ភ្នំពេញ ៖ រហូតមកដល់ពេលនេះកម្ពុជាបានផ្តល់អត្តសញ្ញាប័ណ្ណគំរូថ្មីដល់ប្រជាពលរដ្ឋប្រមាណជាងជាង៥៥០០០០០សែននាក់ ហើយគ្រោងនឹងបញ្ចប់នៅក្នុងចុងឆ្នាំ២០១៨ខាងមុខ។
កម្ពុជាបានចាប់ផ្តើមកំណត់អត្តសញ្ញាណពលរដ្ឋរបស់ខ្លួនចាប់តាំងពីចំណុចសូន្យ ក្រោយសម័យ ប៉ុលពត។ ក្នុងរយៈពេលប៉ុន្មានចុងក្រោយនេះរាជរដ្ឋាភិបាល និងក្រសួងមហាផ្ទៃបានសម្រេចកែ ទម្រង់ធ្វើអត្តសញ្ញាណប័ណ្ណគំរូថ្មីជូនប្រជាពលរដ្ឋខ្មែរប្រើប្រាស់ ហើយមកដល់ពេលនេះអគ្គនាយកដ្ឋានអត្តសញ្ញាណកម្មក្រសួងមហាផ្ទៃបានកំពុងខិតខំបោះពុម្ពអត្តសញ្ញាណប័ណ្ណគំរូថ្មីជូនដល់ប្រជាពលរដ្ឋបានប្រមាណជាង៥៥០០០០០នាក់រួចហើយ ហើយកំពុងបានខិតខំបន្តដើម្បីសម្រេចគោលដៅឲ្យហើយក្នុងនៅចុងឆ្នាំ ២០១៨ខាងមុខ។
ក្រៅពីនេះប្រទេសកម្ពុជាបានចាប់ផ្ដើមពិនិត្យឡើងវិញ លើប្រព័ន្ធចុះបញ្ជីអត្រានុកូលដ្ឋាន និងអត្តសញ្ញាណកម្មជាលើកដំបូង ដើម្បីធ្វើទំនើបកម្មប្រព័ន្ធទាំងនេះឲ្យមានស្តង់ដារ។
ពាក់ព័ន្ធនឹងការពិនិត្យឡើងវិញលើប្រព័ន្ធចុះបញ្ជីអត្រានុកូលដ្ឋាន និងអត្តសញ្ញាណកម្មនេះដែរកាលពីល្ងាចថ្ងៃទី២២ ខែកញ្ញាក្រសួងមហាផ្ទៃ សហការជាមួយក្រសួងសុខាភិបាល ក្រសួងផែនការនិងអង្គការពាក់ព័ន្ធនានា បានបើកកិច្ចពិភាក្សារៀបចំសេចក្ដីព្រាងផែនការយុទ្ធសាស្ត្រជាតិរយៈពេល១០ឆ្នាំ ស្ដីពីការងារអត្តសញ្ញាណកម្មនៅកម្ពុជា។
នាយឧត្តមសេនីយ៍ម៉ៅ ច័ន្ទតារាអគ្គនាយក អគ្គនាយកដ្ឋានអត្តសញ្ញាណកម្មក្រសួងមហាផ្ទៃមានមានប្រសាសន៍ថា ការរៀបចំផែនការយុទ្ធសាស្ត្រនេះមានគោលដៅបង្កើតប្រព័ន្ធ អត្តសញ្ញាណមួយដែលមានលក្ខណៈ រួមបញ្ចូល ដែលត្រូវធានាបានថា មានប្រភពព័ត៌មានពីបុគ្គល និងពីប្រជាពលរដ្ឋ ដែលជឿទុកចិត្តតែមួយនៅក្នុងប្រទេស ហើយវាត្រូវបានគេស្នើឡើងថា បុគ្គលម្នាក់នឹងទទួលបានលេខកូដ សំគាល់អត្តសញ្ញាណបុគ្គលនៅពេលចុះសំបុត្រកំណើត និងបន្តប្រើប្រាស់លេខកូដនេះ ពេញមួយជីវិតរបស់គេ។ លោកបន្តថា «គ្រប់លេខកូដកំណត់អត្តសញ្ញាណពលរដ្ឋខ្មែរនោះ នឹងអាចត្រូវបានគេប្រើប្រាស់សម្រាប់កំណត់អត្តសញ្ញាណ សម្រាប់ប្រើប្រាស់ក្នុងទទួលសេវាណាមួយទាំងផ្នែកស្ថាប័នរដ្ឋ និងស្ថាប័នឯកជន»។
លោកព្រុំ សុខារដ្ឋលេខាធិការក្រសួងមហាផ្ទៃលើកឡើងនៅក្នុងកិច្ចប្រជុំនៅសណ្ឋាគារ ភ្នំពេញថា « នេះជាលើកទី១ ដែលកម្ពុជាបានចាប់ផ្តើមពិនិត្យឡើងវិញលើប្រព័ន្ធចុះបញ្ជីអត្រានុកូលដ្ឋាន និងអត្តសញ្ញាណកម្ម ដើម្បីធ្វើទំនើបកម្ម ប្រព័ន្ធទាំងនេះឲ្យមានស្តង់ដារ ហើយផែនការយុទ្ធសាស្ត្រនេះក្នុងរយៈពេល១០ឆ្នាំទៀត ពលរដ្ឋខ្មែរគ្រប់រូប ឬបុគ្គលគ្រប់រូបត្រូវបានកំណត់អត្តសញ្ញាណ»។
លោកព្រំ សុខាបានមានប្រសាសន៍បន្តថា ជាទូទៅប្រព័ន្ធនៃការចុះបញ្ជីអត្រានុកូលដ្ឋាន ការចុះបញ្ជីស្នាក់នៅ បានប្រើប្រាស់ចុះបញ្ជីដោយដៃ និងបានអនុវត្តដោយស្ថាប័នផ្សេងៗគ្នាដែលមិនអាចឲ្យមានការភ្ជាប់ និងផ្ទៀងផ្ទាត់ទិន្នន័យប្រជាពលរដ្ឋបានជាហេតុធ្វើឲ្យកម្ពុជាមិនអាចធានាបាននូវការកំណត់អត្តសញ្ញាណប្រជាពលរដ្ឋបានទាំងស្រុងឡើយ។ ទិន្នន័យពលរដ្ឋខ្មែរជាច្រើននាក់ ដែលមាននៅក្នុងបញ្ជីអត្រានុកូលដ្ឋាន សៀវភៅស្នាក់នៅ សៀវភៅគ្រួសារ អត្តសញ្ញាណប័ណ្ណ និងឯកសារផ្សេងៗបានសរសេរឡើងខុសៗគ្នាដែលបញ្ហានេះបណ្ដាលមកពីសាមីខ្លួន ឬអាចបណ្តាលមកពីកំហុសរដ្ឋបាលរបស់មន្ត្រីទទួលបន្ទុក៕
កម្ពុជាបានផ្តល់អត្តសញ្ញាណកម្មគំរូថ្មីជាង៥៥០០០០០នាក់ដល់ប្រជាពលរដ្ឋ
0 Comments