*បាតុកម្មទាមទារឲ្យដកលោក កឹម សុខា ពីអនុប្រធានទី១រដ្ឋសភា ក្លាយអំពើហិង្សា បណ្តាលឲ្យតំណាងរាស្ត្រចំនួន២ រូបរងរបួស
ភ្នំពេញ ៖ លោក កឹម សុខា អនុប្រធានគណបក្សសង្គ្រោះជាតិ និងជាអនុប្រធានទី១ រដ្ឋសភាត្រូវបានប្រជាពលរដ្ឋប្រមាណជាង៣០០០នាក់ធ្វើបាតុកម្មទាមទារឲ្យចុះចេញពីតំណែងអនុប្រធានទី១រដ្ឋសភា ដោយសំអាងថា បានឲ្យធ្វើឲ្យខ្មែរបែកបាក់សាមគ្គី កុហកប្រជាពលរដ្ឋរឿងលុយ៤ ម៉ឺនរៀល និងរើសអើងពូជសាសន៍ ជាពិសេសពួកគេបានបញ្ជាក់ថា លោក កឹម សុខា គ្មានសមត្ថភាពធ្វើជាអនុប្រធានទី១ រដ្ឋសភាទេ។
ការទាមទារនេះ បានធ្វើឡើងកាលពីព្រឹកថ្ងៃទី២៦ ខែតុលា ឆ្នាំ២០១៥ នៅមុខមន្ទីររដ្ឋសភាជាតិ និងនៅមុខផ្ទះរបស់លោក កឹម សុខា ដែលស្ថិតនៅសង្កាត់បឹងកក់ទី២ ខណ្ឌទូលគោក ហើយការផ្ទុះបាតុកម្មទាមទារនេះ បានធ្វើឡើងខណៈដែលរដ្ឋសភាកំពុងបន្តសម័យប្រជុំ របស់ខ្លួន ដើម្បីអនុម័តសេចក្តីព្រាងច្បាប់មួយចំនួន ប៉ុន្តែបាតុកម្មនោះក៏បានក្លាយជាអំពើហិង្សាទៅលើអ្នកតំណាងរាស្ត្រគណបក្សសង្គ្រោះជាតិផងដែរ។
ជាការកត់សម្គាល់ នៅវេលាម៉ោងប្រមាណ៨ ព្រឹកក្រុមបាតុករទាំងនោះ បាននាំគ្នាទៅដល់មុខមន្ទីររដ្ឋសភា ហើយបាននាំគ្នាលើកបដា ដោយសរសេរឈ្មោះរបស់លោក កឹម សុខា មានខ្លឹមសារផ្សេងៗ និងបាននាំគ្នាឈរស្រែកតវ៉ា ក្នុងខ្លឹមសារផ្សេងៗ ជាពិសេសទាមទារឲ្យរដ្ឋសភាដកតំណែងលោក កឹម សុខា ពីអនុប្រធានទី១ រដ្ឋសភា ហើយបន្ទាប់ពីតំណាងរដ្ឋសភាទទួលញត្តិ ពួកកាត់បាននាំគ្នាហែក្បួនទៅផ្ទះលោក កឹម សុខា បន្តទៀត។
បើតាមការសង្កេតជាក់ស្តែង ការចេញមកធ្វើបាតុកម្មរបស់ប្រជាពលរដ្ឋ ក៏ដូចជាយុវជនទាំងនោះ ពួកគាត់មិនបានបញ្ចេញអត្តសញ្ញាណថា មកពីគណបក្សណានោះទេ ប៉ុន្តែហាក់ដូចជាមានការរៀបចំទុក ពីតាមបណ្តាខណ្ឌទាំង១២ ក្នុងរាជធានីភ្នំពេញ ហើយការធ្វើបាតុកម្មនេះ មិនមានការហាមឃាត់ ឬរារាំងពីសំណាក់អាជ្ញាធរមានសមត្ថកិច្ចនោះទេ។
