កំពង់ស្ពឺ ៖ តាមការសង្កេតបានឲ្យដឹងថា គេឃើញសម្ភារៈវត្ថុតាងជាច្រើនដែលមន្ត្រីរដ្ឋបាលព្រៃឈើចាប់ និងឃាត់ទុក ត្រូវទុកចោលខូចខាតមួយចំនួន និងមានមួយចំនួនទៀតខូចទាំងស្រុង ក្នុងនោះរាប់ទាំងវត្ថុតាងខ្លះរក្សាទុកនៅតុលាការផងដែរ។
ពលរដ្ឋ ក៏ដូចជាមន្ត្រីរាជការមួយចំនួនដែលបានឃើញនៅវត្ថុតាងដែលចាប់បានពីការដឹកបទល្មើសព្រៃឈើបានលើកជាចម្ងល់ចំពោះសម្ភារៈមានដូចជា ឡាន គោយន្ត ត្រាក់ទ័រ.។ល.។ ត្រូវបានទុកចោលរហូតខូចខាតស្ទើរទាំងស្រុង ហើយមួយចំនួនក៏ចាប់ផ្ដើមខូចខាតជាបណ្តើរៗហើយដែរ។
មួយផ្នែកធំនៅតាមសង្កាត់ ផ្នែក ខណ្ឌ រដ្ឋបាលព្រៃឈើនៅទូទាំងប្រទេសគេបានឃើញមានសម្ភារៈវត្ថុតាងជាច្រើន ត្រូវបានទុកចោលគួរសោកស្ដាយ ខណៈតុលាការមិនទាន់បានផ្តលសិទ្ធិឡាយឡុង ឬសាលក្រមសម្រេចបែបណានោះ។ មិនថាតែសម្ភារៈដែលរក្សាទុកនៅរដ្ឋបាលព្រៃឈើនោះតេ សូម្បីតែសម្ភារៈដែលទុកនៅតុលាការ ក៏បានខូចខាត ដោយក្លាយជាអេតចាយអស់ទៅហើយដែរ។
មន្ត្រីរដ្ឋបាលព្រៃឈើខ្លះបានលើកឡើងក្នុងលក្ខណៈមិនចេញឈ្មោះថាកាលពីកន្លងមកបទល្មើសដែលចាប់បានត្រូវរក្សាទុក និងបញ្ជូនសំណុំរឿងទៅកាន់តុលាការ ហើយរង់ចាំតុលាការសម្រេច ទើបខាងរដ្ឋបាលព្រៃឈើមានសិទ្ធិចាត់ចែង។ ដោយសារតែបែបនេះហើយ ទើបបានជាសម្ភារៈជាច្រើនត្រូវទុលចោលធ្វើឲ្យខូចខាតស្ទើរទាំងស្រុង ប៉ុន្តែឥឡូវនេះបានប្ដូរបន្តិចដោយចាប់បានបទល្មើស និងវត្ថុតាង រដ្ឋបាលព្រៃឈើអាចស្នើយកឈើមករក្សាទុកបាន តែចំពោះវត្ថុតាងនៅតែរង់ចាំស្ថាប័នតុលាការសម្រេចដដែល។
ពលរដ្ឋ ក៏ដូចជារាជការ នៅតែមានការសោកស្ដាយចំពោះវត្ថុតាងដែលបានទុកចោល នៅពេលដែលគង់តែសម្រេចរឹបអូសជាសម្បត្តិរដ្ឋដដែល ហើយបើសម្រេចមកជាសម្បត្តិរដ្ឋគង់នៅប្រើមិនកើតដដែល ពោលស្មើនឹងដុតកម្ទេចចោល។ ផ្នែកតាមច្បាប់ស្ដីពីព្រៃឈើ ត្រង់ជំពូកទី១៥ មាត្រា ៩០បានចែងថា ទណ្ឌកម្មក្នុងបទល្មើសព្រៃឈើមានទោសជាប់ពន្ធនាគារ រឹបអូសវត្ថុតាង និងពិន័យដោយតុលាការ ពិន័យអន្តរការណ៍ ការជួសជុលការខូចខាត ការព្រមាន ការដកហូត ឬការព្យួរកិច្ចព្រមព្រៀង ឬលិខិតអនុញ្ញាត។ នៅក្នុងច្បាប់ស្ដីពីព្រៃឈើត្រង់ជំពូកទី១៥នេះ មាត្រា៩៨ ក៏បានចែងពីទោសទណ្ឌដល់អ្នកប្រព្រឹត្តបទល្មើសព្រៃឈើ និងអ្នកចាប់សត្វព្រៃយ៉ាងធ្ងន់ធ្ងរផងដែរ៕
សម្ភារៈ និងវត្ថុតាងបង្ក្រាបបទល្មើសព្រៃឈើជាច្រើន ទុកចោលឥតប្រយោជន៍
0 Comments