កាលពីថ្ងៃអាទិត្យប្រទេសអ៊ីស្រាអែល និងសហរដ្ឋអាមេរិកបានបង្ហាញពីសញ្ញាថា ពួកគេបានចាប់ផ្តើមដាក់ជម្លោះលើកិច្ចព្រមព្រៀងនុយក្លេអ៊ែរអ៊ីរ៉ង់នៅមួយឡែកដោយពួកគេបានប្រកាសពីការបន្តឡើងវិញនៃកិច្ចចរចាស្ដីពីការផ្តល់ជំនួយការពារជាតិរបស់សហរដ្ឋអាមេរិកដល់អ៊ីស្រាអែលនៅពេលដែលប្រទេសនេះបានទទួលឧត្ដមសេនីយ៍កំពូលរបស់ក្រុងវ៉ាស៊ីនតោន និងការធ្វើសមយុទ្ធកងកម្លាំងអាកាសរួមគ្នាមួយ។
សម្ព័ន្ធមិត្តនេះកំពុងសម្លឹងឆ្ពោះទៅរកការយល់ព្រមលើកញ្ចប់ជំនួយយោធា១០ឆ្នាំ ដើម្បីពង្រីកជំនួយការបច្ចុប្បន្នរបស់សហរដ្ឋអាមេរិកទៅដល់ប្រទេសអ៊ីស្រាអែលដែលមានតម្លៃ៣ពាន់លានដុល្លារជារៀងរាល់ឆ្នាំដែលនឹងផុតកំណត់នៅឆ្នាំ២០១៧។
ប៉ុន្តែលោកនាយករដ្ឋមន្ត្រីបេនចាមីន ណេតាន់យ៉ាហ៊ូបានរាំងស្ទះចំពោះការចរចាទាំងនោះមុនពេលកិច្ចព្រមព្រៀងកាលពីខែកក្កដាដែលបានឈានដល់រវាងប្រទេសអ៊ីរ៉ង់ និងមហាអំណាចពិភពលោកដែលអ៊ីស្រាអែលយល់ថា គឺជារឿងមិនល្អ។
លោករ៉ុន ដឺមើឯកអគ្គរដ្ឋទូតរបស់ប្រទេសអ៊ីស្រាអែលប្រចាំសហរដ្ឋអាមេរិកបាននិយាយនៅក្នុងទំព័រ Facebook ថា “ខណៈពេលដែលកិច្ចព្រមព្រៀងនុយក្លេអ៊ែរដែលនាពេលនេះកំពុងឆ្ពោះទៅមុខ អ៊ីស្រាអែលក៏កំពុងឆ្ពោះទៅមុខដូចគ្នាដោយសង្ឃឹមថា នឹងបង្កើតគោលនយោបាយធម្មតាមួយជាមួយសហរដ្ឋអាមេរិក ដើម្បីដោះស្រាយគ្រោះថ្នាក់ជាបន្តដែលបង្កឡើងដោយប្រទេសអ៊ីរ៉ង់”។
លោកណេតាន់ យ៉ាហ៊ូដែលនឹងជួបជាមួយលោកប្រធានាធិបតីបារ៉ាក់ អូបាម៉ានៅសេតវិមាននៅខែក្រោយនេះបានទទួលការស្វាគមន៍យ៉ាងកក់ក្តៅចំពោះលោកឧត្តមនាវីអាមេរិកយ៉ូសែប ដាន់ហ្វត និងសរសើរគាត់ចំពោះការជ្រើសយកប្រទេសអ៊ីស្រាអែលជាកន្លែងឈប់លើកទីមួយនៃដំណើរទស្សនៈកិច្ចក្រៅប្រទេសលើកដំបូងរបស់លោកចាប់តាំងពីក្លាយជាប្រធាននៃនាយសេនាធិការរួមរបស់យោធាអាមេរិកកាលពីថ្ងៃទី១ ខែតុលា។
ជាមួយគ្នានោះអ៊ីស្រាអែលក៏បានចាប់ផ្តើមផងដែរនូវសមយុទ្ធកងកម្លាំងអាកាសរយៈពេលពីរសប្ដាហ៍ជាមួយសហរដ្ឋអាមេរិកដែលមានឈ្មោះថា “Blue Flag” នៅឯបន្ទាយវាលខ្សាច់ភាគខាងត្បូង។
មន្ត្រីអាមេរិកនិងអ៊ីស្រាអែលបានបញ្ជាក់ថា មុនពេលការផ្អាកកិច្ចព្រមព្រៀងភាគីទាំងពីរសឹងតែនឹងបញ្ចប់នូវកញ្ចប់ថ្មីនៃជំនួយឥតសំណងដែលមានតម្លៃ ៣.៦ ពាន់លានដុល្លារទៅ ៣.៧ ពាន់លានដុល្លារក្នុងមួយឆ្នាំទៅហើយ។ ពួកគេបានព្យាករណ៍ថា ចំនួននេះអាចនឹងកើនឡើងបន្ថែមទៀត ខណៈដែលអ៊ីស្រាអែលបានអះអាងខ្លួនត្រូវការជំនួយបន្ថែមទៀត ដើម្បីទូទាត់ជាមួយទ្រព្យដែលទំនងជាសម្រាប់បន្ធូរបន្ថយទណ្ឌកម្មរបស់អ៊ីរ៉ង់ដែលអាចត្រូវបានប្រើប្រាស់ដើម្បីផ្តល់ហិរញ្ញវត្ថុដល់ពួកទ័ពព្រៃប្រឆាំងនឹងអ៊ីស្រាអែល៕
Reuters
អ៊ីស្រាអែល និងអាមេរិកបង្ហាញពីសញ្ញាស្ដារទំនាក់ទំនងសន្តិសុខឡើងវិញបន្ទាប់ពីជម្លោះអ៊ីរ៉ង់
0 Comments