ការបំផ្ទុះគ្រាប់បែកអត្ដឃាតមួយនៅព្រះវិហារមូស្លីមម៉ូស្កេតស៊ីអ៊ីត បានសម្លាប់យ៉ាងហោចណាស់មនុស្ស១០នាក់ នៅខេត្ដ Baluchistan នៃប្រទេសប៉ាគីស្ថាន។ នេះបើយោងតាមការលើកឡើងដោយក្រុមអាជ្ញាធរ។ ការវាយប្រហារនេះបង្ហាញឲ្យឃើញមានការបារម្ភខ្លាចកាន់តែខ្លាំងឡើង ចំពោះនិកាយសាសនានៅពេលប្រារព្ធពិធីបុណ្យតាមនិកាយស៊ីអ៊ីត ហៅថា ពិធី Ashura។
ការភ័យខ្លាចនៃអំពើហិង្សាត្រូវបានកើនឡើងនៅឆ្នាំនេះ បន្ទាប់ពីពួកតាលីបង់ ដែលចែកចេញជាក្រុមតូចៗសន្យាថា នឹងទៅចូលរួមជាមួយក្រុមរដ្ឋឥស្លាមនៅប្រទេសអ៊ីរ៉ាក់ និងស៊ីរីនោះ ដែលនោះគឺជាក្រុមសកម្មប្រយុទ្ធនិកាយ Sunni ហើយដែលផ្ដោតទៅលើការវាយប្រហារមកលើក្រុមដែលប្រកាន់និកាយស៊ីអ៊ីត។ ក្រុមអ្នកវិភាគនិយាយថា ក្រុមប៉ាគីស្ថាននិកាយ Sunni នេះហើយ ដែលចង់បញ្ចូលខ្លួនទៅក្នុងក្រុមរដ្ឋឥស្លាមIS នោះ។
មានកុមារ៦នាក់ ក៏ស្ថិតនៅក្នុងចំណោមជនរងគ្រោះបាត់បង់ជីវិតនោះដែរ ហើយនៅមានមនុស្សជាង២០នាក់ផ្សេងទៀតរងរបួសនៅក្នុងការវាយប្រហារកាលពីថ្ងៃព្រហស្បតិ៍ នៅក្នុងក្រុង Bhaag ចម្ងាយប្រមាណ២០០គីឡូម៉ែត្រភាគខាងកើតនៃក្រុងទីរួមខេត្ដ Quetta ដែលនេះជាការប្រាប់ឲ្យដឹងដោយនាយកនៃក្រសួងមហាផ្ទៃប្រចាំខេត្ដ លោក Mir Sarfaraz Ahmed Bugti ដល់ទីភ្នាក់ងារព័ត៌មាន Reuters។
លោកនិយាយថា នេះគឺជាការវាយប្រហារអត្តឃាត ហើយក្បាលរបស់អ្នកបំផ្ទុះគ្រាប់បែកត្រូវបានរកឃើញ។ នៅពុំទាន់មានការទទួលខុសត្រូវបានប្រកាសអះអាងនោះទេ ចំពោះការវាយប្រហារនោះ។
ខេត្ដ Baluchistan ស្ថិតនៅភាគខាងកើតនៃប្រទេសប៉ាគីស្ថាន រងការខ្ទេចខ្ទាំដោយសារអំពើហិង្សាពីក្រុមផ្ដាច់ខ្លួន ហើយក៏កាន់តែរីករាលដាលឡើងនៃការប្រកាន់និកាយសាសនាអស់រយៈពេលជាងមួយទសវត្សរ៍កន្លងមកហើយ៕
Reuters
បំផ្ទុះគ្រាប់បែកនៅឯព្រះវិហារមូស្លីម នៅប៉ាគីស្ថាន សម្លាប់មនុស្ស១០នាក់
0 Comments