ភ្នំពេញ ៖ សម្តេចក្រឡាហោម ស ខេង នាយករដ្ឋមន្ត្រីស្តីទីបានមានប្រសាសន៍ថា ការវិនិយោគបង្កើតឡើងនូវគម្រោងអចលនវត្ថុនាពេលនេះ គឺជាការឆ្លើយតបដ៏សមស្របទៅនឹងសភាពការណ៍វិវត្តន៍នៃសេដ្ឋកិច្ច ប៉ុន្តែការផ្គត់ផ្គង់លំនៅដ្ឋានដែលមានលក្ខណៈទំនើបសម្រាប់ពលរដ្ឋនៅតែជាបញ្ហាប្រឈមសម្រាប់រាជរដ្ឋាភិបាល។
សម្តេចក្រឡាហោម ស ខេង លើកឡើងដូច្នេះនៅក្នុងពិធីសម្ពោធដាក់ឲ្យដំណើរការគម្រោង ខេមហូមរបស់ក្រុមហ៊ុន ផាប់ប្ល៊ីក កាលពីព្រឹកថ្ងៃទី២៦ ខែកញ្ញា ឆ្នាំ២០១៥ នៅវិមានកាណាឌីយ៉ា។ សម្តេចបានមានប្រសាសន៍យ៉ាងនេះថា “ការវិនិយោគបង្កើតឡើងនូវគម្រោងអចលនវត្ថុនាពេលនេះ គឺជាការឆ្លើយតបដ៏សមស្របទៅនឹងសភាពការណ៍វិវត្តន៍នៃសេដ្ឋកិច្ចនៅកម្ពុជា និងជាការរួមចំណែកធ្វើឲ្យប្រជាពលរដ្ឋកាន់តែមានលទ្ធភាព និងមានជម្រើសកាន់តែច្រើន ក្នុងការទទួលបានលំនៅដ្ឋានរស់នៅប្រកបដោយគុណភាព បរិយាកាសល្អ សោភណភាព និងសុខុមាលភាព ជាមួយនឹងតម្លៃកាន់តែសមរម្យ”។
សម្តេចបញ្ជាក់ទៀតថា “សម្រាប់បរិបទកម្ពុជា ការផ្គត់ផ្គង់លំនៅដ្ឋានដែលមានលក្ខណៈទំនើបស្របតាមសម័យកាល ដើម្បីបំពេញទៅតាមតម្រូវការនៃកំណើនប្រជាពលរដ្ឋ ដែលមានចំណូលមធ្យម គឺនៅជាបញ្ហាប្រឈមមួយ ដែលរាជរដ្ឋាភិបាលកំពុងតែដោះស្រាយ និងជួយជ្រោមជ្រែង ធ្វើយ៉ាងណាឲ្យប្រជាពលរដ្ឋមានលំនៅដ្ឋានស្នាក់នៅសមរម្យ និងមានឱកាសក្លាយជាម្ចាស់កម្មសិទ្ធិនៃលំនៅដ្ឋានរបស់ខ្លួនផងដែរ”។ សម្តេចក្រឡាហោមថា ជាមួយនឹងការប្តេជ្ញាចិត្តរបស់រាជរដ្ឋាភិបាលក្នុងការលើកទឹកចិត្តដល់វិស័យសំណង់ និងអចលនវត្ថុនៅកម្ពុជា សម្តេចគាំទ្រចំពោះការវិនិយោគគម្រោងអចលនវត្ថុខេមហូម ដែលគម្រោងនេះ ក៏បានដើរស្របទៅនឹងគោលនយោបាយលំនៅដ្ឋានសាធារណៈថ្នាក់ជាតិរបស់រាជរដ្ឋាភិបាលកម្ពុជា ដែលក្រសួងរៀបចំដែនដី នគរោបនីយកម្ម និងសំណង់ កំពុងដំណើរការអនុវត្តដោយរំពឹងថា នឹងលេចជារូបរាងក្នុងរយៈពេលប៉ុន្មានឆ្នាំខាងមុខនេះ”។
