អ្នក​ប្រដាល់​ថៃ​មក​វាយ​ដណ្ដើម​ខ្សែក្រវាត់​ជាមួយ ​បាង កា​យ៉ាក់ ​នៅ​អប្សរា​

*សែន រ៉ា​ដេ​ត និង​ម៉ន​ សា​ម៉េ​ត ជួប​ថៃ​ជា​លក្ខណៈ​មិត្តភាព​

ប្រដាល់ ៖ នៅ​ថ្ងៃ​សៅរ៍​ ទី​២៨​ ខែ​មីនា ឆ្នាំ​២០១៥​ខាងមុខនេះ ស្ថានីយ​ទូរទស្សន៍​អប្សរា​សហការ​ឧបត្ថម្ភ​ដោយ​ណាហ្គា​វើ​ល នឹង​រៀបចំ​ការប្រកួត​ដណ្ដើម​ខ្សែក្រវាត់​Naga World​ទម្ងន់​៥៧​គីឡូក្រាម​ផង និង​ការប្រកួត​ជា​លក្ខណៈ​មិត្តភាព​អន្តរជាតិ​ផង នៅ​លើ​សង្វៀន​អប្សរា។​

ខ្សែក្រវាត់​Naga World​ ទម្ងន់​៥៧​គីឡូក្រាម​នេះ បាន​នៅ​ទំនេរ​យូរហើយ ដោយ​រក​មិនទាន់​ឃើញ​អ្នកមាន​សមត្ថភាព​ដើម្បី​គ្រប់គ្រង​នៅឡើយ។ ដូច្នេះ​ហើយ​ទើប​លើក​នេះ​តម្រូវ​ឲ្យ បាង កា​យ៉ាក អ្នក​ប្រដាល់​ក្លិប​អប្សរា​គុន​ខ្មែរ​វាយ​ដណ្ដើម​យក​ជាមួយ​អ្នក​ប្រដាល់​ថៃ​ឈ្មោះ ​វ៉ាន់ ស៊ុន​ក្រាម។​

បាង កា​យ៉ាក់ ជា​អ្នក​ប្រដាល់​ដែល​មិនទាន់​ស្គាល់​ចាញ់​ម្តង​ណា​នៅឡើយ នៅ​ក្នុង​កំណត់ត្រា​ប្រកួត​៤៩​លើក​របស់​គេ​នោះ។ ជា​ការ​ប្រកួត​លើក​ទី​៥០​របស់​ កា​យ៉ាក់ ដែល​ត្រូវ​ប្រកួត​ដណ្ដើម​ខ្សែ​ក្រវាត់ Naga World​ ទម្ងន់​៥៧​គីឡូក្រាម​ជាមួយ​អ្នក​ប្រដាល់​ថៃ​នេះ។ វ៉ាន់ ស៊ុន​ក្រាម ពុំ​ដែល​មក​ប្រកួត​នៅ​ភ្នំពេញ​ទេ​កាល​ពី​ពេល​កន្លងមក។

តាម​លោក សុខ សំណាង អ្នកចាត់ចែង​កម្មវិធី​ប្រដាល់​នៅ​សង្វៀន​អប្សរា​បាន​ឲ្យ​ដឹង​ថា វ៉ាន់ ស៊ុន​ក្រាម​នេះ នៅ​ស្រុក​ថៃ​គេ​ជា​ជើង​ខ្លាំង​គ្មាន​អ្នកណា​ឈ្នះ​គេ​ទេ ក្នុង​ប្រភេទ​ទម្ងន់​៦០​គ​.​ក្រ​នេះ។ កាលដែល​គេ​មក​ជួប​ បាង កា​យ៉ាក់​នេះ គឺ​ដើម្បី​ដណ្តើម​យក​ខ្សែក្រវាត់​Naga World ពី​បាង កា​យ៉ាក់ ដែល​គ្រប់គ្រង​ជា​យូរ​ឆ្នាំ​ណាស់​មក​ហើយ​នោះ។

