ភ្នំពេញ ៖ រយៈពេល៩ខែ ឆ្នាំ២០១៥នេះ កម្លាំងមន្ទីរប្រឆាំងគ្រឿងញៀន នៃអគ្គស្នងការនគរបាលជាតិ សហការជាមួយសមត្ថកិច្ចមូលដ្ឋានបានធ្វើការបង្ក្រាបករណីជួញដូរគ្រឿងញៀនបានចំនួន១.៦៦៨ករណី ឃាត់ខ្លួនជនសង្ស័យចំនួន៣.៤០២នាក់ និងដកហូតគ្រឿងញៀនជាង៨៧គីឡូក្រាម។ ចំនួននេះបើប្រៀបធៀបរយៈពេលដូចគ្នាក្នុងឆ្នាំ២០១៤ កើនឡើង៣ដង។
នេះបើយោងតាមការលើកឡើងរបស់លោកឧត្ដមសេនីយ៍ឯក ខៀវ សាម៉ន នៅក្នុងកិច្ចប្រជុំវាយតម្លៃសកម្មភាពការងារបង្ការ ទប់ស្កាត់ និងបង្ក្រាបការជួញដូរគ្រឿងញៀន នៅរយៈពេល៩ខែ ឆ្នាំ២០១៥ ក្រោយអធិបតីភាពលោកឧត្ដមសេនីយ៍ឯក ម៉ក់ ជីតូ អគ្គស្នងការរងនគរបាលជាតិទទួលផែនការបង្ក្រាបគ្រឿងញៀនកាលពីព្រឹកថ្ងៃទី១៩ ខែតុលា ឆ្នាំ២០១៥នេះ។
លោក ខៀវ សាម៉ន ប្រធានមន្ទីរប្រឆាំងគ្រឿងញៀនបានថ្លែងនូវសកម្មភាពការងារអនុវត្តន៍ច្បាប់ប្រឆាំងគ្រឿងញៀននៅរយៈពេល៩ខែ ឆ្នាំ២០១៥ (គិតពីថ្ងៃទី២០ ខែវិច្ឆិកា ឆ្នាំ២០១៤ ដល់ថ្ងៃទី១៩ ខែសីហា ឆ្នាំ២០១៥) ដោយកម្លាំងមន្ទីរប្រឆាំងគ្រឿងញៀន នៃអគ្គស្នងការនគរបាលជាតិបានធ្វើការបង្ក្រាបករណីជួញដូរគ្រឿងញៀនបានចំនួន១.៦៦៨ករណី ឃាត់ខ្លួនជនសង្ស័យចំនួន៣.៤០២នាក់ ដើម្បីកសាងសំណុំរឿងបញ្ជូនទៅតុលាការ ដែលនេះជាបង្ក្រាបករណីជួញដូរគ្រឿងញៀនដ៏ច្រើនសម្បើម។
លោកបានថ្លែងឲ្យដឹងទៀតថា នៅរយៈពេល៩ខែ ដើមឆ្នាំនេះ កម្លាំងនគរបាលមន្ទីរប្រឆាំង គ្រឿងញៀនទូទាំងប្រទេសសហការយ៉ាងជិតស្និទ្ធជាមួយតុលាការ និងអាជ្ញាធរដែនដីគ្រប់រាជធានីខេត្តបានធ្វើការបង្ក្រាបករណីជួញដូរគ្រឿងញៀនបានចំនួន១.៦៨៨ករណី ឃាត់ខ្លួនមនុស្ស៣.៤០២នាក់ ក្នុងនោះមានស្ត្រី៩៩នាក់ ដកហូតគ្រឿងញៀនជាង៨៧គីឡូក្រាម ហើយបើប្រៀបធៀបនឹង៩ខែ នៅឆ្នាំមុខ បង្ក្រាបបានតែជាង៥០០ករណី ដកហូតគ្រឿងញៀនតែ៣៧គីឡូក្រាមប៉ុណ្ណោះ។ ក្នុងចំណោមជនសង្ស័យទាំងនោះមានជនជាតិខ្មែរចំនួន៣.៣០៣នាក់ វៀតណាម៧០នាក់ ឡាវ៧នាក់ ថៃម្នាក់ ចិន២នាក់ អង់គ្លេស៧នាក់ អ៊ុយរ៉ាហ្គាយម្នាក់ និងនីហ្សេរីយ៉ា៩នាក់។
ជាមួយគ្នានោះដែរ ជនសង្ស័យដែលត្រូវបានចាប់ខ្លួនតាមដីកាតុលាការមានចំនួន១១៥នាក់។ ដោយឡែកសម្រាប់ការបង្ក្រាបករណីគ្រឿងញៀនធំៗ បានចំនួន៤៣ករណី ឃាត់ខ្លួនមេខ្លោងជួញដូរគ្រឿងញៀនធំៗចំនួន៨៨នាក់ រីឯការបង្ក្រាបករណីជួញដូរកញ្ឆាស្ងួតសរុបចំនួន១.៤៨៧គីឡូក្រាម និងប្រេងកញ្ឆាចំនួន១,៥គីឡូក្រាមផងដែរ។
អគ្គស្នងការរងនគរបាលជាតិទទួលផែនការបង្ក្រាបគ្រឿងញៀន លោក ម៉ក់ ជីតូ បានថ្លែងនូវការវាយតម្លៃខ្ពស់ចំពោះសកម្មភាពការងារដែលមន្ទីរប្រឆាំងគ្រឿងញៀន ក៏ដូចជាបណ្ដាស្នងការខេត្តនានា ដែលសម្រេចបាននារយៈពេល៩ខែកន្លងមកនេះ។
ជាមួយគ្នានេះដែរ លោកអគ្គស្នងការរងក៏បានបើកកិច្ចពិភាក្សាដើម្បីរកចំណុចខ្លាំង និងចំណុចខ្សោយរបស់មន្ទីរប្រឆាំងគ្រឿងញៀន ដើម្បីរៀបចំរបាយការណ៍ដាក់ជូនសម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នៅក្នុងកិច្ចប្រជុំថ្នាក់ជាតិស្ដីពីការបង្ការ និងបង្ក្រាបគ្រឿងញៀននៅពេលខាងមុខនេះ។
ជាមួយគ្នានោះលោកឧត្ដមសេនីយ៍ឯកថ្លែងអំណរគុណដល់លោកអភិបាលរាជធានីភ្នំពេញ ដែលបានផ្ដល់ជាថវិកាគាំទ្រជាប្រចាំខែចំនួន១០លានរៀល ជូនដល់កម្លាំងនគរបាលប្រឆាំងគ្រឿងញៀន ដើម្បីធ្វើជំរុញលើកទឹកចិត្តនគរបាលអនុវត្តន៍ច្បាប់ប្រឆាំងគ្រឿងញៀន ខណៈដែលអភិបាលខេត្ត២៤ផ្សេងទៀតមិនទាន់ឃើញចូលរួមនៅឡើយនោះ។ ក្នុងឱកាសនោះ លោក ម៉ក់ ជីតូ បាននាំយកនូវអំណោយជាម៉ូតូប្រដេញ៥គ្រឿងរបស់នាយឧត្ដមសេនីយ៍ នេត សាវឿន អគ្គស្នងការនគរបាលជាតិប្រគល់ជូនមន្ទីរប្រឆាំងគ្រឿងញៀនផងដែរ៕
៩ខែ សមត្ថកិច្ចបង្ក្រាបករណីជួញដូរគ្រឿងញៀនបានចំនួន១.៦៦៨ករណី
0 Comments