លោក ប៉ាន់ ប៊ុនថន ជាតំណាងបាតុករ ហើយដែលគេស្គាល់ថា ជាប្រធានយុវជនសម្ព័ន្ធសេនានាគ និងជាពិធីកររបស់ស្ថានីយទូរទស្សន៍អប្សរា ហើយជាអ្នកដឹកនាំធ្វើបាតុកម្ម នៅមុខរដ្ឋសភាបានថ្លែងទៅកាន់អ្នកចូលរួមថា ប្រទេសកម្ពុជាបានសុខសប្បាយជាង៣០ ឆ្នាំមកហើយ ប៉ុន្តែគេឃើញដំណាក់កាលចុងក្រោយនេះ បន្ទាប់ពីលោក កឹម សុខា ចូលឆាកនយោបាយ ក៏ដូចជាកាន់តំណែងជាអនុប្រធានទី១រដ្ឋសភា បានធ្វើឲ្យមានបញ្ហាផ្សេងៗ ជាពិសេសបញ្ហាសន្តិសុខសណ្ដាប់ធ្នាប់ និងរបៀបរៀបរយនៅក្នុងសង្គម ដោយការធ្វើបាតុកម្មផ្សេងៗ ហើយបញ្ហាសំខាន់ទៀត គឺធ្វើឲ្យប្រជាពលរដ្ឋមានការរើសអើងគ្នាទៅវិញទៅមក។
លោក ប៉ាន់ ប៊ុនថន បានលើកឡើងទៀតថា ក្រៅពីបញ្ហាខាងលើនេះ លោក កឹម សុខា ក៏បានញុះញង់លើបញ្ហាព្រំដែន ដែលនាំឲ្យមានការរើសអើង និងប្រកាន់ពូជសាសន៍ផងដែរ។ ដោយឡែកអ្នកចូលរួមផ្សេងៗទៀត ក៏បានលើកឡើងប្រហាក់ប្រហែលគ្នាផងដែរ និងបាននាំគ្នាហែជុំវិញសួនច្បារខាងមុខរដ្ឋសភា ព្រមទាំងស្រែកខ្លាំងៗឲ្យលោក កឹម សុខា ចុះចេញពីតំណែង។
រហូតដល់វេលាម៉ោង១១ ព្រឹកថ្ងៃទី២៦ ខែតុលា ឆ្នាំ២០១៥ នេះ ក្រុមបាតុករ ដែលបានធ្វើការតវ៉ាឲ្យលោកកឹម សុខា ចុះចេញពីតំណែងតាំងពីព្រឹកព្រលឹមមកនោះ បាននាំគ្នារំសាយជាបណ្ដើរៗហើយ បន្ទាប់ពីលោកស្រីឡោក ផេង តំណាងឲ្យរដ្ឋសភាបានចេញមកទទួលញត្តិរបស់ពួកគេ។
ចំណែកលោកស្រី ឡោក ផេង តំណាងគណៈកម្មការទី១នៃរដ្ឋសភាបានថ្លែងទៅកាន់បាតុករខណៈពេលចេញទទួលញត្តិប្រជាពលរដ្ឋនៅខាងមុខរដ្ឋសភាថា លោកស្រីនឹងយកញត្តិនេះដាក់ជូនប្រធានរដ្ឋសភាដើម្បីសម្រេច។ លោកស្រីបញ្ជាក់ថា សកម្មភាពនៃការតវ៉ានៅព្រឹកនេះបានបញ្ជាក់ពីការអនុវត្តលទ្ធិប្រជាធិបតេយ្យពេញលេញមួយរបស់ប្រជាពលរដ្ឋម្ចាស់ឆ្នោត ហើយការទាមទារឲ្យដកតំណាងលោក កឹម សុខា ដែលជាអនុប្រធានទី១ នៃរដ្ឋសភានោះ ក៏ជាលើកទី១ផងដែរ។
ដោយឡែកសង្គមស៊ីវិល ដែលបានតាមដានសកម្មភាពនៃការតវ៉ានេះ គឺលោក អំ សំអាត ដែលជាមន្ត្រីស៊ើបអង្កេតមកពីអង្គការលីកាដូ បានថ្លែងប្រាប់ក្រុមអ្នកសារព័ត៌មាននៅខាងមុខមន្ទីររដ្ឋសភាដែរថា នេះគឺជាការអនុវត្តសិទ្ធិបញ្ចេញមតិនៅក្នុងប្រទេសលទ្ធិប្រជាធិបតេយ្យ មួយ ហើយសកម្មភាពនៃការតវ៉ានេះ គឺពួកគាត់បានអនុវត្តសិទ្ធិរបស់ខ្លួនយ៉ាងពេញលេញ ប៉ុន្តែទោះជាយ៉ាងណាលោក អំ សំអាត បានថ្លែងថា ការអនុវត្តសិទ្ធិនៃការបញ្ចេញមតិជាមួយក្រុមផ្សេងនៅមិនទាន់បានពេញលេញដូចគ្នានេះទេ។