អ្នក​ប្រដាល់​ បាង កា​យ៉ាក់ ជា​អ្នក​ប្រដាល់​ល្អ​ និង​ខ្លាំង មិន​ចាញ់​ យ៉េន ឌី​ណា ប៉ុន្មាន​ទេ។ គេ​មិន​ធ្លាប់​ដែល​ប្រកួត​ចាញ់​អ្នក​ប្រដាល់​ថៃ​ណា​ម្នាក់​នៅឡើយ​ទេ ក្នុង​ការ​ប្រកួត​នៅ​ក្នុង​ស្រុក​ក្តី និង​ក្រៅ​ស្រុក​ក្តី។​ កាលពី​ថ្ងៃ​ទី​០៩ ខែ​សីហា ​កន្លង​ទៅ​នេះ បាង​កា​យ៉ាក បាន​ប្រកួត​ឈ្នះ កីឡាករ​ថៃ Extra Sitpa នៅ​ក្នុង​កម្មវិធី Max Muay Thai នៅ​ទីក្រុង​ប៉ា​ទី​យ៉ា ប្រទេស​ថៃ។​

កា​យ៉ាក់ គេ​មាន​កាយសម្បទា​រឹងមាំ ចិត្ត​ប្រដាល់​ធំ ហើយ​មាន​កលល្បិច​ខ្ពស់​ក្នុង​ការប្រកួត។ កា​យ៉ាក់ មាន​កណ្ដាប់ដៃ​ល្អ វាយ​ចេញចូល​រហ័ស ហើយ​ស្នៀត​ទាត់ ​និង​ជង្គង់ កែង ក៏​ល្អ​ថែមទៀត។ ការប្រកួត​លើក​ចុងក្រោយ​របស់ ​កា​យ៉ាក់ គឺ​នៅ​ក្នុង​ស្រុក​ដោយ​វាយ​ឈ្នះ​អ្នក​ប្រដាល់​ថៃ​Phun Savath ដោយ​ពិន្ទុ កាលពី​ថ្ងៃទី​១២​ ខែកញ្ញា ឆ្នាំ​២០១៥​កន្លងមកនេះ។​ ទោះជា​បែបនេះ​ក្តី មិនទាន់​ហ៊ាន​សន្និដ្ឋាន​ថា បាង កា​យ៉ាក់ ជួប​សំណាងល្អ​នៅក្នុង​ការប្រកួត​ដណ្តើម​ខ្សែក្រវាត់​Naga World ទម្ងន់ ៥៧​គ​.​ក្រ​នេះ​បានសម្រេច​ ឬ​អត់​នោះ​ទេ? ​

ចំពោះ​ សែន រ៉ា​ដេ​ត ដែល​ការប្រកួត​របស់​គេ​មាន​លក្ខណៈ​ជា​ការ​ប្រកួត​មិត្តភាព​នោះ គេ​នឹង​ជួប​ជាមួយ​អ្នក​ប្រដាល់​ថៃ​ឈ្មោះ​ ថៃ ស៊ីត​ថា​ង ដោយ​ប្រកួត​ក្នុង​ទម្ងន់​៥២​គ​.​ក្រ។ អ្នក​ប្រដាល់​ថៃ​ម្នាក់​នេះ ក៏​មិនដែល​មក​ប្រកួត​នៅ​កម្ពុជា​ម្តង​ណា​ដែរ​កន្លងមក។​

ថៃ ស៊ីត​ថា​ង​ នេះ បើ​តាម​លោក សុខ សំណាង បាន​ឲ្យ​ដឹង​ថា គេ​ជា​ជើង​ខ្លាំង​ម្នាក់​ដែរ ក្នុង​ប្រភេទ​ទម្ងន់​៥២​គ​.​ក្រ​នេះ។ រវាង ​សែន រ៉ា​ដេ​ត និង​ថៃ ស៊ីត​ថា​ង នេះ មិន​ដឹង​ថា​នរណា​ជា​អ្នកឈ្នះ​ក្នុង​ការ​ប្រកួត​គ្នា​នេះ​ទេ។ សែន រ៉ា​ដេ​ត ជា​ប្អូន​បង្កើត​របស់ ​សែន រ៉ា​ឌី​ ជើង​ខ្លាំង​របស់​កម្ពុជា​នេះ មាន​ថ្វីដៃ​មិន​ចាញ់​បងប្រុស​របស់​គេ​នោះ​ឡើយ ហើយ​ថែមទាំង​ធ្លាប់​បំបាក់​ថៃ​ប៉ុន្មាន​នាក់​មក​ហើយ។ គេ​ប្រកួត​ចុងក្រោយ​នេះ វាយ​ឈ្នះ​អ្នក​ប្រដាល់​ថៃ Pai Tan Pechinda ក្នុង​ទឹក​ទី​២ កាលពី​ថ្ងៃ​ទី​២៩ ខែ​សីហា ឆ្នាំ​២០១៥។​

