*ម៉ឺន សុភា ជួប Jongangfigth
ប្រដាល់ ៖ អ្នកប្រដាល់ជើងខ្លាំង ម៉ឺន សុភា សមាគមកីឡាក្រសួងការពារជាតិ នឹងត្រូវជួបជាមួយអ្នកប្រដាល់ថៃឈ្មោះ Jongangfigth Luk.Chompachai នាល្ងាចថ្ងៃទី២៥ ខែតុលា ឆ្នាំ២០១៥ នៅលើសង្វៀនបាយ័នស្ទឹងមានជ័យ។ ពួកគេទាំងពីរនឹងប្រកួតគ្នាក្នុងទម្ងន់៧០គីឡូក្រាម។
អ្នកប្រដាល់ថៃJongangfigthនេះ គេនៅចាំបានថា ជាសមាសភាពមួយរូបក្នុងចំណោមអ្នកប្រដាល់៤រូបដែលបានចូលរួមប្រកួតដណ្ដើមខ្សែក្រវាត់ខារ៉ាបាវវគ្គ២ ហើយដែលបានជ្រុះធ្លាក់បន្ទាប់ពីប្រកួតជុំចុងក្រោយវាយចាញ់ វង្ស ណយ អ្នកប្រដាល់ក្លិបខេត្តប៉ៃលិនដោយពិន្ទុ កាលពីថ្ងៃទី២៧ ខែកញ្ញា ឆ្នាំ២០១៥នោះ។
Jongangfigth បើតាមគិតទៅ គេប្រកួតលើសង្វៀនស្ទឹងមានជ័យនេះចំនួន៤លើកហើយ ដែលលើកទី១គេផ្តួល ឯម វុត្ថា អ្នកប្រដាល់ក្លិបឫទ្ធីពោធិសែនជ័យក្នុងទឹកទី៣ (០៧ មិថុនា២០១៥) លើកទី២ ចាញ់ បឺត ខាំ ក្លិបសាលវ័ន្តកីឡាក្នុងទឹកទី២(១៦សីហា២០១៥) លើកទី៣ ចាញ់ ឡៅ ស៊ីណាត ក្លិបកងពលតូចទ័ពឆ័ត្រយោង៩១១ក្នុងទឹកទី៤(១៣កញ្ញា២០១៥) និងលើកទី៤ គេចាញ់ ពេជ្រ សីហា សមាគមកីឡាក្រសួងការពារជាតិដោយពិន្ទុ(២៧កញ្ញា២០១៥)។
អ្នកប្រដាល់ថៃរូបនេះមានប្រវត្តិប្រកួតចំនួន៦២ដងប៉ុណ្ណោះ ក្នុងនោះវាយឈ្នះ៤៦លើក ចាញ់១៦លើក មិនដែលស្មើ បើប្រៀបធៀបជាមួយ ម៉ឺន សុភា គឺច្រើនជាងច្រើនណាស់ ក្នុងពេលដែល សុភា គេមានប្រវត្តិប្រកួតត្រឹមតែ៤១លើក ក្នុងនោះឈ្នះ៣៥លើក ចាញ់៥លើក និងស្មើមួយលើក តែ ម៉ឺន សុភា ធ្លាប់ផ្ដួលគូប្រកួតឲ្យសន្លប់បានចំនួន៩លើក។
ដូច្នេះ ម៉ឺន សុភា មិនអាចមើលស្រាលJongangfigth បានឡើយ ព្រោះអ្នកប្រដាល់ថៃរូបនេះ មានផ្លែកណ្ដាប់ដៃ ជង្គង់ កែងល្អមិនចាញ់ខ្លួនគេប៉ុន្មានទេ។ គេផ្ដួល ឯម វុត្ថា ឲ្យសន្លប់បាន គឺមិនធម្មតាឡើយ។
ម៉ឺន សុភា ដែលមិនសូវមានដៃគូក្នុងស្រុកប្រកួតជាមួយនោះ គេទំនេរជិត២ខែហើយ ក្រោយពីគេវាយស្មើជាមួយអ្នកប្រដាល់ថៃឈ្មោះSen Keajpetchnoyកាលពីថ្ងៃទី១១ ខែកញ្ញា ឆ្នាំ២០១៥កន្លងមកនោះ។ យ៉ាងណា ម៉ឺន សុភា ដែលជួបប្រកួតជាមួយJongangfigth នេះ ត្រូវតែប្រយ័ត្នចំពោះកណ្ដាប់ដៃ ជង្គង់ និងជើងទាត់របស់គេ ព្រោះថាអ្នកប្រដាល់ថៃរូបនេះមានការប៉ិនប្រសប់បីមុខនេះណាស់។ តែយ៉ាងណា សុភា គេក៏ខ្លាំងនឹងកណ្ដាប់ដៃដែរ ពិសេសកណ្ដាប់ដៃឆ្វេង។ មិនដឹងថាJongangfigth ជួប ម៉ឺន សុភា លើកនេះ ជួបសំណាងល្អ ឬអាក្រក់នោះទេ?
អ្នកប្រដាល់ ថន វាសនា ក្លិបនាគរាជមានជ័យ នឹងត្រូវជួបប្រកួតជាមួយអ្នកប្រដាល់ថៃឈ្មោះ Thelek Luk.Chopachai ក្នុងទម្ងន់៥៧គីឡូក្រាម។
Thelek នេះ ធ្លាប់មកប្រកួតនៅសង្វៀនស្ទឹងមានជ័យនេះម្តងហើយ ដោយវាយចាញ់ ចា់ ស៊ីណាត អ្នកប្រដាល់ក្លិបនិរោធមានជ័យក្នុងទឹកទី៥ កាលពីថ្ងៃទី៣០ ខែសីហា ឆ្នាំ២០១៥។
នេះជាឪកាសល្អដែល ថន វាសនា ត្រូវបញ្ចេញសមត្ថភាព ដើម្បីផ្ដួលថៃឲ្យគេឃើញហើយ ព្រោះថាគេទើបបានឡើងប្រកួតជាមួយថៃជាលើកដំបូងនោះ។ ទោះជាយ៉ាងណាទាំងអ្នកប្រដាល់ខ្មែរ ទាំងអ្នកប្រដាល់ថៃThelek មិនត្រូវបានគេដឹងពីកំណត់ត្រាប្រកួតរបស់ពួកគេទាំងពីរនោះទេ។ ចាំមើល Thelek តើគេអាចយកឈ្នះ ថន វាសនា បានឬអត់សម្រាប់ជំនួបលើកនេះ?៕
ថន វាសនា ជួបថៃជាលើកដំបូងនៅសង្វៀនស្ទឹងមានជ័យ
0 Comments