សម្តេច​តេ​ជោ សែន ៖ កិច្ចប្រជុំ​កំពូល UN រៀបចំឡើង​ក្រោម​ប្រធានបទ “​ការអភិវឌ្ឍន៍​ក្រោយ​ឆ្នាំ​២០១៥”

ភ្នំពេញ ៖ សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា បាន​មានប្រសាសន៍ថា កិច្ចប្រជុំ​កំពូល​របស់​អង្គការសហប្រជាជាតិ (UN) ឆ្នាំនេះ ស្តីពី​របៀបវារៈ​នៃ​ការអភិវឌ្ឍន៍​ក្រោយ​ឆ្នាំ​២០១៥ ក្រោម​ពាក្យស្លោក “​ដល់ពេល​សម្រាប់​ធ្វើ​សកម្ម​ភាពជា​សកល ដើម្បី​ប្រជាជន និង​ភពផែនដី​”។

សម្តេច​តេ​ជោ ហ៊ុន សែន មានប្រសាសន៍​បែបនេះ នៅក្នុង​សំណេរ​លើ​បណ្តាញ​សង្គម​ហ្វេ​ស​ប៊ុ​ក​របស់​សម្តេច ហើយ​ដែល​បាន​ផ្សព្វផ្សាយ​កាលពី​ព្រឹក​ថ្ងៃទី​២៦ ខែកញ្ញា ឆ្នាំ​២០១៥​។ សម្តេច​លើកឡើង​ថា “​កិច្ចប្រជុំ​កំពូល​របស់ UN ស្តីពី​របៀបវារៈ​នៃ​ការអភិវឌ្ឍន៍​ក្រោយ​ឆ្នាំ​២០១៥ ក្រោម​ពាក្យស្លោក ដល់ពេល​សម្រាប់​ធ្វើ​សកម្ម​ភាពជា​សកល ដើម្បី​ប្រជាជន និង​ភព​ផែន​ដី ហើយ​កិច្ចប្រជុំ​កំពូល​នេះ បាន​ប្រារព្ធ​បើក​ជា​ផ្លូវការ​នៅ​ទីស្នាក់ការ​ធំ​របស់ UN ក្នុង​បុរី New York USA កាលពី​ម៉ោង​១១ និង​៣០ នាទី​ព្រឹក ថ្ងៃទី​២៥ ខែកញ្ញា ឆ្នាំ​២០១៥”​។

តាម​សម្តេច​អគ្គមហាសេនាបតី​តេ​ជោ ហ៊ុន សែន បាន​បញ្ជាក់​ទៀត​ថា កិច្ចប្រជុំ​កំពូល​នោះ សម្តេច ប៉ូ​ប ហ្វ្រា​ន​ស៊ី​ស នៃ​បុរី​វ៉ា​ទី​កង់ (Pope Francis of Vatican) លោក បាន គី​មូ​ន (Ban Ki-moon) អគ្គលេខាធិការ UN រួម​ទាំង​ព្រះមហាក្សត្រ ស៊ុ​លត​ង់ (Sultan) ប្រមុខ​ដឹកនាំ​រដ្ឋ និង​គណៈប្រតិភូ​នៃ​បណ្តា​ប្រទេស​ជា​សមាជិក​របស់ UN ទាំង​១៩៣ ប្រទេស រួម​ទាំង​អង្គការ​អន្តរជាតិ បាន​យាង​និង​អញ្ជើញ​ចូលរួម​ក្នុង​កិច្ចប្រជុំ​ពិសេស​នេះ លើ​ការ​អនុម័ត​របៀបវារៈ​ស្តី​ពី​ការអភិវឌ្ឍន៍​ក្រោយ​ឆ្នាំ​២០១៥។

