កំពង់ចាម ៖ រថយន្តហ៊ីយ៉ាន់ដាយមួយគ្រឿងបានក្រឡាប់ដោយខ្លួនឯងជះទំនិញរាយពាសពេញផ្លូវបង្កឲ្យភ្ញាក់ផ្អើលកាលពីវេលាម៉ោង១៥ថ្ងៃទី២២ ខែតុលា ឆ្នាំ២០១៥ នៅលើផ្លូវលេខ៧១ស្ថិតក្នុងភូមិ២២ ឃុំតាប្រ៉ុក ស្រុកចំការលើ ខេត្តកំពង់ចាម។
ប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលមានគ្រោះថ្នាក់ចរាចរនេះកើតឡើងគេឃើញរថយន្តម៉ាកហ៊ីយាន់ដាយពណ៌ខៀវពាក់ស្លាកលេខ2AF-7653 ភ្នំពេញបើកបរដោយឈ្មោះ ប៉ូ ម៉េងហ៊ាង ភេទប្រុស អាយុ១៨ឆ្នាំនៅភូមិព្រែកតានុង ស្រុកកោះសូទិន ខេត្តកំពង់ចាមធ្វើដំណើរក្នុងទិសដៅពៅត្បូងទៅជើង។
ប្រភពបន្តថា រថយន្តខាងលើដឹកដបទឹកស៊ីអ៊ីវទឹកម្ទេសដាក់ខ្ពស់ដំបូលទ្រុងឡានធ្វើឲ្យរថយន្តឃ្លីងឃ្លោងគ្មានលំនឹង។ ពេលមកដល់កន្លែងកើតហេតុរថយន្តនេះបានគេចរថយន្តធុនធំ១គ្រឿងទៀតធ្វើឲ្យរថយន្តហ៊ីយាន់ដាយក្រឡាប់ជះដបទឹកស៊ីអ៊ីវទឹកម្ទេសកំពប់រាយពាសពេញផ្លូវនិងបណ្តាលឲ្យកម្មករម្នាក់ឈ្មោះ កង សារឿន ភេទប្រុស អាយុ៣០ឆ្នាំ មានទីលំនៅភូមិរម៉ិញជើងឃុំរម៉ិញ ស្រុកកោះអណ្តែតខេត្តតាកែវរងរបួសត្រូវបញ្ជូនមកសង្គ្រោះនៅមន្ទីរពេទ្យខេត្តកំពង់ចាម។
លោក លឹម សុធី អធិការរងនគរបាលស្រុកចំការលើបានឲ្យដឹងថា ក្រោយកើតហេតុម្ចាស់រថយន្តបានយករថយន្តទៅជួសជុលនិងប្រមែប្រមូលសម្ភារៈដាក់រថយន្តផ្សេងទៅដាក់ម៉ូយតាមទីផ្សារ៕
រថយន្តដឹកទំនិញខ្ពស់ពេកក្រឡាប់នៅពេលគេចរថយន្តផ្សេង
0 Comments