ចលនា PEGIDA របស់ប្រទេសអាល្លឺម៉ង់ដែលបានរៀបចំការជួបជុំតវ៉ាប្រឆាំងការធ្វើចំណាកស្រុកនៅថ្ងៃចន្ទ មួយឆ្នាំចាប់តាំងពីការបង្កើតរបស់ខ្លួនបានបង្ហាញពីប្រតិកម្មយ៉ាងខ្លាំងក្លារបស់អឺរ៉ុបចំពោះការហូរចូលយ៉ាងច្រើនសន្ធឹកសន្ធាប់នេះដែលបានដាក់សម្ពាធលើលោកស្រី អធិការបតី Angela Merkel។
បាតុកម្មនេះបានកើតឡើងមួយថ្ងៃបន្ទាប់ពីអ្នកបោះឆ្នោតរបស់ប្រទេសស្វ៊ីសប្រែត្រឡប់មកកាន់លទ្ធផលយ៉ាងរឹងមាំជាប្រវត្តិសាស្ត្រវិញសម្រាប់គណបក្សប្រជានិយមដែលគេស្គាល់ដោយសារយុទ្ធនាការយ៉ាងខ្លាំងរបស់ខ្លួនប្រឆាំងនឹងជនអន្តោប្រវេសន៍ និងសាសនាឥស្លាម ហើយបន្ទាប់ពីមានការវាយប្រហារដោយកាំបិតមួយករណីនៅលើបេក្ខភាពតំណែងអភិបាលក្រុងអាល្លឺម៉ង់ដែលគាំទ្របញ្ហាជនភៀសខ្លួន។
ការជួបជុំគ្នានៅថ្ងៃចន្ទក្នុងទីក្រុង Dresden បានបង្ហាញពីការផ្ទុយទៅនឹងកិច្ចខិតខំប្រឹងប្រែងរបស់លោកស្រី Merkel ដែលកាលពីចុងសប្ដាហ៍លោកស្រីបានធ្វើដំណើរមួយថ្ងៃដ៏មានសារៈសំខាន់ទៅកាន់ប្រទេសទួរគីជាកន្លែងដែលលោកស្រីបានសាទរចំពោះការរីកចម្រើនក្នុងការជួយដល់កិច្ចព្រមព្រៀងក្រុងអង់ការ៉ាជាមួយវិបត្តិចំណាកស្រុក និងបានប្ដេជ្ញាថា នឹងជំរុញទៅមុខចំពោះគោលបំណងភាពជាសមាជិកសហភាពអឺរ៉ុបយូរអង្វែងរបស់ខ្លួន។
សហភាពអឺរ៉ុបចង់ឲ្យប្រទេសទួរគីធ្វើការបន្ថែមទៀតដើម្បីរឹតបន្តឹងសន្តិសុខនៅតាមព្រំដែនរបស់ខ្លួន និងជួយទប់ស្កាត់ការហូរចូលជាប្រវត្តិសាស្ត្រនៃជនជាតិស៊ីរី និងអ្នកផ្សេងទៀតដែលរត់គេចខ្លួនចេញពីជម្លោះ ការបៀតបៀន និងភាពក្រីក្រ។
ជាការឆ្លើយតបក្រុងអង់ការ៉ាចង់ឲ្យមានការទទួលស្គាល់កាន់តែច្រើនសម្រាប់តួនាទីរបស់ខ្លួនក្នុងការទទួលយកជនភៀសខ្លួនស៊ីរីជាងពីរលាននាក់ ខណៈមានការកើនឡើងនៃជំនួយហិរញ្ញវត្ថុ។
ថ្លែងបន្ទាប់ពីការពិភាក្សារបស់លោកស្រីជាមួយនឹងលោកប្រធានាធិបតីទួរគី Recep Tayyip Erdogan លោកស្រី Merkel បានលើកឡើងថា សហភាពអឺរ៉ុប និងប្រទេសទួរគីបានឯកភាពគ្នាក្នុងការធ្វើការកាន់តែជិតស្និតឆ្ពោះទៅរកការចូលជាសមាជិកសហភាពអឺរ៉ុប និងសេរីភាវូបនីយកម្មទិដ្ឋាការរបស់ជនជាតិទួរគីដែលចង់ធ្វើដំណើរទៅតំបន់កាន់ Schengen របស់សហភាពអឺរ៉ុប។
អាល្លឺម៉ង់បានក្លាយជាគោលដៅកំពូលរបស់អឺរ៉ុបសម្រាប់ជនភៀសខ្លួនដែលភាគច្រើនធ្វើដំណើរតាមរយៈប្រទេសទួរគីនិងតំបន់បាល់កង់ ហើយត្រូវបានគេរំពឹងថា នឹងទទួលយកសំណើសុំសិទ្ធិជ្រកកោនរហូតដល់ទៅមួយលាននាក់នៅឆ្នាំនេះ។
ខណៈពេលដែលប្រជាជនអាល្លឺម៉ង់ជាច្រើនបានស្វាគមន៍ជនភៀសខ្លួននោះ ក៏មានប្រតិកម្មយ៉ាងខ្លាំងផងដែរប្រឆាំងជាមួយនឹងគណបក្សរបស់លោកស្រី Merkel ដោយបានបាត់បង់ការគាំទ្រ ខណៈពេលដែលចលនាតវ៉ាប្រឆាំងឥស្លាម PEGIDA បានអូសទាញមនុស្សរាប់ពាន់នាក់។
ភាពតានតឹងបានបញ្ចប់នៅក្នុងអំពើហិង្សានៅភាគខាងលិចនៃទីក្រុង Cologne កាលពីថ្ងៃសៅរ៍នៅពេលដែលបុរសម្នាក់ប្រដាប់ដោយកាំបិតបានវាយប្រហារបេក្ខជនតំណែងអភិបាលក្រុងគឺលោកស្រី Henriette Reker ដែលជាអ្នកសកម្មក្នុងការជួយដល់ជនភៀសខ្លួន។ ការវាយប្រហារនេះបានបណ្ដាលឲ្យលោកស្រីរងរបួសកធ្ងន់ធ្ងរនិងមនុស្សបួននាក់ផ្សេងទៀតរងរបួស។
លោកស្រី Reker បានឈ្នះការបោះឆ្នោតកាលពីថ្ងៃអាទិត្យដោយមានសំឡេងភាគច្រើន ។
ប៉ូលិសបានឲ្យដឹងថា អ្នកវាយប្រហារនេះគឺជាបុរសម្នាក់ដែលគ្មានការងារធ្វើអាយុ៤៤ឆ្នាំ ហើយត្រូវបានចាប់ខ្លួននៅកន្លែងកើតហេតុ។ អ្នកវាយប្រហារគឺជាប់ទាក់ទងទៅនឹងចលនាលើកទឹកចិត្តប្រកាន់ពូជសាសន៍៕
AFP
បាតុកម្មប្រឆាំងការធ្វើចំណាកស្រុកនៅអាល្លឺម៉ង់បានគូសបញ្ជាក់ពីប្រតិកម្មខ្លាំងក្លានៅអឺរ៉ុប
0 Comments