យោងតាមញត្តិរបស់ក្រុមប្រជាពលរដ្ឋ ដែលដាក់ជូនទៅរដ្ឋសភាបានលើកឡើងថា “យើងខ្ញុំទាំងអស់គ្នាជាប្រជាពលរដ្ឋក្នុងរាជធានីភ្នំពេញ ដែលមានស្នាមមេដៃតំណាងដូចខាងក្រោមសូមគោរពជូន សម្ដេច ប្រធានរដ្ឋសភាមេត្តាជ្រាបថា រយៈពេលកន្លងមកនេះ ឯកឧត្ដមកឹម សុខា អនុប្រធានរដ្ឋសភា និងជាអនុប្រធានគណបក្សសង្គ្រោះជាតិ បានធ្វើសកម្មភាពឃោសនា បោកប្រាស់ញុះញង់ បំបែកបំបាក់ បង្កអស្ថិរភាព ព្រមទាំងធ្វើការអុកឡុក បង្កឲ្យមានកំហឹងពូជសាសន៍ និងអាចឈានបង្កឲ្យមានសង្គ្រាមកើតមានក្នុងផ្ទៃប្រទេស ដែលសកម្មភាពទាំងនេះគឺពិតជាមិនសក្ដិសមជាថ្នាក់ដឹកនាំស្ថាប័នកំពូលរបស់ជាតិទេ”។
ញត្តិលើកឡើងទៀតថា “ដើម្បីរក្សាបាននូវសន្តិភាព សុវត្ថិភាព ស្ថិរភាពល្អប្រសើរដូចពេលសព្វថ្ងៃ ពិសេសរក្សាបាននូវសន្តិភាពពេញបរិបូណ៌ សាមគ្គីភាព និងឯកភាពជាតិ ទឹកដី មានតម្លៃមហាសាលមិនអាចកាត់ថ្លៃបាន ដែលប្រជាពលរដ្ឋចង់បាន យើងខ្ញុំទាំងអស់គ្នាគោរពស្នើសុំដោយទទូចដល់សម្ដេច ប្រធានរដ្ឋសភា និងអ្នកតំណាងរាស្ត្រទាំងអស់ មេត្តាដកឯកឧត្ដមកឹម សុខា ចេញពីតំណែងជាអនុប្រធានរដ្ឋសភា ឲ្យបានឆាប់បំផុត ដើម្បីឲ្យប្រជាពលរដ្ឋជាម្ចាស់ឆ្នោតមានអារម្មណ៍រស់នៅក្នុងភាព សុខដុមរមនា និងប្រកបមុខរបររស់នៅប្រចាំថ្ងៃបានជាប្រក្រតី។ យើងខ្ញុំទាំងអស់គ្នាសង្ឃឹម និងជឿជាក់ថា សម្ដេច ប្រធានរដ្ឋសភា ក៏ដូចជាអ្នកតំណាងរាស្ត្រទាំងអស់នឹងចាត់វិធានការតាមការស្នើសុំរបស់ យើងខ្ញុំដែលជាប្រជាពលរដ្ឋម្ចាស់ឆ្នោត”។
ទាក់ទងនិងការធ្វើបាតុកម្មទាមទារទម្លាក់លោក កឹម សុខា នេះ កម្ពុជាថ្មីនៅមិនទាន់សុំការបញ្ជាក់ពីមន្ត្រីអ្នកនាំពាក្យគណបក្សសង្គ្រោះជាតិបាននៅឡើយទេ ដោយទូរស័ព្ទពុំមានអ្នកទទួល ប៉ុន្តែលោក ម៉ៅ មុនីវណ្ណ តំណាងរាស្ត្រគណបក្សសង្គ្រោះជាតិមណ្ឌលខេត្តកំពង់ចាមបានសរសេរលើបណ្តាញហ្វេសប៊ុករបស់ខ្លួនយ៉ាងខ្លីថា ការធ្វើបាតុកម្មនោះ ជាការរៀបចំដោយបក្សកាន់អំណាច។
លោកបញ្ជាក់ថា “គណបក្សកាន់អំណាចធ្វើបាតុកម្មត្រៀមខ្លួនធ្វើជាគណបក្សប្រឆាំង។ គណបក្សកាន់អំណាចបានរៀបចំបាតុកម្មប្រឆាំងលោកប្រធានស្ដីទី កឹម សុខា អនុប្រធានទី១ រដ្ឋសភា។ នេះបញ្ជាក់ថា គណបក្សកាន់អំណាចកំពុងត្រៀមខ្លួនរួចជាស្រេច ដើម្បីធ្វើជាគណបក្សប្រឆាំងនៅឆ្នាំ២០១៨ ខាងមុខ”។
