កាលពីថ្ងៃអាទិត្យ កន្លងមកនេះ ប្រទេសសិង្ហបុរី បានជំរុញសូមឲ្យបណ្ដាប្រទេសដែលជាសមាជិកអាស៊ាន ធ្វើសកម្មភាពឲ្យមានការសម្រេចចិត្ដ និងយ៉ាងម៉ឺងម៉ាត់ ប្រឆាំងនឹងផ្សែងអ័ព្ទ ដែលនៅតែបន្ដសាយភាយនៅទូទាំងតំបន់ ពេលឈានឆ្ពោះទៅជំនួបប្រជុំនៃក្រុមប្រទេសអាស៊ាន នៅក្នុងប្រទេសម៉ាឡេសីុ ដែលនឹងប្រព្រឹត្ដទៅនៅខែក្រោយនេះ។
រដ្ឋ-ទីក្រុង (សិង្ហបុរី) ជាប្រទេសមួយដែលរងការប៉ះពាល់យ៉ាងអាក្រក់ខ្លាំងបំផុត ដោយសារតែអ័ព្ទផ្សែងដែលបក់មកពីភ្លើងឆេះព្រៃនៅតំបន់ដីគោកក្នុងប្រទេសឥណ្ឌូនេស៊ី បន្ទាប់ពីកងទ័ព និងក្រុមពន្លត់អគ្គិភ័យសិង្ហបុរី បានវិលត្រឡប់មកពីបេសកកម្មជំនួយអន្ដរជាតិ នៅកោះស៊ូម៉ាត្រា ប្រទេសឥណ្ឌូនេស៊ី វិញនោះ។
ក្រសួងការបរទេសនៃប្រទេសសិង្ហបុរី (MFA) បានថ្លែងនៅក្នុងសេចក្ដីប្រកាសមួយថា អាស៊ាន ត្រូវតែមានសកម្មភាពដោយការសម្រេចចិត្ដ និងយ៉ាងមុឺងម៉ាត់ តាមរយៈសហប្រតិបត្ដិការនៅក្នុងតំបន់ដើម្បីជួយបង្ការនូវការកើតមានជារឿយៗឡើងវិញនៃបញ្ហាឆ្លងដែនបែបនេះ។
ប្រទេសសិង្ហបុរី នឹងធ្វើកិច្ចការងារយ៉ាងជិតស្និទ្ធជាមួយបណ្ដាប្រទេសអាស៊ានដទៃទៀត ដើម្បីបើកប្រតិបត្ដិការពេញលក្ខណៈនៃប្រព័ន្ធគ្រប់គ្រងផ្សែងអ័ព្ទកើតមានទូទាំងអាស៊ានបែបនេះ។
ផ្សែងអ័ព្ទ បានសម្លាប់មនុស្សអស់យ៉ាងតិច១០នាក់ នៅប្រទេសឥណ្ឌូនេស៊ី ហើយបានបង្កឲ្យកើតមានជំងឺផ្លូវដង្ហើមដល់មនុស្សប្រមាណកន្លះលាននាក់ នេះបើយោងតាមការលើកឡើងពីអាជ្ញាធរក្រុងហ្សាការតា ពេលដែលផ្សែងអ័ព្ទបាននិងកំពុងតែបន្ដរសាត់ទៅក្នុងប្រទេសសិង្ហបុរី ម៉ាឡេសីុ ថៃឡង់ដ៍ និងហ្វីលីពីន ថែមទៅទៀតនាឆ្នាំនេះ។
គួររំលឹកថា ថ្នាក់ដឹកនាំនៃប្រទេសទាំង១០ដែលជាសមាជិកសហគមន៍អាស៊ាន នឹងបើកជំនួបប្រជុំមួយនៅក្រុងគូឡាឡាំពួរ នៅថ្ងៃទី១៩ ខែវិច្ឆិកា មុនពេលឈានចូលដល់ការបើកកិច្ចប្រជុំជាលក្ខណៈសមភាគីពីដៃគូពាណិជ្ជកម្មដ៏សំខាន់របស់ខ្លួនបន្ទាប់មកទៀតរយៈពេល២ថ្ងៃនោះ៕
AFP
ប្រទេសសិង្ហបុរី ជំរុញឲ្យអាស៊ាន ធ្វើសកម្មភាពពាក់ព័ន្ធនឹងផ្សែងអ័ព្ទ
0 Comments