រតនគីរី ៖ ទឹកស្អុយដែលហូរចេញពីលូ ធ្វើបានពាក់កណ្ដាលរបស់អាជ្ញាធរខេត្ត បណ្ដាលឲ្យប៉ះពាល់បរិស្ថាន ធ្វើឲ្យមជ្ឈដ្ឋានប្រជាពលរដ្ឋ ខ្សឹបខ្សាវបានរិះគន់យ៉ាងខ្លាំង។ ជាក់ស្តែងកាលពីថ្ងៃទី២១ខែតុលាឆ្នាំ២០១៥នេះ លូមួយខ្សែបង្ហូរទឹកស្អុយអាសើចចេញពីក្រុងបានលុង ដែលជាគម្រោងស្ថាបនា ដោយអាជ្ញាធរខេត្ត បានរៀបចំត្រឹមតែពាក់កណ្ដាល ហើយទុកចោលឲ្យទឹកស្អុយហូរ ចេញពាសវាលពាសកាល ជាច្រើនខែ តាមបណ្ដោយដងផ្លូវជាតិលេខ៧៨A ចេញពីក្រុងបានលុងទៅស្រុកអូរជុំ ស្ថិតនៅភូមិទេសអន្លុង សង្កាត់បឹងកន្សែង ក្រុងបានលុង ខេត្តរតនគិរី ត្រង់ចំណុចមុខសាលាបឋមសិក្សា ឡាបានសៀក អាជ្ញាធរខេត្តហាក់ដូចជាមិនរវល់អើពើ ធ្វើឲ្យសិស្សានុសិស្ស អ្នកធ្វើដំណើរ ជាពិសេសប្រជាពលរដ្ឋរស់នៅតំបន់នោះ រងនូវក្លិនស្អុយឆ្អាប ប៉ះពាល់ដល់សុខភាព របស់ពួកគាត់។ លោក សូរ សំណាង ប្រធានមន្ទីរ សាធារណការខេត្តរតនគីរី បានឲ្យដឹងតាមទូរស័ព្ទថា ការធ្វើលូបង្ហូរទឹកស្អុយចេញពីក្រុងបានលុងនេះគឺគម្រោងរបស់ខេត្ត បានម៉ៅការឲ្យក្រុមហ៊ុនមួយធ្វើបានត្រឹមនេះក៏ផ្អាកទៅ ពីព្រោះអាជ្ញាធរខេត្តមានលុយធ្វើតែត្រឹមហ្នឹង ឆ្នាំក្រោយទើបធ្វើបន្តទៅទៀត។ ជុំវិញករណីទឹកស្អុយហូរតាមដងផ្លូវនេះ លោក ញែម សំអឿន អភិបាលរងខេត្តរតនគីរី បានបញ្ជក់តាមទូរស័ព្ទថា លោកពុំទាន់បានដឹងទេ ចាំមើលខាងភូមិ-សង្កាត់ រាយការណ៍មកក្រុង ជាមួយខាងមន្ទីរ ពីព្រោះមួយរយៈនេះលោកជាប់រវល់។ អភិបាលក្រុងបានលោក អ៊ុក សំអុល បានឲ្យដឹងថា លូបង្ហូរទឹកស្អុយចេញពីក្រុងនេះ ជាគម្រោងរបស់ខេត្ត អញ្ចឹងលោកមិនដឹងនោះទេ ខេត្តជាអ្នកធ្វើ ខេត្តទទួលខុសត្រូវ មិនចាំបាច់លោករាយការណ៍ទេខេត្តធ្វើ ខេត្តគេដឹងខ្លួនគេហើយ។ ទោះជាយ៉ាងណា ប្រជាពលរដ្ឋដែលទទួលរងការផលប៉ះពាល់ ពួកគាត់មិនហ៊ានបញ្ចេញមតិទេ បានត្រឹមតែលួចរអ៊ូរទាំតែ ប៉ុណ្ណោះថាធុំក្លិនពិបាកដកដង្ហើមណាស់ក្នុងការហូបចុក តែប៉ុណ្ណោះ។
គ្រាន់តែរឿងការអភិវឌ្ឍន៍បន្តិចបន្តួចក្នុងខេត្តមន្ត្រីទាំងនោះឆ្លើយដាក់គ្នាដូចខ្យងតែបើប្រព្រឹត្តិអំពើពុករលួយវិញមន្ត្រីទាំងនោះប៉ិនប្រសព្វណាស់ម្នាក់ៗមានកប់ពពក៕
លូទឹកស្អុយហូរតាមបណ្តោយផ្លូវ78Aជាប់មុខសាលាបឋមសិក្សាឡា បានសៀកអស់រយៈពេលជាច្រើនខែមកហើយ
0 Comments