ម៉ន សា​ម៉េ​ត អ្នក​ប្រដាល់​ក្លិប​ការិយាល័យ​ទី​៥​កងទ័ពជើងគោក ដែល​ជា​អ្នក​ប្រដាល់​ជើង​ខ្លាំង​ម្នាក់​ដែរ​នោះ នឹង​ជួប​ប្រកួត​ជាមួយ​អ្នក​ប្រដាល់​ថៃ​ឈ្មោះ ​រុង សែន​ឆៃ ក្នុង​ប្រភេទ​ទម្ងន់​៥៨​គីឡូក្រាម ។

ជា​លើក​ទី​៥​របស់​ ម៉ន សា​ម៉េ​ត​ ហើយ ដែល​ឡើង​ប្រកួត​ជាមួយ​អ្នក​ប្រដាល់​ថៃ​នេះ។ រុង សែន​ឆៃ​នេះ ពុំ​ដឹង​ថា​មាន​ប្រវត្តិ​ប្រកួត​បែប​ណា​ទេ ប៉ុន្តែ​យ៉ាងណា​គេ​ទុកចិត្ត​លើ​ ម៉ន សា​ម៉េ​ត ព្រោះថា ​សា​ម៉េ​ត ​គេ​មាន​បទពិសោធន៍​ច្រើន​ហើយ ក្នុង​ការ​ប្រកួត​ជាមួយ​ថៃ​នេះ។ ម៉ន សា​ម៉េ​ត គេ​ប្រកួត​ជាមួយ​ថៃ​លើក​ចុង​ក្រោយ​នេះ វាយ​ឈ្នះ ​Kung Sayam ​ដោយ​ពិន្ទុ កាល​ពី​ថ្ងៃ​ទី​១៩​ ខែ​កក្កដា ឆ្នាំ​២០១៥។​

ដោយឡែក​ការប្រកួត​រវាង​អ្នក​ប្រដាល់​ខ្មែរ​ និង​ខ្មែរ​គ្នាឯង​វិញ អ្នក​ប្រដាល់​កំពែង​ខ្មៅ​ក្លិប​អប្សរា​គុន​ខ្មែរ នឹង​ជួប​ប្រកួត​ជាមួយ ​ឡុង បញ្ញា អ្នក​ប្រដាល់​ក្លិប​សាល​វ័​ន្ត​កីឡា ក្នុង​ទម្ងន់​៥៤​គីឡូក្រាម។ ពីរ​នាក់​នេះ​ជួប​គ្នា​លើក​មុន​(១៧​ឧសភា​២០១៥) បាន​ប្រកួត​ស្មើ​ពិន្ទុ​គ្នា ដូច្នេះ​ជួប​គ្នា​លើក​នេះ គឺជា​ការ​ប្រកួត​ជម្រះ​បញ្ជី​គ្នា។ ចំណែក​អ្នក​ប្រដាល់​ស្វា​ដែក ត្រូវ​គេ​ផ្គូផ្គង​ឲ្យ​ប្រកួត​ជាមួយ​ ឡុង សា​រ៉េ​ន។ ពីរ​នាក់​នេះ​ប្រកួត​គ្នា​ក្នុង​ទម្ងន់​៥១​គីឡូក្រាម៕

​

អ្នក​ប្រដាល់​ថៃ​មក​វាយ​ដណ្ដើម​ខ្សែក្រវាត់​ជាមួយ ​បាង កា​យ៉ាក់ ​នៅ​អប្សរា​