ភ្នំពេញ ៖ ចៅក្រមសាលាឧទ្ធរណ៍លោកប៉ាក ច័ន្ទសំបូរ នៅវេលាម៉ោង៩ព្រឹកថ្ងៃទី២៩ ខែកញ្ញា ឆ្នាំ២០១៥ បានតម្កល់សាលក្រមសាលាដំបូងរាជធានីភ្នំពេញទុកជាបានការដដែលពោលគឺផ្ដន្ទាទោសបុរសម្នាក់ជាអតីតមន្ត្រីកងរាជអាវុធហត្ថលើផ្ទៃប្រទេសម្នាក់ ដាក់គុក១០ឆ្នាំ ពីបទបាញ់សម្លាប់មនុស្ស និងប្រើប្រាស់អាវុធខុសច្បាប់។
ជនជាប់ចោទឈ្មោះជុំ វណ្ណា អាយុ២៨ឆ្នាំ មានមុខរបរបន្ថែមជាសន្តិសុខក្លឹបរាត្រីឌីជេស្តេសិន ដែលមានទីតាំងស្ថិតក្នុងសង្កាត់បឹងសាឡាង ខណ្ឌទួលគោក។
តាមអង្គហេតុគឺកាលពីយប់ថ្ងៃទី៤ ខែកញ្ញា ឆ្នាំ២០១២ នៅចំណុចក្លឹបរាត្រីឌីជេស្តេសិន ដែលមានទីតាំងស្ថិតក្នុងសង្កាត់បឹងសាឡាង ខណ្ឌទួលគោក មានករណីផ្ទុះអាវុធបណ្តាលឲ្យយុវជនម្នាក់ស្លាប់ បង្កឡើងដោយឈ្មោះជុំ វណ្ណា។ ជុំ វណ្ណា បានបាញ់លើជនរងគ្រោះដើម្បីរារាំងកុំឲ្យវាយតប់គ្នាក្នុងហាង។ ក្រោយការស្រាវជ្រាវសមត្ថកិច្ចបានឃាត់ខ្លួនឈ្មោះ ជុំ វណ្ណា។
ដោយឡែកក្នុងសវនាការ ជនជាប់ចោទបដិសេធថាពុំបានប្រព្រឹត្តដូចការចោទប្រកាន់នោះទេ និងសូមឲ្យសាលាឧទ្ធរណ៍រកយុត្តិធម៌។ ប៉ុន្តែតំណាងមហាអយ្យការបានសន្និដ្ឋានឲ្យសាលាឧទ្ធរណ៍តម្កល់សាលក្រមសាលាដំបូងរាជធានីភ្នំពេញ ទុកជាបានការដដែល៕
ផ្ដន្ទាទោសអតីតកងរាជអាវុធហត្ថលើផ្ទៃប្រទេសម្នាក់ដាក់គុក១០ឆ្នាំ រឿងបាញ់សម្លាប់មនុស្ស
0 Comments