លោកកែវ ពិសិដ្ឋ តំណាងរាស្ត្រខេត្តកំពង់ចាមនាំគ្រូពេទ្យស្ម័គ្រចិត្តព្យាបាលជំងឺជូនប្រជាពលរដ្ឋដោយមិនគិតថ្លៃ

ត្បូងឃ្មុំ ៖ ដោយមានកិច្ចសហការពីសហគ្រាសផលិតឱសថ(EPHAC) នៅព្រឹកថ្ងៃទី១៩ ខែកញ្ញា ឆ្នាំ២០១៥នេះ លោក កែវ ពិសិដ្ឋ អ្នកតំណាងរាស្ត្រមណ្ឌលកំពង់ចាម និងក្រុមការងារ បាននាំគ្រូពេទ្យស្ម័គ្រចិត្តសម្តេចអគ្គមហាពញាចក្រី ហេង សំរិន ប្រធានរដ្ឋសភា ចុះព្យាបាលជំងឺជូនប្រជាពលរដ្ឋ ដែលមកពីឃុំចំនួនបី គឺឃុំ ជប់ ឃុំមង់រៀវ និងឃុំជីរោទ៍២ចំនួន ១០០០នាក់ ដោយមិនគិតថ្លៃ ដែលពិធីនេះព្យាបាលសុខភាពជូនប្រជាជននេះ បានប្រព្រឹត្តទៅក្នុងបរិវេណសាលាបឋមសិក្សាទួលទ្រា ភូមិទួលទ្រាត្បូង ឃុំជប់ ស្រុកត្បូងឃ្មុំ ខេត្តត្បូងឃ្មុំ។

មានមតិសំណេះសំណាលជាមួយប្រជាពលរដ្ឋនាឱកាសនោះ អ្នកតំណាងរាស្ត្រលោក កែវ ពិសិដ្ឋ ក្នុងនាមសម្តេចអគ្គមហាពញាចក្រី ហេង សំរិន ប្រធានរដ្ឋសភា បានពាំនាំនូវការសាកសួរសុខទុក្ខពីសំណាក់ថ្នាក់ដឹកនាំកម្ពុជា មានសម្តេចអគ្គមហាពញាចក្រី ហេង សំរិន ប្រធានរដ្ឋសភា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលលោកតែងតែគិតគូរពីសុខទុក្ខរបស់ប្រជាពលរដ្ឋជានិច្ច។

លោកបញ្ជាក់ថា ថ្ងៃនេះដោយមើលឃើញពីបញ្ហាសុខភាពប្រជាពលរដ្ឋជាបញ្ហាសំខាន់ ក្រុមគ្រូពេទ្យស្ម័គ្រចិត្តរបស់សម្តេចចក្រី ហេង សំរិន បានចុះមកព្យាបាលសុខភាពជូនបងប្អូនប្រជាពលរដ្ឋក្នុងមូលដ្ឋាននេះ ដោយផ្ទាល់ដោយមិនគិតថ្លៃ ដែលនេះបានបង្ហាញឲ្យឃើញពីការយកចិត្តទុកដាក់របស់ថ្នាក់ដឹកនាំកម្ពុជាយើង។ លោកបន្តថា នេះជាវប្បធម៌ចែករំលែកដែលគណបក្សប្រជាជនកម្ពុជាធ្លាប់បានធ្វើកន្លងមក។

អ្នកតំណាងរាស្ត្ររូបនេះក៏បានផ្តាំផ្ញើដល់ប្រជាពលរដ្ឋកុំឲ្យឆាប់ ជឿតាមឃោសនារបស់អ្នកដទៃ ដោយលើកពីបញ្ហានេះបញ្ហានោះ ដូចថ្មីៗមកនេះលើកពីបញ្ហាព្រំដែន បញ្ហារើសអើងនៅក្នុងសង្គមរបស់បក្សប្រឆាំង ដែលនាំឲ្យមានការភាន់ច្រឡំ ដែលយើងត្រូវគិតឲ្យបានវែងឆ្ងាយនោះ។ លោកជឿជាក់ថា បងប្អូននឹងចេះគិតពិចារណានាពេលខាងមុខថាតើគណបក្សណា ដែលផ្តល់សេចក្តីសង្ឃឹមជូនបងប្អូន។ លោកក៏បានជម្រាបជូនថា សព្វថ្ងៃរាជរដ្ឋាភិបាលកម្ពុជាយើង លោកមានការខិតខំប្រឹងប្រែងណាស់ដើម្បីប្រទេសជាតិមានការរីកចម្រើន ជីវភាពប្រជាជនត្រូវបានកាត់បន្ថយ។ ទន្ទឹមនឹងនោះរាជរដ្ឋាភិបាលបានកំពុងពង្រឹងការអនុវត្តច្បាប់ ដែលយើងទាំងអស់គ្នាក៏ត្រូវគោរពច្បាប់ផងដែរ។

លោកក៏បានកោតសរសើរដល់ក្រុមគ្រូពេទ្យស្ម័គ្រចិត្តសម្តេចចក្រី ប្រធានរដ្ឋសភា ដែលបានយកអស់កម្លាំងកាយចិត្ត មិនមែនតែនៅក្នុងមូលដ្ឋាននេះទេ គឺក្រុមគ្រូពេទ្យស្ម័គ្រចិត្តតែងមានសកម្មភាពជាប់ជានិច្ចនៅក្នុងមូលដ្ឋានខេត្តកំពង់ចាម ក៏ដូចជានៅក្នុងត្បូងឃ្មុំយើងនេះ ហើយនេះគឺជាឱកាសមួយដែលថ្នាក់ដឹកនាំគណបក្សប្រជាជនកម្ពុជា បានផ្តល់នូវសេវាសាធារណៈជូនប្រជាពលរដ្ឋឲ្យបានល្អប្រសើរ ជាពិសេសលើការថែទាំសុខភាព។ លោកបានបញ្ជាក់ថា ការផ្តល់សេវាសុខភាពជូនប្រជាពលរដ្ឋពិតជាសំខាន់ណាស់ ក្នុងនាមតំណាងរាស្ត្រលោក ក៏សូមឲ្យអាជ្ញាធរយកចិត្តទុកដាក់ផ្តល់សេវាសុខភាពជូនប្រជាពលរដ្ឋប្រកបដោយសីលធម៌ កុំឲ្យមានការរើសអើងនាំឲ្យមានសតិអារម្មណ៍ដល់ប្រជាពលរដ្ឋ។

ឆ្លៀតក្នុងឱកាសនោះដែរលោក កែវ ពិសិដ្ឋ ក៏បាននាំយកថវិកាចំនួន ៤លានរៀលឧបត្ថម្ភជូនដល់ក្រុមគ្រូពេទ្យស្ម័គ្រចិត្តសម្តេចចក្រី សម្រាប់ដោះស្រាយការខ្វះខាតក្នុងក្រុមការងារ ព្រមទាំងឧបត្ថម្ភសាលាស្រុកត្បូងឃ្មុំនូវថ្នាំពេទ្យ និងទូថ្នាំចំនួន០២ និងថវិកា ១លានរៀល ឧបត្ថម្ភសាលាឃុំជប់ សាលាឃុំ មង់រៀវ សាលាឃុំ ជីរោទ៍ នូវថ្នាំពេទ្យ ទូរដាក់ថ្នាំចំនួន១ និងថវិកា ២០ម៉ឺនរៀលក្នុងមួយឃុំ និងឧបត្ថម្ភថវិកាមួយចំនួនដល់កម្លាំងការពារផងដែរ៕
M20-09-15-a8