សម្តេច ប៉ូ​ប ហ្វ្រា​ន​ស៊ី​ស មាន​ព្រះរាជ​ហឫទ័យ​រីករាយ បាន​យាង​មក​ប្រារព្ធ​បើក​ព្រះ​រាជពិធី​នៃ​កិច្ចប្រជុំ​កំពូល UN រួមជា​មួយ លោក បាន គី មូ​ន អគ្គលេខាធិការ UN ហើយ​សម្តេច ប៉ូ​ប ហ្វ្រា​ន​ស៊ី​ស បាន​មានប្រសាសន៍​គូសបញ្ជាក់​ផង​ដែរ​ថា របៀបវារៈ​អភិវឌ្ឍន៍​ក្រោយ​ឆ្នាំ​២០១៥ ដែល​កិច្ចប្រជុំ​កំពូល UN នឹងធ្វើ​ការអនុម័ត​នៅពេល​ខាងមុខ គឺ​ដើម្បី​ជំនួស​ឲ្យ​គោលដៅ​អភិវឌ្ឍន៍​សហស្សវត្ស​រ៍​របស់ UN ដែល​បាន​អនុម័ត​កាលពី​១៥ ឆ្នាំមុន​។ របៀបវារៈ​អភិវឌ្ឍន៍​ថ្មី​ក្រោយ​ឆ្នាំ​២០១៥ នេះ មាន​ឈ្មោះថា គោលដៅ​អភិវឌ្ឍន៍​ប្រកបដោយ​ចីរភាព​មាន​១៧ គោលដៅ និង​១៦៩ ចំណុច​។ គោលដៅ​និង​ចំណុច​សំខាន់ៗ​ទាំងនោះ នឹង​បំផុស​ឲ្យ​មាន​សកម្មភាព​ជាក់ស្តែង​សម្រាប់​រយៈពេល​១៥ ឆ្នាំ​ទៅមុខទៀត គិត​ចាប់ពី​ឆ្នាំ​២០១៥-២០៣០។

ចំណែក​លោក បាន គី​មូ​ន (Ban Kim-Moon) អគ្គលេខាធិការ UN មានប្រសាសន៍​បញ្ជាក់បន្ថែម​ផងដែរ​ថា គោលដៅ​អភិវឌ្ឍន៍​ប្រកបដោយ​ចីរភាព​នោះ គឺ​ចាត់ទុក​ប្រជាជន​ជា​ស្នូល​នៃ​ការអភិវឌ្ឍន៍ តាមរយៈ​ការ​លើកកម្ពស់​សុខមាលភាព​ប្រជាជន វិបុលភាព សន្តិភាព និង​យុត្តិធម៌​នៅ​លើ​ភពផែនដី ហើយ​បន្ត​គោរព​សិទ្ធិមនុស្ស និង​សមភាព​យេនឌ័រ​។ លោក​អគ្គលេខាធិការ UN បាន​សម្តែង​នូវ​ការ​សង្ឃឹម​យ៉ាង​មុតមាំ​ថា បណ្តា​មេដឹកនាំ​ពិភពលោក​ទាំង​អភិវឌ្ឍន៍ និង​កំ​ពុង​អភិវឌ្ឍន៍​ទាំងអស់ នឹងធ្វើ​ការប្តេជ្ញាចិត្ត​រួមគ្នា ក្នុងការ​អនុវត្ត​គោលដៅ​ទាំង​១៧ របស់ UN ដើម្បី​សម្រេចបាន​ជោគជ័យ​នូវ​កិច្ចការ​សំខាន់​បី ក្នុងអំឡុងពេល​១៥​ឆ្នាំ​ខាងមុខ គឺ​១ បំបាត់​ភាពក្រីក្រ​ទាំងស្រុង ២​ប្រយុទ្ធ​ប្រឆាំងនឹង​វិសមភាព នឹង​ភាពអយុត្តិធម៌ និង​៣ គឺ​ទប់ស្កាត់​ការប្រែប្រួល​ធាតុអាកាស​។​

បើ​តាម​សំណេរ​លើ​បណ្តាញ​សង្គម​ហ្វេ​ស​ប៊ុ​ក​របស់​សម្តេច​តេ​ជោ សែន បាន​ឲ្យ​ដឹងថា នៅក្នុង​ពិធី​បើក​កិច្ចប្រជុំ​កំពូល UN ថ្ងៃនេះ គឺ​មាន​បណ្តា​មេដឹកនាំ​ប្រទេស​នានា បាន​ធ្វើ​បទ​អន្តរាគមន៍​ទៅតាម​លំដាប់​លេខ​រៀង ហើយ​សម្តេច​នឹង​អញ្ជើញ​ឡើង​ថ្លែង​សុន្ទរកថា នៅ​ម៉ោង​១២ និង​៣០ នាទី​ថ្ងៃទី​២៦ ខែកញ្ញា ឆ្នាំ​២០១៥៕

 

សម្តេច​តេ​ជោ សែន ៖ កិច្ចប្រជុំ​កំពូល UN រៀបចំឡើង​ក្រោម​ប្រធានបទ “​ការអភិវឌ្ឍន៍​ក្រោយ​ឆ្នាំ​២០១៥”