សម្តេចនាយករដ្ឋមន្ត្រីស្តីទីបានលើកឡើងទៀតថា ការរីកចម្រើន នៃវិស័យសំណង់ និងអចលនវត្ថុ បានពឹងផ្អែកមួយផ្នែកធំទៅលើវិស័យឯកជនក្នុងការអនុវត្តន៍នូវគម្រោងវិនិយោគរបស់ខ្លួន ដោយដើរតួនាទីជាអ្នកសម្របសម្រួលតម្រង់ទិសពាក់ព័ន្ធ នឹងការដាក់ចេញនូវគោលនយោបាយ និងយុទ្ធសាស្ត្រ ដើម្បីធានាដល់ដំណើរការអភិវឌ្ឍន៍ ប្រកបដោយចីរភាព។ ដោយយល់ឃើញសារៈសំខាន់ នៃការចូលរួមរបស់វិស័យឯកជនក្នុងការអភិវឌ្ឍវិស័យសំណង់ និងអចលនវត្ថុ រាជរដ្ឋាភិបាលក៏បានយកចិត្តទុកដាក់បង្កបរិយាកាសល្អប្រសើរសម្រាប់ការវិនិយោគ តាមរយៈការខិតខំរក្សាឲ្យបាននូវសន្តិភាព និងស្ថិរភាពនយោបាយ ដែលជាកត្តាស្នូល នៃការអភិវឌ្ឍសំដៅបង្កើនជំនឿទុកចិត្តពីវិនិយោគិនជាតិ និងអន្តរជាតិ ក៏ដូចជាលើកទឹកចិត្ត និងជំរុញការវិនិយោគមកកាន់កម្ពុជាឲ្យបានកាន់តែច្រើនឡើងថែមទៀត។
ទន្ទឹមនឹងនេះ ដើម្បីគាំទ្រ និងពង្រឹងដល់វិស័យសំណង់ និងអចលនវត្ថុនៅកម្ពុជាឲ្យកាន់តែរឹងមាំ ក៏បានយកចិត្តទុកដាក់រៀបចំកសាង និងកែសម្រួល ច្បាប់ នីតិវិធី ព្រមទាំងបទប្បញ្ញត្តិពាក់ព័ន្ធផ្សេងៗ ដើម្បីធានានូវនិរន្តរភាពវិស័យនេះ ឲ្យស្របតាម បរិបទ និងស្ថានភាពសេដ្ឋកិច្ចរបស់កម្ពុជា និងសកលលោក។ ជាមួយគ្នានោះ សម្តេចក្រឡាហោម ស ខេង បានសំណូមពរឲ្យក្រុមហ៊ុនបន្តយកចិត្តទុកដាក់ពង្រឹងគុណភាពសំណង់ស្របតាមបទដ្ឋានបច្ចេកទេស ដើម្បីធានាបាននូវគុណភាពយូរអង្វែង និងធានាសុវត្ថិភាពក្នុងការស្នាក់នៅ សម្រាប់ផ្តល់ជូនអតិថិជន ក៏ដូចជាឆ្លើយតបជំនឿទុកចិត្ត និងការគាំទ្រដល់ផលិតផលរបស់ក្រុមហ៊ុនពីសំណាក់អ្នកប្រើប្រាស់។
តាមសម្តេចក្រឡាហោមបានបញ្ជាក់ទៀតថា ការរីកចម្រើននៃវិស័យសំណង់ និងអចលវត្ថុនៅកម្ពុជា គឺមិនត្រឹមតែលាតសន្ធឹងនៅក្នុងរាជធានីភ្នំពេញប៉ុណ្ណោះទេ ប៉ុន្តែនៅតាមប៉ូលសេដ្ឋកិច្ចសំខាន់ៗមួយចំនួនទៀត ដូចជាខេត្តព្រះសីហនុ ខេត្តសៀមរាប និងតំបន់ដែលមានសក្ដានុពលមួយចំនួនទៀត ក៏មានការរីកចម្រើនគួរកត់សម្គាល់ផងដែរ។ ហេតុនេះខ្ញុំសូមលើកទឹកចិត្តដល់ក្រុមហ៊ុន ក៏ដូចជាផ្នែកឯកជនដទៃទៀត បន្តពិនិត្យលទ្ធភាពបង្កើត និងពង្រីកនូវវិសាលភាពគម្រោងវិនិយោគនៅតាមតំបន់ប៉ូលសេដ្ឋកិច្ចសំខាន់ៗរបស់កម្ពុជាឲ្យបានកាន់តែច្រើនថែមទៀត៕
ការផ្គត់ផ្គង់លំនៅដ្ឋាន ដែលមានលក្ខណៈទំនើបសម្រាប់ពលរដ្ឋនៅតែជាបញ្ហាប្រឈម
0 Comments