ភ្នំពេញ ៖ ស្ត្រីម្នាក់បានបាត់បង់ទ្រព្យសម្បត្តិដូចជា ម៉ូតូ១គ្រឿង លុយ និងឯកសារមួយទៀត ដោយសារជនសង្ស័យមានគ្នាពីរនាក់ ប្រដាប់ដោយកាំភ្លើងខ្លី១ដើម ភ្ជង់ប្លន់ រួចហើយជិះគេចខ្លួនបាត់ស្រមោលដោយសុវត្ថិភាព។ ហេតុការណ៍កើតឡើងកាលពីវេលាម៉ោង៥ល្ងាចថ្ងៃទី២៥ ខែកញ្ញា ឆ្នាំ២០១៥ នៅចំណុចខាងក្រោយសាលាកសិកម្មចំការដូង ស្ថិតក្នុងភូមិខ្វា សង្កាត់ដង្កោ ខណ្ឌដង្កោ រាជធានីភ្នំពេញ។
សមត្ថកិច្ចប្រាប់ឲ្យដឹងថា ជនរងគ្រោះមានឈ្មោះជួប សុភា ភេទស្រី អាយុ២៩ឆ្នាំ រស់នៅភូមិខ្វា សង្កាត់ដង្កោ ខណ្ឌដង្កោ រាជធានីភ្នំពេញ មុខរបរមន្ត្រីមន្ទីរការងារ។ សំភារៈបាត់បង់ម៉ូតូ ០១គ្រឿង ម៉ាកហ្វីទ្បាណូ ពណ៌ក្រហម ពាក់ស្លាកលេខ ភ្នំពេញ 1CN-4211 កាបូបលុយ០១ ក្នុងនោះមានដូចជា អត្តសញ្ញាណប័ណ្ណ០២សន្លឹក កាតគ្រីម៉ូតូ ០១សន្លឹក កាតគ្រីទ្បាន០១សន្លឹក ទូរស័ព្ទដៃ០២គ្រឿង លុយ៣០០ដុល្លា និងកាតអេធីអឹម០២សន្លឹក។
សមត្ថកិច្ចប្រាប់បន្តឲ្យដឹងថា មុនពេលកើតហេតុនាវេលាម៉ោង៤និង៣០នាទីល្ងាចថ្ងៃទី២៥ ខែកញ្ញា ឆ្នាំ២០១៥ ជនរងគ្រោះបានជិះម៉ូតូរបស់ខ្លួនចេញពីកន្លែងធ្វើការដើម្បីទៅផ្ទះ លុះពេលជិះមកដល់ចំណុចខាងក្រោយសាលាកសិកម្មចម្ការដូងស្ថិតក្នុងភូមិខ្វា សង្កាត់ដង្កោ ខណ្ឌដង្កោ ក៏ស្រាប់តែមាន ម៉ូតូម៉ាកវីវ៉ា១គ្រឿង ពណ៌ខ្មៅ ជិះគ្នាពីរនាក់មិនស្គាល់អត្តសញ្ញាណបានជិះមកកៀរម៉ូតូជនរងគ្រោះស្រែកឲ្យឈប់ និងគំរាមយកកាបូបលុយតែជនរងគ្រោះមិនព្រមឲ្យពួកវាក៏ដកកាំភ្លើងខ្លីភ្ជង់ជនរងគ្រោះប្លន់យកម៉ូតូ និងកាបូបលុយជិះគេចខ្លួនបាត់ស្រមោល។
សមត្ថកិច្ចប្រាប់បញ្ជាក់ឲ្យដឹងថា ហេតុការណ៍នេះបានធ្វើឲ្យមានការភ្ញាក់ផ្អើលដល់ប្រជាពលរដ្ឋ ក៏ដូចជានគរបាលមូលដ្ឋាន ចុះដល់កន្លែងកើតហេតុនាំជនរងគ្រោះមកដាក់ពាក្យបណ្ដឹងនៅទីស្នាក់ការប៉ុស្តិ៍នគរបាលរដ្ឋបាលដង្កោ ដើម្បីតាមស្រាវជ្រាវវែករកមុខជនសង្ស័យយកមកផ្ដន្ទាទោសតាមច្បាប់៕
ជិះម៉ូតូចេញធ្វើការត្រូវជនសង្ស័យពីរនាក់ប្រើអាវុធខ្លីភ្ជង់ប្លន់យកម៉ូតូនិងកាបូបលុយ
0 Comments