កីឡាករ ប្រាក់ មុន្នីឧត្តម ប្រធានក្រុមបាល់ទាត់ស្វាយរៀងអែហ្វស៊ី បានផ្ញើសារតាមរយៈហ្វេសប៊ុករបស់ខ្លួនអរគុណដល់អ្នកគាំទ្រដែលតែងតែលើកទឹកចិត្ត និងគាំទ្រដល់ក្រុមរបស់ខ្លួនក្នុងពានរង្វាន់បាល់ទាត់មិត្តហ្វូនខេមបូឌានលីក ២០១៥ ទោះជាពេលនេះក្រុមគេអស់ឱកាសឡើងទៅលេងក្នុងវគ្គខ្វែង ដណ្ដើមពានក៏ដោយ។
ខ្លឹមសារទាំងស្រុងរបស់ ប្រាក់ មុន្នីឧត្តម បានសរសេរថា៖ «សូមអរគុណដល់អ្នកគាំទ្រខ្ញុំទាំងអស់ ជាពិសេសអ្នកគាំទ្រក្លិបបាល់ទាត់ស្វាយរៀង ផងដែរសម្រាប់ការគាំទ្រ និងកាផ្តល់កម្លាំងចិត្តដ៏អស្ចារ្យចាប់តាំងពីដើមរដូវកាល រហូតមកដល់ថ្ងៃប្រកួតចុងក្រោយ (២២ តុលាកន្លងទៅ) ដែលជាការប្រកួតបិទរដូវកាលសម្រាប់ក្លិបស្វាយរៀងយើង។ ក្នុងនាមជាប្រធានក្រុម ខ្ញុំសូមសម្តែងនូវការអរគុណដល់អ្នកទាំងអស់គ្នាយ៉ាងខ្លាំង ហើយនឹងប្តេជ្ញាថានឹងខិតខំប្រឹងប្រែងជួយក្លិបឲ្យបានល្អជាងនេះសម្រាប់រដូវកាលក្រោយៗទៀត។ សង្ឃឹមថានឹងបានឃើញការគាំទ្ររបស់ពុកម៉ែ បងប្អូនខ្លាំងជាងមុនទៀតសម្រាប់ខេត្តរបស់យើង»។
កីឡាករ ប្រាក់ មុន្នីឧត្តម មិនបានជួយក្រុមស្វាយរៀងអែហ្វស៊ី ពេញលេងនោះទេ ក្នុងរដូវកាលនេះ ព្រោះគេត្រូវរងរបួសក្រលៀនពេលប្រកួតជាមួយក្រុមបៀលប្រាយយូណាយធីត កាលពីជើងទី១ ហើយត្រូវចំណាយពេលព្យាបាលមួយរយៈធំទើបអាចជួយក្រុមបានវិញដូចដើម។
ប្រកួតចុងក្រោយស្វាយរៀងអែហ្វស៊ី បានយកឈ្នះក្រុមណាហ្គាវើល៤ទល់២ លើទីលានកីឡដ្ឋានខេត្តស្វាយរៀងរបស់ខ្លួន។ ប្រធានក្រុម ប្រាក់ មុន្នីឧត្តម ផ្ទាល់និងកីឡាករ Kipson រកគ្រាប់បាល់បានម្នាក់២ គ្រាប់ ស្របពេល ២ គ្រាប់របស់ណាហ្គា រកបានដោយកីឡាករ ជួន ជុំ និង កីឡាករ សុខ សំណាង របស់ស្វាយរៀង ភ្លាត់ស្នៀតធ្វើឲ្យចូលទីខ្លួនឯង។
ស្វាយរៀងអែហ្វស៊ី បានឈរចំណាត់ថ្នាក់លេខ១៦ ក្នុងពានរង្វាន់ MCL 2015 ក្រោយប្រកួតបាន ២២ លើកឈ្នះ ១០ លើកស្មើ ៥ លើកនិងចាញ់ ៧ លើក ព្រមទាំងទាត់ចូលទីគេបាន ៥១ គ្រាប់ តែគេទាត់ចូលវិញ ៤៤ គ្រាប់ មាន៣៥ ពិន្ទុក្នុងដៃ៕
ប្រាក់ មុន្នីឧត្តម អរគុណអ្នកគាំទ្រទោះជាក្រុមមិនបានឡើងទៅវគ្គខ្វែងក៏ដោយ
0 Comments