ព្រះសីហនុ ៖ នាព្រឹកថ្ងៃទី២៦ ខែកញ្ញា ឆ្នាំ២០១៥ ឯកឧត្ដមបណ្ឌិត ម៉ុង ឬទ្ធី ប្រធានគណៈកម្មការទី៣នៃព្រឹទ្ធសភា សហការជាមួយរដ្ឋបាលជលផលកំពង់សោមបានដាំកូនកោងកាងចំនួន១០.០០០ដើម នៅភូមិឬទ្ធី ឃុំកែវផុស ស្រុកស្ទឹងហាវ ខេត្តព្រះសីហនុ។
លោក នង ឌីណារ៉ា មេឃុំកែវផុសបានបញ្ជាក់ថា សក្ដានុពលព្រៃកោងកាងនៅក្នុងឃុំកែវផុសមានប្រមាណជា៥០០ហិកតា សម្រាប់លទ្ធផលដែលយើងទទួលបានពីដើមកោងកាង ហើយការដាំដុះកូនកោងកាងនៅក្នុងតំបន់ព្រៃរេចរឹល ដោយមានការជួយឧបត្ថម្ភពីឯកឧត្ដមបណ្ឌិត ម៉ុង ឬទ្ធី សហការ នឹងរដ្ឋបាលជលផល បានយកកូនកោងកាងមកដាំនេះ ពិតជាល្អសម្រាប់ប្រជាពលរដ្ឋប្រជានេសាទនៅឃុំកែវផុស នៅឃុំកែវផុស យើងមានសហគមន៍មួយដែលធ្វើការងារអភិរក្សធនធានធម្មជាតិ ធនធានមច្ឆាជាតិនៅក្នុងសមុទ្រ ហើយព្រៃលិចទឹកនេះជានិរន្តរភាពនៃការកកើតមច្ឆាជាតិ និងជីវចម្រុះក្នុងសមុទ្រនៅឃុំកែវផុសកាន់តែមានការរីកចម្រើនបន្ថែមទៀត ដើម្បីឲ្យប្រជាពលរដ្ឋទទួលបានផលនៃព្រៃកោងកាង រួមចំណែកថែរក្សា និងអភិរក្ស។
ឯកឧត្ដមបណ្ឌិត ម៉ុង ឬទ្ធី បានមានប្រសាសន៍ថា ការដាំកូនកោងកាងនាពេលនេះដោយមានការចូលរួមពីប្រជាពលរដ្ឋ សិស្សានុសិស្ស និងអាជ្ញាធរដែនដី បានចូលរួមដាំកូនកោងកាងជាលើកទី១ ក្នុងឃុំកែវផុសរបស់យើង។ ទីតាំងដែលយើងនាំគ្នាដាំកូនកោងកាងនាពេលនេះ ដោយសារតែមានការបំផ្លិចបំផ្លាញពីជនខិលខូចមួយចំនួនមកធ្វើការកាប់បំផ្លាញដោយយើងមិនបានដឹង ហើយនៅពេលយើងបានសហការជាមួយនឹងរដ្ឋបាលជលផលមានគំនិតរួមគ្នា យកកូនកោងកាងមកធ្វើការដាំដុះឡើងវិញ ឯកឧត្ដមបណ្ឌិតឧបត្ថម្ភថវិកាក្នុងការទិញកូនកោងកាងចំនួន១០.០០០ដើម តែប្រសិនបើដាំនៅខ្វះខាងរដ្ឋបាលជលផល នឹងធានាយកកូនកោងកាងមកដាំបន្ថែមទៀតក្នុងផ្ទៃដីចំនួន១០ហិកតា។
ឯកឧត្ដមសង្ឃឹមថា ក្រោយពីយើងធ្វើការដាំដុះកូនកោងកាងថ្មីលើកទី១នៅទីនេះ មិនមានជនពីខាងក្រៅណាមកកាប់បំផ្លាញទៀតទេ ព្រោះការកាប់បំផ្លាញពីមុនមកមិនមែនប្រជាជនកែវផុសទេ គឺជាប្រជាជនមកពីខាងក្រៅជួលគេឲ្យមកកាប់បំផ្លាញ។ ហើយក្រោយពីការដាំពេលនេះ ប្រជាពលរដ្ឋក្នុងឃុំកែវផុស នឹងមានការយល់ដឹងពីផលប្រយោជន៍នៃព្រៃកោងកាង ហើយប្រជានេសាទទទួលផលពីព្រៃកោងកាងនេះជាក់ជាមិនខាន។
