ភ្នំពេញ: ជនសង្ស័យម្នាក់ត្រូវបានប្រជាពលរដ្ឋ ព្រួតគ្នាស្វាគមន៍ម្នាក់មួយដៃមួយជើង រងរបួសក្នុងខណៈពេលដែល ជនសង្ស័យម្នាក់នេះ បានធ្វើសកម្មភាពលួចម៉ូតូ២គ្រឿង ពីប្រជាពលរដ្ឋមិនបានសម្រេច ហើយត្រូវជនរងគ្រោះឃើញទាន់ ស្រែកឆោឡោ ទើបត្រូវប្រជាពលរដ្ឋស្វាគមន៍ ម្នាក់មួយដៃមួយជើងតែម្តងទៅ។
អំពើលួចខាងលើនេះបានកើតឡើង កាលពីវេលាម៉ោង ១០ព្រឹក ថ្ងៃទី០៥ ខែកញ្ញា ឆ្នាំ២០១៥ នៅចំណុច មុខផ្ទះលេខ១៣ ផ្លូវលេខ៣១៣ ក្រុមទី៣៦ ភូមិ៨ សង្កាត់បឹងកក់ទី២ ខណ្ឌទួលគោក រាជធានីភ្នំពេញ។
មន្ត្រីប៉ុស្តិ៍នគរបាលបឹងកក់ទី២បានឲ្យដឹងថា ជនសង្ស័យឈ្មោះ សុខ ចាន់ដារ៉ា ភេទប្រុស អាយុ២១ឆ្នាំ ជនជាតិខ្មែរ មុខរបរពុំពិតប្រាកដ មានទីលំនៅដើមភូមិ- ឃុំវិហារសួគ៌ ស្រុកខ្សាច់កណ្តាល ខេត្តកណ្តា ល(ស្នាក់នៅពុំពិតប្រាកដ)។ ចំណែកជនរងគ្រោះមានពីរនាក់ ទី១-ឈ្មោះ សយ សុវណ្ណារ៉ា ភេទស្រី អាយុ៤១ឆ្នាំ ជនជាតិខ្មែរ មុខរបរកម្មកររោងចក្រកាត់ដេ ស្នាក់នៅផ្ទះលេខ១៣ ផ្លូវលេខ៣១៣ សង្កាត់បឹងកក់ទី២ ខណ្ឌទួលគោក (ជា ម្ចាស់ម៉ូតូម៉ាក Yamaha Mio ពណ៌មាស ពាក់ស្លាកភ្នំពេញ 1AN-7061 ) ទី២-ឈ្មោះ ធិ វ៉ាន់ឌី ភេទប្រុស អាយុ២៥ឆ្នាំ ជនជាតិខ្មែរ មុខរបរនិស្សិតសាកលវិទ្យាល័យ ពុទ្ធិសាស្ត្រ ស្នាក់នៅ ផ្ទះលេខ១៣ ផ្លូវលេខ ៣១៣ សង្កាត់បឹងកក់ទី២ ខណ្ឌទួលគោក ( ជាម្ចាស់ម៉ូតូម៉ាក Honda Wave ពណ៌ក្រហម ពាក់ស្លាកភ្នំពេញ 1CB-1547 ) ។ សមត្ថកិច្ចដកហូតវត្ថុតាងរួមមាន ដែកសំរាប់កាច់បំបែកគ្រាប់សោរកម៉ូតូរាង អក្សរអ៊ិល ចំនួន០១ និង សោរទីបលេខ៨ ចំនួន០១ ។
មន្ត្រីប៉ូលីសបន្តទៀតថា នៅមុនពេលកើតហេតុ គឺជនរងគ្រោះទាំងពីរនាក់ បានចតម៉ូតូនៅមុខផ្ទះដោយចាក់សោរកត្រឹមត្រូវ ពេលនោះជនសង្ស័យ បានធ្វើសកម្មភាពលួចម៉ូតូ Yamaha Mio ពណ៌មាស ពេលកាច់ ក បានបាក់ដែកសំរាប់កាច់ក ទើបធ្វើសកម្មភាពលួច ម៉ូតូមួយគ្រឿងទៀត ម៉ាក Honda wave ពណ៌ក្រហម ពេលដែលជនសង្ស័យកំពុងធ្វើសកម្មភាព ម្តងទៀត ស្រាប់តែជនរងគ្រោះ បានមកទាន់ស្រែកចោរៗបង្កឲ្យភ្ញាក់ផ្អើល ភ្លាមនោះកំលាំងល្បាតនគរបាលប៉ុស្តិ៍ បឹងកក់ទី២ កំពុងជិះល្បាតក្នុងមូលដ្ឋានដើម្បីការពារសុវត្តិភាព ជូនប្រជាពលរដ្ឋ បានឃើញក៏ អន្តរាគមន៍ឃាត់ខ្លួនជនសង្ស័យបានជាក់ស្តែងតែម្តង ។
បច្ចុប្បន្នជនសង្ស័យ កំពុងឃាត់ខ្លួន នៅអធិការដ្ឋាននគរបាលខណ្ឌទួលគោក ដើម្បីកសាងសំណុំរឿងបញ្ជូនទៅតុលាការចាត់ការតាមច្បាប់ ៕
លោកចោរថ្លើមធំម្នាក់ឯង លួចម៉ូតូ២គ្រឿង តែមិនសម្រេច មកជាប់ខ្នោះដៃនគរបាលវិញ
0 Comments