កីឡាករ ចាន់ វឌ្ឍនាកា របស់ក្លិបបឹងកេតអង្គរ បានរងរបួសចង្កេះក្នុងប្រកួតវគ្គពាក់កណ្ដាលផ្ដាច់ព្រ័ត្រ(Play Off) នៃពានរង្វាន់មិត្តហ្វូនខេមបូឌានលីករដូវកាល ២០១៥ (Metfone Cambodian League 2015) ពេលប៉ះក្រុមណាហ្គាវើល កាលពីចុងសប្ដាហ៍កន្លងទៅនៅកីឡដ្ឋានកងយោធពលខេមរភូមិន្ទ (ស្ដាតចាស់)។
ចាន់ វឌ្ឍនាកា ដែលមហាជនជាច្រើនស្គាល់ថាជាអ្នករកគ្រាប់បាល់ច្រើនជាងគេប្រចាំរដូវកាល ២០១៥ នេះបានរងរបួសក្នុងតង់ទី១ ខណៈដែលរូបគេព្យាយាមដណ្ដើមបាល់ពីខ្សែការពាររបស់ណាហ្គាវើល នៅក្នុងតង់ទី១។ ចូលដល់តង់ទី២ លោក បែ មករា អ្នកចាត់ការទូទៅរបស់ក្រុមបានសម្រេចប្ដូរ រូបគេចេញហើយជំនួសវិញ ដោយខ្សែការពារ ធុល សុធារិទ្ធិ នៅនាទី ៤៦។
ភ្លាមៗនោះក្រោយចប់ការប្រកួតប្រភពមកពីក្លិបនៅមិនទាន់ហ៊ានអះអាងថារបួសរបស់គេអាចជាទាន់ក្នុងជំនួបជើងទី២ ជាមួយណាហ្គាវើល ឬយ៉ាងណានោះទេ ព្រោះត្រូវរង់ចាំគ្រូពេទ្យស្កែនមើលសិន។
លោក បែ មករា បានប្រាប់អ្នកសារព័ត៌មានថាក្រុមលោក មានបញ្ហាជាច្រើនក្នុងការប្រកួតនេះ ពោលគឺកីឡាករទាំងអស់មានពេលសម្រាកតិចតួច ព្រោះកម្មវិធីប្រកួតដែលរៀបចំដោយសហព័ន្ធកីឡាបាល់ទាត់កម្ពុជា កៀកៗគ្នាពេល ខណៈកីឡាករល្អៗ មួយចំនួនមានបញ្ហាសុខភាព។
បឹងកេតអង្គរ បានប្រកួតចាញ់ណាហ្គាវើល៣ទល់១ កាលពីថ្ងៃអាទិត្យទី២៥ ខែតុលា ឆ្នាំ ២០១៥។ ការប្រកួតបាន១៣នាទីកីឡាករ Barry របស់ណាហ្គាវើល បានរកគ្រាប់បាល់នាំមុខ១ទល់ ០ ហើយកីឡាករ ប្រាក់ ចាន់ រតនា បានគ្រាប់បាល់ទី២ នៅនាទី ៣៦ និងកីឡាករ ឃឹម បុរី ទី៣នៅនាទី ៤១ មុនចប់តង់ទី១។ ចូលដល់តង់ទី២ កីឡាករ Omogba របស់បឹងកេត បានរកគ្រាប់បាល់បាន១ គ្រាប់វិញ។
តាមគម្រោងដែលចេញដោយសហព័ន្ធកីឡាបាល់ទាត់កម្ពុជា ក្រុមណាហ្គាវើល និងបឹងកេតអង្គរ ត្រូវប្រកួតជើងទី២ នៅថ្ងៃទី៧ ខែវិច្ឆិកា ឆ្នាំ២០១៥ ដើម្បីកាត់សេចក្ដីថាតើក្រុមណារកបានកៅអីឡើងទៅវគ្គផ្ដាច់ព្រ័ត្រ ពានរង្វាន់ MCL 2015៕
កីឡាករចាន់ វឌ្ឍនាកា របួសចង្កេះ ពេលបឹងកេតជួបណាហ្គាវគ្គ Play Off ជើងទី១
0 Comments