កំពង់ឆ្នាំង ៖ ជនល្មើសជនជាតិវៀតណាម៦នាក់ ជាចោរសកម្មខាងលួចទូកកាណូតតាមដងទន្លេត្រូវបានប្រជាការពារ សមត្ថកិច្ចនគរបាលប៉ុស្តិ៍មូលដ្ឋាន នគរបាលក្រុង នគរបាលខេត្ត សហការគ្នាចាប់ខ្លួននៅថ្ងៃទី០២ ខែកញ្ញាបានចំនួន៤នាក់ ហើយនៅថ្ងៃទី០៣ ខែកញ្ញា បាន២នាក់ និងដកហូតវត្ថុតាងបានកាណូតបាឡាស្មាច់បាន៥គ្រឿង និងម៉ាស៊ីន៥គ្រឿង។
ប្រតិបត្តិការបង្ក្រាបបទល្មើសខាងលើនេះ បានធ្វើឡើងនៅក្នុងភូមិសាស្ត្រសង្កាត់ផ្សារឆ្នាំង ក្រុងកំពង់ឆ្នាំង និងឃុំឆ្នុកទ្រូ ស្រុកបរិបូណ៌។
លោកវរសេនីយ៍ឯកប៉ុល វុទ្ធី ស្នងការរងនគរបាលខេត្ត និងប្រធានការិយាល័យកណ្ដាលយុត្តិធម៌បានឲ្យដឹងថា សមត្ថកិច្ចបានធ្វើការស្រាវជ្រាវតាមដានមុខសញ្ញាទាំងនេះតាំងពីថ្ងៃទី២៧ ខែសីហាមកម្ល៉េះ ហើយក្នុងប្រតិបត្តិការនោះ សមត្ថកិច្ចដកហូត បានកាណូតបាឡា៦គ្រឿង និងម៉ាស៊ីន៥គ្រឿង ពីផ្ទះមេចោរវៀតណាម ឈ្មោះ វៀង យ៉ាំងភឿក នៅក្នុងភូមិចុងកោះ។
ក្រុមចោរសកម្មខាងលួចទូកកាណូតតាមដងទន្លេ ជាបក្ខពួកមេចោរធំខាងលើទាំង៦នាក់ដែលសមត្ថកិច្ចចាប់ខ្លួនបានគឺ១.ឈ្មោះ ឡេ យ៉ាំងសាវ អាយុ៣០ឆ្នាំ ២.ឈ្មោះ ឡេ យ៉ាំងយូ អាយុ១៨ឆ្នាំ។ ពួកគេទាំង២នៅភូមិឆ្នុកទ្រូ ឃុំឆ្នុកទ្រូ ស្រុកបរិបូណ៌។ ៣.ឈ្មោះវៀង យ៉ាំងឡឺយ អាយុ២០ឆ្នាំ ៤.ឈ្មោះ វៀងយ៉ាំងទៀក អាយុ២០ឆ្នាំ។ ពួកគេទាំង២នៅភូមិកណ្ដាល សង្កាត់ផ្សារឆ្នាំង(ពួកចោរទាំង៤នាក់នេះចាប់ខ្លួនបាននៅម៉ោង៤និង៣០នាទីល្ងាចថ្ងៃទី០២ ខែកញ្ញា ឆ្នាំ២០១៥ )។ ៥.ឈ្មោះ វៀង យ៉ាំងហួរ អាយុ ៣៥ឆ្នាំ និង៦.ឈ្មោះ វៀង យ៉ាំងកែវ អាយុ១៧ឆ្នាំ។ ពួកគេទាំង២នាក់រស់នៅភូមិចុងកោះ សង្កាត់ផ្សារឆ្នាំង ( ពួកចោរទាំង២នាក់នេះចាប់ខ្លួនបាននៅម៉ោង៨និង៣០នាទីព្រឹកថ្ងៃទី០៣ ខែកញ្ញា ឆ្នាំ២០១៥)។
ដោយឡែកវត្ថុតាងដែលសមត្ថកិច្ចដកហូតបានរួមមាន កាណូតបាឡាជ័រស្មាច់ចំនួន៥គ្រឿង ម៉ាស៊ីន៥គ្រឿង អាគុយ១ ដាប់ទ័រ១ អាំងវ៉ាត់ទ័រឆក់ត្រី១ ខ្សែភ្លើង និងដងឆក់១កំប្លេ ថ្នាំញៀន១កញ្ចប់ និងឧបករណ៍សម្រាប់បម្រើឲ្យការជក់ថ្នាំញៀនមួយចំនួនធំទៀត។
ជនល្មើស និងវត្ថុតាងត្រូវបានសមត្ថកិច្ចជំនាញ កសាងសំណុំរឿងតាមនីតិវិធី បញ្ជូនទៅកាន់អយ្យការសាលាដំបូងខេត្ត ដើម្បីធ្វើការបន្តស្រាវជ្រាវ ចោទប្រកាន់ ជំនុំជម្រះ និងផ្ដន្ទាទោសតាមបញ្ញត្តិច្បាប់។ ដោយឡែកមេចោរ ឈ្មោះ វៀង យ៉ាំងភឿក ដែលសមត្ថកិច្ចដកបានគ្រាប់កាំភ្លើងអាកា៨៦គ្រាប់ បង់អាកា៤បង់ នៅក្នុងផ្ទះក្នុងភូមិចុងកោះ សង្កាត់ផ្សារឆ្នាំង កាលពីព្រឹកថ្ងៃទី២៧ ខែសីហា និងសង្ស័យថាមានអាវុធលាក់ទុកខុសច្បាប់ សមត្ថកិច្ចកំពុងតាមប្រមាញ់ស្វែងរកចាប់ខ្លួនយ៉ាងសកម្ម ដែលគេគិតថាមិនយូរមិនឆាប់មេចោររូបនេះគង់តែជាប់សំណាញ់ច្បាប់មិនខានឡើយ៕
ចាប់បានចោរជនជាតិវៀតណាម៦នាក់ដកហូតវត្ថុតាងកាណូតបាឡាជ័រស្មាច់៥គ្រឿង
0 Comments