ឯកឧត្ដមបណ្ឌិតសំណូមពរឲ្យប្រជានេសាទទាំងអស់ឈប់ប្រើប្រាស់ឧបករណ៍ខុសច្បាប់ ហើយខាងរដ្ឋបាលជលផលចូលរួមពិនិត្យមើលឧបករណ៍នេសាទ ព្រោះប្រជានេសាទរាល់ថ្ងៃគាត់មិនដឹងថា ឧបករណ៍ណាត្រូវច្បាប់ និងឧបករណ៍ណាខុសច្បាប់នោះទេ សូមជួយណែនាំពួកគាត់ ដើម្បីឲ្យពួកកាត់ធ្វើការនេសាទដោយស្របច្បាប់។ ប្រសិនបើពួកគាត់នេសាទមិនអាចចិញ្ចឹមជីវិតរស់ទេ សុំឲ្យលោកមេឃុំរាយការណ៍មក ដើម្បីយើងរកការងារផ្សេងឲ្យពួកគាត់រស់បាន នៅពេលមិនដែលបានហាមឃាត់ប្រើប្រាស់នូវឧបករណ៍ខុសច្បាប់ ដោយមិនទុកឲ្យគាត់ដាច់បាយនោះទេ យើងនៅមានការងារជាច្រើនទៀតសម្រាប់ប្រជាពលរដ្ឋក្នុងឃុំកែវផុស។
លោក នេន ចំរើន នាយខណ្ឌរដ្ឋបាលជលផលកំពង់សោមបានមានប្រសាសន៍ថ្លែងអំណរគុណឯកឧត្ដមបណ្ឌិត ម៉ុង ឬទ្ធី និងលោកជំទាវ ដែលបានអភិវឌ្ឍន៍នៅក្នុងតំបន់កែវផុសលើគ្រប់វិស័យ ប្រជាពលរដ្ឋដែលមានជំនាញខាងកម្មករឲ្យទៅធ្វើកម្មករ អ្នកចេះនេសាទឲ្យទៅធ្វើការនេសាទ។ ហើយការដាំកូនកោងកាងនាពេលនេះ គឺជាការសាងសង់នូវមន្ទីរសម្ភពរបស់មច្ឆាជាតិ មួយយ៉ាងសំខាន់ណាស់ ព្រោះព្រៃកោងកាងគឺជាទីកន្លែងកកើតពងកូនរបស់មច្ឆាជាតិគ្រប់ប្រភេទ ដូច្នេះមានមន្ទីរសម្ភព នឹងមានការកើតកូន ហើយអត្រារស់រានបានកាន់តែច្រើនថែមទៀត។ រដ្ឋបាលជលផលមានការគាំទ្រពីគណៈអភិបាលខេត្ត ក្រុមប្រឹក្សាខេត្ត និងមានការចង្អុលបង្ហាញពីរដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទ ឲ្យរដ្ឋបាលថ្នាក់ក្រោមជាតិអនុវត្តឲ្យមានប្រសិទ្ធភាព ដើម្បីរួមចំណែកក្នុងការកាត់បន្ថយភាពក្រីក្ររបស់ប្រជាពលរដ្ឋនៅមូលដ្ឋាន។
គួរបញ្ជាក់ថា ក្រៅពីការដាំកូនកោងកាង ឯកឧត្ដមបណ្ឌិត ម៉ុង ឬទ្ធី បានធ្វើការដាំកូនគ្រប់បែកចំនួន១០.០០០ដើម លើផ្ទៃដីចំនួន៥ហិកតា នៅឃុំកែវផុសផងដែរ៕
កូនកោងកាងចំនួន១០.០០០ដើម ត្រូវបានដាំដុះនៅឃុំកែវផុស
0 Comments