នុរាជ ក្លិបពោធិជ័យកីឡាដោយពិន្ទុ។
ពុទ្ធ ផនកុសល ប្រកួតឈ្នះ ធា នុរាជ នេះ បានធ្វើឲ្យ៦ប្រកួតរបស់គេឈ្នះ៤ ចាញ់២ប្រកួត មាន១៤ពិន្ទុ ហើយ ធា នុរាជ ៦ប្រកួត ឈ្នះ២ ចាញ់៤ប្រកួត មាន១០ពិន្ទុ។
*ឡេះ តើក ផ្តួល ឯម ខ្លឹមខ្មៅទឹក២
ប្រដាល់ ៖ ឡេះ តើក អ្នកប្រដាល់ក្លិបពុទ្ធសេរីវង្សកីឡា ដែលធ្លាប់ចាញ់ក្រោមកណ្ដាប់ដៃរបស់ ឯម ខ្លឹមខ្មៅ ចំនួន៣លើកកន្លងមកនោះ លើកនេះគេបានទូទាត់បំណុលជ្រះស្រឡះហើយដោយគេបានផ្ដួលខ្លឹមខ្មៅឲ្យបោះបង់ការប្រកួតក្នុងទឹកទី២ ក្នុងការជួបគ្នានៅលើសង្វៀនបាយ័នបឹងស្នោនាល្ងាចថ្ងៃអាទិត្យ ទី២៧ ខែកញ្ញា ឆ្នាំ២០១៥។
អាចថា ឡេះ តើក គេដឹងពីចំណុចខ្សោយរបស់ ឯម ខ្លឹមខ្មៅ ដែលមានបញ្ហាសន្លាក់ជង្គង់ខាងស្តាំនោះ ទើបគេព្យាយាមទាត់ជើងរបស់ខ្លឹមខ្មៅ រហូតទាល់តែខ្លឹមខ្មៅដួលក្រោកលែងរួច។
តាំងមុនការប្រកួតម្ល៉េះ ដែលគ្មានអ្នកណាមានជំនឿទុកចិត្តថា ឯម ខ្លឹមខ្មៅ ឈ្នះ ឡេះ តើក នោះទេ ព្រោះមួយខ្លឹមខ្មៅឈឺសន្លាក់ជើងស្តាំនោះ ឲ្យតែគេទាត់ត្រូវចំកន្លែងហ្នឹង គឺដឹងតែខ្លឹមខ្មៅចាញ់បាត់ទៅហើយ។
ខឹក សុខឿន អ្នកប្រដាល់ក្លិបកងពលតូចទ័ពឆ័ត្រយោង៩១១ ត្រូវ ចាន់ ចំរើន អ្នកប្រដាល់ក្លិបនិរោធមានជ័យ វាយកែងត្រូវពីក្រោយក្បាល ធ្វើឲ្យគេសន្លប់ក្នុងទឹកទី១។ ប៉ុន្តែ គេ(សុខឿន) ជាអ្នកទទួលជ័យជំនះ ដោយ ចំរើន វាយខុសលក្ខន្តិកៈប្រកួត តម្រូវឲ្យចាញ់ដោយស្វ័យប្រវត្តិ។
ឌឹម សារិទ្ធ អ្នកប្រដាល់វាយដាក់ទ្រុងនៃក្លិបមជ្ឈមណ្ឌលកីឡា ខ.ភ.ម បានវាយឈ្នះ ជួប ជាង ក្លិបនិរោធមានជ័យដោយពិន្ទុ។ អ្នកប្រដាល់ទាំងពីរនេះប្រកួតគ្នាជាលក្ខណៈក្បាច់គុនចម្រុះ។
ក្នុងការប្រកួតប្រដាល់ក្បាច់បុរាណខ្មែរ (ប្រដាល់សេរី) សារិទ្ធ វាយចាញ់ ជួប ជាង ដោយពិន្ទុកាលពីពេលកន្លងមក តែលើកនេះប្រកួតក្បាច់គុនចម្រុះ ដែលអាចបោក និងក្លេរបាននោះ សារិទ្ធឈ្នះជួប ជាង ដាច់តែម្តង ដោយចាប់បោក ជួប ជាង ឡើង ចង់ទក់សាច់ទៅហើយ។ ហើយបើក្រៅពីជួប ជាងនោះ ក៏ប្រហែលជាមិនអាចទប់ សារិទ្ធ បានប្រាំទឹកនោះដែរ។ ចំណែក យ៉ុន ដារ័ត្ន ក្លិបតាឡីដំរីមានរិទ្ធ ត្រូវ សង់ គង់ ក្លិបអេភូថងកីឡា វាយឲ្យសន្លប់ក្នុងទឹកទី២។
*យុគ យក្សផ្លែ ចាញ់ ម៉ន លីហួរ ខណៈ គួន ប៊ុនហ៊ីម សងសឹក ជុន សាវុធ អត់បានសម្រេច
ប្រដាល់ ៖ យុគ យក្សផ្លែ អ្នកប្រដាល់ក្លិបអប់រំកាយកីឡាខេត្តបាត់ដំបងប្រកួតចាញ់ ម៉ន លីហួរ អ្នកប្រដាល់ក្លិបការិយាល័យទី៥កងទ័ពជើងគោកដោយពិន្ទុ កាលពីល្ងាចថ្ងៃទី២៦ ខែកញ្ញា ឆ្នាំ២០១៥ នៅលើសង្វៀនបាយ័នស្ទឹងមានជ័យ។
អ្នកប្រដាល់ទាំងពីរនាក់នេះប្រកួតគ្នា៥ទឹកពេញ ប៉ុន្តែ ម៉ន លីហួរ គេមានប្រៀបលើយក្សផ្លែត្រង់គេវាយចំគោលដៅច្រើនជាង។
គួន ប៊ុនហ៊ីម អ្នកប្រដាល់ក្លិបពន្លឺសាមគ្គីខេត្តបាត់ដំបង ដែលឡើងជម្រះបញ្ជី ជុន សាវុធ អ្នកប្រដាល់ក្លិបពោធិជ័យកីឡានោះ ក្រោយបញ្ចប់ការប្រកួតនៅតែចាញ់សាវុធ ដោយពិន្ទុដដែល។
យ៉ាម ឡយ អ្នកប្រដាល់ក្លិបរស្មីកុមារកំព្រាប្រកួតឈ្នះ បូរី កល្យាណ អ្នកប្រដាល់ក្លិបបូរីគុនខ្មែរក្នុងទឹកទី៣ ខណៈដែល ចាន់ គឹមលន់ អ្នកប្រដាល់ក្លិបនិរោធមានជ័យប្រកួតឈ្នះ លី សារ៉ន អ្នកប្រដាល់ក្លិបសុភានូមានជ័យដោយពិន្ទុ៕
បឺត ខាំ ,ពេជ្រ សីហា និងផល សោភ័ណ្ឌ ឈ្នះ ខណៈឡៅ ចន្ទ្រា ចាញ់ថៃ
0 Comments