កន្លងមកនេះគេបានដឹងថា រាជរដ្ឋាភិបាលបានលើកទិសនៃការកែទម្រង់លើគ្រប់វិស័យទាំងអស់។ ដោយឡែកចំពោះវិស័យអប់រំក៏មានការកែទម្រង់បង្ហាញនូវភាពលេចធ្លោនាំមុខគេដែរក្នុងរយៈពេល២ឆ្នាំ នៃឆ្នាំសិក្សានេះ។ បានសេចក្តីថា ការកែទម្រង់នៃការសិក្សាមិនមែនឋិតនៅលើការរឹតបន្តឹងនៃការប្រឡងនោះទេគឺ មានមូលដ្ឋានគ្រឺះចាប់តាំងពីការងារបង្រៀន និងការរៀនរបស់គ្រូ និងសិស្សគ្រប់កម្រិតថ្នាក់រៀនទាំងអស់ ឬហៅថា គ្រប់ភូមិសិក្សាតែម្តង។ ទន្ទឹមនឹងការប្រកាសលទ្ធផលនៃការប្រឡងសញ្ញាបត្រមធ្យមសិក្សាទុតិយភូមិថ្មីៗ នេះបានបង្ហាញឲ្យដឹងថា បេក្ខជនដែលបានជាប់ទិន្ទេស «A »កើនឡើងជាងឆ្នាំមុន ជាង១០ដងឯណ្ណោះ។ លទ្ធផលនេះបានបង្ហាញថា ជាវឌ្ឍនភាពនៃការកែទម្រង់នៃការសិក្សាពិតប្រាកដ។
ការប្រឡងកាលពីឆ្នាំមុនគឺ បេក្ខជនដែលបានទទួលនិទ្ទេស «A »មានតែជាង១០នាក់ប៉ុណ្ណោះ សរុបទូទាំងប្រទេស។ ដោយឡែកចំពោះការប្រឡងឆ្នាំនេះ(២៤សីហា២០១៥)គឺ បេក្ខជនបានទទួលនិទ្ទេស «A » សរុប១០៨នាក់ ទូទាំងប្រទេស។ នេះជាអាំងឌីកាទ័រ ឬជាសញ្ញាបញ្ជាក់ និងបង្ហាញអំពីការកើនឡើងនៃសមត្ថភាព និងគុណភាពរបស់សិស្សក្នុងការសិក្សា។ ជាពិសេសចំពោះលទ្ធផលដ៏ល្អតាមរយៈការកើនឡើងនេះប្រាកដជាគេមើលឃើញថា ទាំងការបង្រៀនរបស់គ្រូនិងទាំងការរៀនរបស់សិស្សមានដំណើរការល្អ ឬហៅថា មាគ៌ានៃការកែទម្រង់នៃការសិក្សាកាន់តែមានភាពជ្រួតជ្រាបសព្វសរសៃញាក់នៃការអប់រំគ្រប់កម្រិតសិក្សាទាំងអស់។ ដ្បិតគុណភាពនៃការសិក្សាតែងមានការទាក់ទងគ្នាជាបន្តបន្ទាប់ដោយមិនមានការដាច់ខ្សែរយៈនោះឡើយ។ បានសេចក្តីថា ទាំងបឋមសិក្សា និងទាំងមធ្យមសិក្សា បឋមភូមិនោះវាជាចន្ទល់នៃការសិក្សាក្នុងកម្រិតមធ្យមសិក្សាទុតិយភូមិ។ ឯសិស្សដែលមានសមត្ថភាពនិងមានគុណភាពក្នុងកម្រិតមធ្យមសិក្សាទុតិយភូមិនេះហើយដែលនាំឲ្យមានជោគជ័យក្នុងការប្រឡងនោះ។ ព្រមជាមួយនេះដែរគេតែងយល់យ៉ាងច្បាស់បន្តទៀតថា ចំពោះសិស្សដែលបានប្រឡងជាប់នាពេលនេះគឺ ជាការប្រឡងជាប់ដោយសមត្ថភាពផ្ទាល់ខ្លួនរបស់បេក្ខជនសុទ្ធសាធតែម្តង។ ទោះជាបេក្ខជនបានប្រឡងជាប់ដោយបាននិទ្ទេសណាក៏ដោយក៏ជាលទ្ធផលដ៏ល្អបរិសុទ្ធនៃចំណេះដឹងរបស់សិស្សបានមកពីការសិក្សាពិតប្រាកដ ពោលគឺ មិនមែនជាលទ្ធផលដោយអយុត្តិធម៌នោះទេ។