ចំណែកលោក ឈឹម ផលវរុណ មន្ត្រីអ្នកនាំពាក្យគណបក្សប្រជាជនកម្ពុជា បានមានប្រសាសន៍ប្រាប់កម្ពុជាថ្មីថា ការធ្វើបាតុកម្មនោះ វាពិបាកកំណត់ថា ពីគណបក្សណា ដោយសារតែការរៀបចំនោះ ផ្អែកទីលើទិដ្ឋភាពជាក់ស្តែងទាក់ទង និងលក្ខណៈសម្បត្តិរបស់លោក កឹម សុខា តែទម្រង់យ៉ាងម៉េចនោះ យើងមិនដឹងទេ គ្រាន់តែបាតុកម្មនោះធ្វើឡើងដោយសន្តិវិធី គឺការល្អ។
លោកបញ្ជាក់ថា “បើពិនិត្យទៅលើសេរីភាពនៃការធ្វើបាតុកម្ម វាមិនខុសពីអ្វី ដែលគណបក្សសង្គ្រោះជាតិធ្លាប់បានធ្វើនោះទេ ពីព្រោះគណបក្សសង្គ្រោះជាតិធ្លាប់បានធ្វើដូចនៅបារាំងកាលពីថ្មីៗនេះជាដើម ទាមទារឲ្យនាយករដ្ឋមន្ត្រីចុះចេញពីតំណែង ដូច្នេះសេរីភាពបែបនេះមិនមែនមានតែគណបក្សសង្គ្រោះជាតិទេ គណបក្សផ្សេងក៏គេមានដែរ បើគេចង់ប្រើ”។
តាមលោក ឈឹម ផលវរុណ បានបញ្ជាក់ថា “តាមទម្រង់នៃការធ្វើបាតុកម្មនេះ មិនមានអីខុសទេ ប្រសិនបើគណបក្សសង្គ្រោះជាតិគោរពនូវលក្ខណៈប្រជាធិបតេយ្យ យើងត្រូវដឹងថា គោលការណ៍កៅអីអនុប្រធានទី១រដ្ឋសភា ជាកៅអីកូតាគណបក្សសង្គ្រោះជាតិ តែមិនមែនសម្រាប់លោក កឹម សុខា ទេ វាអាស្រ័យទៅនឹងសន្លឹកឆ្នោតគាំទ្រ ហើយគណបក្សសង្គ្រោះជាតិមិនអាចមានសម្លេងគាំទ្រគ្រប់គ្រាន់សម្រាប់កៅអីនោះទេ ប្រសិនបើគ្មានការគាំទ្រពីគណបក្សប្រជាជនកម្ពុជា ដូច្នេះលោក កឹម សុខា ក៏ត្រូវតែដឹងដែរថា ប្រសិនបើប្រជាពលរដ្ឋធ្វើការទាមទារ ហើយគណបក្សប្រជាជនកម្ពុជា គោរពទៅតាមការទាមទាររបស់ប្រជាពលរដ្ឋ ហើយស្នើទៅប្រធានរដ្ឋសភា និងបើប្រធានរដ្ឋសភាពិនិត្យទៅតាមការទាមទារហ្នឹង សំឡេងភាគច្រើនគាំទ្រលោក កឹម សុខា ទៅតាមហ្នឹងហើយ ប្រជាធិបតេយ្យមានខុសអី ពីព្រោះគណបក្សដទៃៗក៏មានសិទ្ធិធ្វើដូចគ្នាដែរ”។
ទោះជាយ៉ាងណាការធ្វើបាតុកម្មនេះ បានឈានទៅដល់ការប្រើអំពើហិង្សាទៅលើអ្នកតំណាងរាស្ត្រគណបក្សសង្គ្រោះជាតិផងដែរ គឺនៅវេលាម៉ោងប្រមាណ១២ និង៣០ នាទីថ្ងៃត្រង់ បន្ទាប់ពីបញ្ចប់កិច្ចប្រជុំរដ្ឋសភា តំណាងរាស្ត្រ២រូបរបស់គណបក្សសង្គ្រោះជាតិ គឺលោក គង់ សុភា និងលោក ញ៉យ ចំរើន ត្រូវបានក្រុមបាតុករវាយតប់ឲ្យរងរបួស ហើយបានបញ្ជូនទៅកាន់មន្ទីរពេទ្យភ្លាមៗ។
