ស្ទឹងត្រែង ៖ កម្លាំងការិយាល័យប្រឆាំងគ្រឿងញៀនខេត្តបានចាប់ខ្លួនជនជាតិខ្មែរ ឥស្លាមចំនួន២នាក់រួមនឹងវត្ថុតាងថ្នាំញៀនប្រភេទមេតំហ្វេតាមីន ម្សៅក្រាមពណ៌(I CE)សចំនួន៥កញ្ចប់តូច បញ្ជូនខ្លួនទៅកាន់តុលាការ។
ជនសង្ស័យទាំង២នាក់ត្រូវបានសមត្ថកិច្ចធ្វើការឃាត់ខ្លួនកាលពី វេលាម៉ោង១០និង៣០នាទីព្រឹកថ្ងៃទី២៥ ខែតុលា ឆ្នាំ២០១៥ ដោយម្នាក់ឃាត់ខ្លួននៅព្រំប្រទល់ខេត្តក្រចេះ និងម្នាក់ទៀតសមត្ថកិច្ចនៅក្នុងទឹកដីខេត្តស្ទឹងត្រែង។
សមត្ថកិច្ចបានឲ្យដឹងថា ជនសង្ស័យទាំង២នាក់ មានទី១.ឈ្មោះសាន់ យូ ភេទប្រុស អាយុ៣២ឆ្នាំ ជាកសិកររស់នៅភូមិភ្នំខៀវ ឃុំអូរគ្រៀង ស្រុកសំបូរ ខេត្តក្រចេះ ទី២.ឈ្មោះកុំ រី ភេទប្រុសអាយុ២៣ឆ្នាំ មុខរបរមិនពិតប្រាកដ មានទីលំនៅក្នុងភូមិគីឡូ៨ សង្កាត់សាមគ្គី ក្រុងស្ទឹងត្រែង។
សមត្ថកិច្ចបានបន្តថា ជនសង្ស័យទាំង២នាក់ជាមុខសញ្ញាចែកចាយគ្រឿងញៀន ហើយសមត្ថកិច្ចបានប្រើវិធានញុះញង់ ឲ្យមានការលក់ទិញ ទើបឈានទៅដល់ធ្វើការឃាត់ខ្លួនបាន២នាក់ជាបន្តបន្ទាប់ និងដកហូតវត្ថុតាងថ្នាំញៀនប្រភេទមេតំហ្វេតាមីន(ICE) ចំនួន៥កញ្ចប់តូច និងបានបញ្ជូនខ្លួនមកកាន់ស្នងការដ្ឋាននគរបាលខេត្តដើម្បីធ្វើការ សាកសួរ។
ជនសង្ស័យបានឆ្លើយសារភាពថា ខ្លួនបានទិញពីគេម្នាក់នៅក្នុងក្រុងនិងបានយកទៅធ្វើការចែកចាយបន្តទៀត ក្នុងមួយកញ្ចប់១០ម៉ឺនរៀលតែមិនទាន់បានធ្វើសកម្មភាពផងក៏ត្រូវបានសមត្ថកិច្ចចាប់ខ្លួនតែម្តង។
នៅព្រឹកថ្ងៃទី២៦នេះជនសង្ស័យទាំង២នាក់រួមនិងវត្ថុតាងត្រូវបានសមត្ថកិច្ចជំនាញបញ្ជូនខ្លួន ទៅកាន់តុលាការដើម្បីចាត់វិធានការតាមនីតិវិធី៕
បញ្ជូនជនជាតិខ្មែរឥស្លាម២នាក់ពាក់ព័ន្ធនឹងគ្រឿងញៀនទៅតុលាការ
0 Comments