ភស្តុតាងដែលបានបង្ហាញតាមរយៈលទ្ធផលដែលបានប្រកាសកន្លងមកថ្មីៗ នេះគឺ បេក្ខជនបានប្រឡងជាប់ច្រើនជាងឆ្នាំមុនផង និងបេក្ខជនដែលបានពិន្ទុច្រើនឋិតក្នុងចំណាត់ថ្នាក់នៃនិទ្ទេស « A » នោះក៏កើនឡើងគួរឲ្យមានមោទនភាពបំផុតនៃក្រសួងអប់រំយុវជន និងកីឡា។ ក្នុងនោះគេតែងបានដឹងថា លទ្ធផលល្អបានមកពីការយល់ជ្រួតជ្រាបទាំងមូលដ្ឋានគ្រូ និងសិស្សជាចម្បងបំផុត។ ព្រោះដោយសារតែមានការខិតខំប្រឹងបង្រៀនពីគ្រូផង និងមានការដាស់តឿនក្រើនរំលឹកពីគ្រូផង ទើបធ្វើឲ្យសិស្សខំប្រឹងរៀនសូត្រដោយមានស្មារតីភ្ញាក់រំលឹកខ្ពស់នោះដែរ។ បានសេចក្តីថា សព្វសរសៃសរសូងនៃការអប់រំតាំងពីតូចដល់ធំមានការកម្រើកឡើងព្រមគ្នាហើយអីតើ!…។ ឯអ្វីដែលជាការរួមចំណែកទាំងអស់ក្នុងការងារទ្រទ្រង់ការងារអប់រំនោះក៏ត្រូវតែមានការទទួលដោយភាពរីករាយយ៉ាងស្មោះស្ម័គ្រថា ពិតជាមានវឌ្ឍនភាពនៃការកែទម្រង់នៃការសិក្សាពិតប្រាកដមែន។
ដូចនេះគេតែងមានការសន្និដ្ឋានថា ឆ្នាំនេះលទ្ធផលនៃការប្រឡងរបស់សិស្សបានល្អជាងឆ្នាំមុនគឺ អាចបន្តទៅឆ្នាំក្រោយទៀត ប្រាកដជាបានល្អជាងឆ្នាំនេះជាមិនខាន។ ដ្បិតការងារអប់រំជាភារកិច្ចទាំងអស់គ្នាដែលមានទាំងគ្រូ និងទាំងសិស្សព្រមទាំងសហគមន៍ទៀតផងដែល កាន់តែបានយល់ច្បាស់ហើយបានជួយដាស់តឿនក្រើនរំលឹកដល់សិស្សគ្រប់ភូមិសិក្សាឲ្យមានការខំប្រឹងរៀនគ្រប់ៗ គ្នា។ ការខំប្រឹងរៀនរបស់សិស្សប្រកបដោយការយកចិត្តទុកដាក់តាំងពីថ្នាក់ទាបរហូតដល់ថ្នាក់ខ្ពស់នេះហើយដែលនាំឲ្យសិស្សមានសមត្ថភាព និងមានគុណភាពខ្ពស់នោះ។ ដូចនេះត្រង់ប្រការដែលសិស្សមានគុណភាពខ្ពស់នេះហើយទើបធ្វើឲ្យសិស្សនោះបានប្រឡងជាប់និងបានទទួលនូវនិទ្ទេស «A » នឹងកាន់តែកើនឡើងជាបន្តបន្ទាប់ជាក់ជាមិនខាន៕
និទ្ទេស «A »កើនឡើងជាសញ្ញាបង្ហាញថា ជាវឌ្ឍនភាពនៃការកែទម្រង់ការសិក្សា
0 Comments