ភ្នំពេញ ៖ នគរបាលព្រហ្មទណ្ឌខណ្ឌដង្កោ បានធ្វើការដឹកបញ្ជូនជនសង្ស័យពីរនាក់ទៅកាន់តុលាការរាជធានីភ្នំពេញ នារសៀល ថ្ងៃទី២៣ ខែតុលា ឆ្នាំ២០១៥ ផ្តន្ទាទោសតាមច្បាប់ ក្នុងករណីរក្សាទុកដោយខុសច្បាប់នូវសារធាតុញៀន។
ជនសង្ស័យទាំងពីរនាក់ ទី១ ឈ្មោះ សៅ សុផានិត ហៅ រ៉ូ ភេទប្រុស អាយុ២០ឆ្នាំ មុខរបររត់តុក្នុងហាង យីហោ ភូមិធម្មជាតិ ស្នាក់នៅក្នុងហាង ភូមិក្រាំងក្រូច សង្កាត់ទៀន ខណ្ឌដង្កោ និងមានស្រុកកំណើតនៅភូមិត្រប់ ឃុំត្រៀល ស្រុកកណ្ដាលស្ទឹង ខេត្តកណ្ដាល និងទី២ ឈ្មោះ ស្រ៊ុន ឡី ភេទប្រុស អាយុ២០ឆ្នាំ មុខរបររត់តុជាមួយគ្នា និងស្នាក់នៅជាមួយគ្នា មានស្រុកកំណើតនៅភូមិព្រែកអណ្ដូង ឃុំព្រែកក្របៅ ស្រុកកងមាស ខេត្តកំពង់ចាម។
សមត្ថកិច្ចប្រាប់ឲ្យដឹងថា មុនពេលឃាត់ខ្លួនជនសង្ស័យទាំង គឺកម្លាំងគណៈបញ្ជាការឯកភាពរដ្ឋបាលខណ្ឌដង្កោ ដឹកនាំដោយលោក តិមា សោភា អភិបាលរងខណ្ឌដង្កោ ដឹកនាំកម្លាំងចម្រុះ មានទាំងប៉ូលិស អាវុធហត្ថខណ្ឌ ក៏ដូចជាកម្លាំងសណ្តាប់ធ្នាប់សាលាខណ្ឌ ចុះដាក់គោលដៅត្រួតពិនិត្យអាវុធជាតិផ្ទុះ នៅចំណុចមុខវត្តសំបួរ តាមបណ្តោយផ្លូវ២១៧ ភូមិម័ល សង្កាត់ដង្កោ ខណ្ឌដង្កោ ដោយចាប់ផ្តើមដាក់គោលដៅពីម៉ោង ១៩ និង០០នាទី យប់ថ្ងៃទី២១ ខែតុលា ឆ្នាំ២០១៥ លុះរហូតដល់វេលាម៉ោង ១៩ និង១០នាទី ថ្ងៃខែដដែល ស្រាប់តែមានម៉ូតូ មួយគ្រឿង ម៉ាក មីអូ ពណ៌ខ្មៅ ពាក់ស្លាកលេខ ភ្នំពេញ 1W-2033 ជិះឌុបគ្នាពីរនាក់ បើកបរឆ្លងកាត់ចំណុចត្រួតពិនិត្យ ក្នុងទិសដៅពីជើងទៅត្បូង។ ប៉ុន្តែដោយមានការសង្ស័យសមត្ថកិច្ចបានហៅឲ្យឈប់ ដើម្បីធ្វើការត្រួតពិនិត្យរកមើលវត្ថុតាងពាក់ព័ន្ធបទល្មើស ស្រាប់តែជនសង្ស័យម្នាក់ដែលជិះនៅខាងក្រោយបាន យកកញ្ចប់ថ្នាំញៀនបោះចោលទៅលើដី តែត្រូវសមត្ថកិច្ចក្រឡេកភ្នែកឃើញទាន់ រើសយកមកពិនិត្យមើលឃើញ ក្រាមពណ៌សថ្លា ចំនួន ២កញ្ចប់ ក៏ឃាត់ខ្លួនយុវជនទាំងពីរនាក់តែម្តង។
សមត្ថកិច្ចប្រាប់បន្តឲ្យដឹងថា នៅចំពោះមុខសមត្ថកិច្ចជនសង្ស័យទាំងពីរនាក់ឆ្លើយសារភាពថា ថ្នាំញៀនទាំង២កញ្ចប់ គឺពួកគេ បានទិញពីគេ នៅម្តុំលូប្រាំ សង្កាត់ស្ទឹងមានជ័យ ខណ្ឌមានជ័យ ក្នុងតម្លៃ ១៥០០០រៀល សម្រាប់យកទៅប្រើប្រាស់ ប៉ុន្តែមិនទាន់ទាំងបានជក់ផង ក៏ត្រូវសមត្ថកិច្ចត្រួតពិនិត្យឃើញវត្ថុតាងឃាត់ខ្លួនពួកគេតែម្តង។
ក្រោយពីឃាត់ខ្លួនជនសង្ស័យទាំង២នាក់ ត្រូវបាននាំទៅកាន់អធិការដ្ឋាននគរបាលខណ្ឌដង្កោ ដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញ ចាត់ការតាមនីតិវិធី៕
បញ្ជូនជនសង្ស័យពីរនាក់ទៅតុលាការករណីរក្សាទុកនូវសារធាតុញៀន
0 Comments