លោក ញ៉យ ចំរើន តំណាងរាស្ត្រមណ្ឌលកំពង់ចាមគណបក្សសង្គ្រោះជាតិ បានថ្លែងប្រាប់អ្នកសារព័ត៌មាន ក្រោយពីទទួលរងអំពើហិង្សានោះថា នៅម៉ោងជិត១២ថ្ងៃត្រង់ ពេលលោកនិងតំណាងរាស្ត្រមួយរូបទៀត គឺលោក គង់ សភា ជាតំណាងរាស្ត្រមណ្ឌលស្វាយរៀងចេញពីប្រជុំសភាតាមទ្វារក្រោយស្រាប់តែមានហិង្សាកើតឡើងតែម្តង។
លោកបន្តថា លោករងរបួស បែកក្បាល របួសមុខ និងអាចនឹងបាក់កដៃ ហើយតំណាងរាស្ត្រមួយរូបទៀត គឺលោក គង់ សភា ក៏រងរបួសបែកក្បាលផងដែរ តែលោកមិនដឹងពីស្ថានភាពរបស់លោកនៅឡើយទេ។
ចំពោះការផ្ទុះអំពើហិង្សានេះដែរ ការិយាល័យរបស់នៅមិនទាន់សុំការបញ្ជាក់ពីសមត្ថកិច្ចរាជធានី ក៏ដូចជាអ្នកនាំពាក្យក្រសួងមហាផ្ទៃបានទេ ប៉ុន្តែលោក ហ៊ុន ម៉ានី តំណាងរាស្ត្រមណ្ឌលខេត្តកំពង់ស្ពឺមកពីគណបក្សប្រជាជនកម្ពុជា បានថ្កោលទោសលើអំពើហិង្សានេះ។
លោក ហ៊ុន ម៉ានី សរសេរលើបណ្តាញហ្វេសប៊ុករបស់ខ្លួនថា “ក្នុងនាមជាតំណាងរាស្ត្រមួយរូបរបស់គណបក្សប្រជាជនកម្ពុជា ខ្ញុំតែងតែយកចិត្តទុកដាក់ចំពោះការតវ៉ា សំណូមពរ និងមតិយោបល់របស់ប្រជាជន ដោយគ្មានការរើសអើង នាពេលកន្លងមក ប៉ុន្តែខ្ញុំមិនគាំទ្រ និងថ្កោលទោសលើអំពើហិង្សា ដែលប្រព្រឹត្តលើប្រជាពលរដ្ឋ និងជាពិសេសលើតំណាងរាស្ត្រ ហើយសូមអំពាវនាវឲ្យអាជ្ញាធរមានសមត្ថកិច្ចអនុវត្តច្បាប់ ដើម្បីវែកមុខ និងដាក់ទោសដល់ជនដៃដល់ ដែលបានប្រព្រឹត្តអំពើហិង្សាទាំងនេះ ស្របតាមគោលការណ៍នីតិរដ្ឋនៃព្រះរាជាណាចក្រកម្ពុជា។
ដោយឡែកគណបក្សសង្គ្រោះជាតិ ក៏បានចេញសេចក្តីថ្លែងការណ៍ថ្កោលទោសចំពោះអំពើហិង្សានោះផងដែរ ដោយបានលើកឡើងថា អំពើហិង្សាដ៏ឃោរឃៅ និងព្រៃផ្សៃនេះ ជាអំពើរំលោភសិទ្ធិមនុស្សយ៉ាងធ្ងន់ធ្ងរ និងជាការរំលោភបំពានលើអភ័យឯកសិទ្ធិសភារបស់តំណាងរាស្ត្រ ដែលត្រូវបានការពារដោយច្បាប់រដ្ឋធម្មនុញ្ញនៃព្រះរាជាណាចក្រកម្ពុជា ហើយបានអំពាវនាវឲ្យសមត្ថកិច្ចចាត់វិធានការស្រាវជ្រាវ និងចាប់ខ្លួនមកផ្តន្ទាទោសតាមច្បាប់៕
លោក កឹម សុខា ត្រូវបានប្រជាពលរដ្ឋជាង៣០០០នាក់ទាមទារឲ្យចុះចេញពីអនុប្រធានទី១រដ្ឋសភា
0 Comments