ភ្នំពេញ៖ ជនសង្ស័យប្រុសស្រី ចំនួន១៤នាក់ ត្រូវបានកម្លាំងកងរាជអាវុធហត្ថ រាជធានីកសាងសំនុំរឿង ចាត់បញ្ជូនទៅសាកសួរនៅសាលាដំបូងរាជធានី ជាបន្តនៅព្រឹកនេះបន្ទាប់ពីសមត្ថកិច្ចការិយាល័យ ជំនាញប្រឆាំងគ្រឿងញៀនកងរាជអាវុហត្ថរាជធានីភ្នំពេញ និងអាវុធ
ហត្ថខ័ណ្ឌ៧មករា និងខ័ណ្ឌច្បារអំពៅ បានចេញប្រតិបត្តិការ ចុះបង្ក្រាបជាបន្តបន្ទាប់ ពាក់ព័ន្ធការប្រើប្រាស់ និងចែកចាយក្នុងរយៈពេល៣ថ្ងៃ គិតចាប់តាំងពីថ្ងៃទី២ រហូតដល់ថ្ងៃទី៥ខែកញ្ញាឆ្នាំ២០១៥កន្លងមកថ្មីៗនេះ។
សមត្ថកិច្ចអាវុធហត្ថការិយាល័យប្រឆាំងគ្រឿងញៀន រាជធានីបានបញ្ជាក់ថា កាលពីវេលាម៉ោង១០និង៣០នាទី ថ្ងៃទី៦ខែកញ្ញា២០១៥ថា ជនសង្ស័យសរុបទាំង១៤នាក់ ស្រី៣នាក់ ដែលត្រូវបានអាវុធហត្ថការិយាល័យជំនាញ និងអាវុធហត្ថខ័ណ្ឌខាងលើឃាត់ខ្លួន ពាក់ព័ន្ធករណីប្រើប្រាស់និងចែកចាយគ្រឿងញៀន យ៉ាងសកម្មនៅចំនុចខាងលើ និងខ័ណ្ឌដទៃទៀត ដែលសកម្មភាពរបស់ពួកគេហាក់បីដូចជាផ្គើននឹងសមត្ថកិច្ច។
មន្ត្រីដដែលបានបន្តថា ពាក់ព័ន្ធទៅនឹងការបង្ក្រាបករណី ជួញដូរគ្រឿងញៀននេះ កម្លាំងអាវុធហត្ថរាជធានី ដកហូតបានថ្នាំញៀនម៉ាទឹកកក១១កញ្ចប់តូចល្មម និងជញ្ជីងថ្លឹង៣ ព្រមទាំងសម្ភារៈពាក់ពន្ធ័មួយចំនួនទៀត។ ជាក់ស្ដែងនៅយប់ថ្ងៃទី២ រហូតដល់យប់ថ្ងៃទី៥ ខែកញ្ញាឆ្នាំ២០១៥ អាវុធហត្ថខណ្ឌ័៧មករា ច្បារអំពៅ និងកម្លាំងការិយាល័យស្រាវជ្រាវ ប្រឆាំងគ្រឿងញៀនរាជធានី ចាប់បានជនសង្ស័យជួញដូរគ្រឿងញៀន ១៤នាក់ហើយ និងថ្នាំម៉ាទឹកកក ១១កញ្ចប់តូចល្មម រួមនឹងជញ្ជីសំរាប់ថ្លឹង៣ ព្រមទាំងសម្ភារៈពាក់ព័ន្ធមួយចំនួនទៀត។
ដូច្នោះសរុបទាំងអស់ទៅ រយៈពេលប៉ុន្មានថ្ងៃនេះ កម្លាំងអាវុធហត្ថម្ចាស់ការ បង្ក្រាបករណីគ្រឿងញៀន ដោយបានដកហូតវត្ថុតាង នូវថ្នាំម៉ាទឹកកក និងសំភារៈពាក់ព័ន្ធមួយចំនួនទៀត ដែលប្រតិបត្តិការនេះ ដូចភ្លៀងរលឹមដើម្បីកាត់បន្ថយ នូវបទល្មើសបានមួយកម្រិតធំផងដែរ។
បច្ចុប្បន្នកម្លាំងជំនាញកងរាជអាវុធហត្ថរាជធានី បានបញ្ជូនជនសង្ស័យ ទាំង១៤នាក់ ទៅតុលាការ ហើយសមត្ថកិច្ច កំពុងស្រាវជ្រាវតាមចាប់ខ្លួនមេខ្លោងធំៗ ជាមេៗរបស់ជនសង្ស័យដើម្បីយកមកផ្តន្ទាទោស បន្តទៀតតាមទិសដៅចង្អុលបង្ហាញ របស់លោកមេបញ្ជាការអាវុធហត្ថរាជធានី ពីព្រោះថាបទល្មើសភាគច្រើន ពួកជនល្មើសសុទ្ធសឹងតែប្រើប្រាស់ ហើយងប់ងុល និងគ្រឿងញៀនតែម្ដង៕
ចាប់បញ្ជូនជនសង្ស័យ ប្រុសស្រី១៤នាក់ ពាក់ព័ន្ធគ្រឿងញៀនទៅសាលាដំបូង
0 Comments