កណ្តាល ៖ ចាស់ជរា ស្ត្រីមេម៉ាយទីទ័លក្រ កុមារកំព្រា និងអ្នករងគ្រោះដោយខ្យល់ព្យុះចំនួន ២៥គ្រួសារ នៅស្រុកល្វាឯម បានទទួលអំណោយមនុស្សធម៌ដ៏ថ្លៃថ្លាពីសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា តាមរយៈប្រតិភូសាខាកាកបាទក្រហមកម្ពុជាខេត្ត ដែលដឹកនាំដោយលោកស្រី គឹង ចាន់ឌី គន់ គីម អនុប្រធានកិត្តិយសសាខា និងលោក ជាវ តាយ ប្រធានគណៈកម្មាធិការសាខា នៅព្រឹកថ្ងៃទី ២២ ខែតុលា ឆ្នាំ២០១៥ ក្នុងបរិវេណវត្តសុវណ្ណតេជោ ឃុំសារិកាកែវ ស្រុកល្វាឯម ខេត្តកណ្តាល។
បន្ទាប់ពីរបាយការណ៍ស្វាគមន៍លោក ប៊ុន ផេង ប្រធានគណៈកម្មាធិការអនុសាខាកាកបាទក្រហម កម្ពុជាស្រុក លោកស្រី គឹង ចាន់ឌី គន់ គីម និងលោក ជាវ តាយ មានប្រសាសន៍សំណេះសំណាល ដោយនាំមកនូវការផ្តាំផ្ញើសាកសួរសុខទុក្ខ ពីលោកបណ្ឌិត ម៉ៅ ភិរុណ ប្រធានកិត្តិយសសាខា ពិសេសពី សំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ជូនចំពោះប្រជាពលរដ្ឋ រងគ្រោះទាំងអស់ដោយក្តីនឹករលឹក។
គណៈអធិបតីមានប្រសាសន៍ថា ទុក្ខព្រួយរបស់ប្រជាពលរដ្ឋរងគ្រោះ និងងាយរងគ្រោះទាំងអស់ គឺជាទុក្ខព្រួយរបស់ថ្នាក់ដឹកនាំជាតិ ពិសេសសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលជានិច្ចកាលសម្តេចតែងបានណែនាំដល់គ្រប់ស្ថាប័ននានានៅ ក្រោមឱវាទចាប់តាំងពីថ្នាក់ជាតិដល់មូលដ្ឋាន ក្នុងនោះសាខាកាកបាទក្រហមកម្ពុជាខេត្ត-រាជធានី អនុសាខា កាកបាទក្រហមស្រុក-ក្រុង ក្រុមកាកបាទក្រហមឃុំ-សង្កាត់ អ្នកស្ម័គ្រចិត្ត យុវជនកាកបាទក្រហម ដែលជា សេនាធិការឲ្យអាជ្ញាធរសាធារណៈផ្នែកវិស័យមនុស្សធម៌ ត្រូវបន្តយកចិត្តទុកដាក់ខ្ពស់អំពីសុខទុក្ខ ការលំបាក និងជីវភាពរស់នៅប្រចាំថ្ងៃរបស់ប្រជាពលរដ្ឋទូទៅ ដោយមិនប្រកាន់និន្នាការនយោបាយ ពូជសាសន៍សាសនា ឬពណ៌សម្បុរឡើយ។ នៅទីបញ្ចប់គណៈអធិបតី បានថ្លែងអំណរគុណដល់អាជ្ញាធរដែន ដីគ្រប់លំដាប់ថ្នាក់ ពិសេសសប្បុរសជននានា ដែលកន្លងមកក៏ដូចបច្ចុប្បន្នបានយកចិត្តទុកដាក់ជួយឧបត្ថម្ភ គាំទ្ររាល់សកម្មភាពមនុស្សធម៌របស់កាកបាទក្រហមកម្ពុជា ហើយចូលរួមឆ្លើយតបភ្លាមៗជូនដល់ប្រជាពល រដ្ឋរងគ្រោះ និងងាយរងគ្រោះបានទាន់ពេលវេលា។
អំណោយមនុស្សធម៌ ដែលគ្រួសារនីមួយៗបានទទួលរួមមាន អង្ករ ២៥ គីឡូក្រាម មី ១ កេស តូច ត្រីខកំប៉ុង ១២ កំប៉ុង សម្ភារៈគ្រឿងឧបភោគបរិភោគជាច្រើនមុខទៀត និង ថវិកាសរុប ១២ ម៉ឺនរៀល(ដប់ពីរម៉ឺនរៀល )៕
ប្រជាពលរដ្ឋទីទ័លក្រ និង អ្នករងគ្រោះខ្យល់ព្យុះ ចំនួន ២៥ គ្រួសារ នៅស្រុកល្វាឯមបានទទួលអំណោយពីសាខាកាកបាទក្រហមខេត្តកណ្តាល
0 Comments