ភ្នំពេញ ៖ ដោយមានការគាំទ្រផ្នែកបច្ចេកទេសពីធនាគារអភិវឌ្ឍន៍អាស៊ី ADB ក្រោមមូលនិធិប្រទេសជប៉ុន ដើម្បីកាត់បន្ថយភាពក្រីក្រ និងមានក្រុមហ៊ុនក្នុងស្រុកឈ្មោះ Green Goal Ltd.ជាទីប្រឹក្សាបច្ចេកទេស ជួយអ្នកជំនាញការបរទេស និងក្នុងស្រុកចំនួន ០៨រូប ដែលមានបទពិសោធន៍ជំនាញផ្នែកសង្គម វិស្វកររៀបចំទីក្រុង នគរូបនីយកម្ម បរិស្ថាន លទ្ធកម្ម រដ្ឋបាល និងហិរញ្ញវត្ថុ ព្រឹកថ្ងៃទី១៩ ខែតុលានេះនៅសណ្ឋាគារភ្នំពេញ ក្រសួងរៀបចំដែនដី នគរូបនីយកម្ម និងសំណង់ បានរៀបចំសិក្ខាសាលាពិគ្រោះយោបល់ ស្ដីពី«ក្របខណ្ឌយុទ្ធសាស្ត្រជាតិអភិវឌ្ឍន៍ទីក្រុង-ទីប្រជុំជន»ដើម្បីលើកកម្ពស់សមត្ថភាពលើការកសាង និងគ្រប់គ្រងទីក្រុង-ទីប្រជុំជនចំនួន០៩ ស្ថិតនៅក្នុងខេត្តចំនួន០៨ នៃមហាអនុតំបន់មេគង្គGMS។
លោកបណ្ឌិត ប៉ែន សុផល រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ និងជាអនុប្រធានអចិន្ត្រៃយ៍គណៈកម្មាធិការរៀបចំដែនដី និងនគរូបនីយកម្មថ្នាក់ជាតិថ្លែងថា គម្រោងកសាងសមត្ថភាពនេះ មានគោលបំណងធ្វើឱ្យប្រសើរឡើងនូវការផ្តល់សេវាហេដ្ឋារចនាសម្ព័ន្ធ និងការអភិវឌ្ឍទីក្រុងប្រកបដោយចីរភាពរីកចម្រើន សំដៅរួមចំណែកក្នុងយុទ្ធសាស្ត្រជាតិកាត់បន្ថយភាពក្រីក្ររបស់រាជរដ្ឋាភិបាលកម្ពុជា និងមានលទ្ធផលរំពឹងទុកចំនួន៤ គឺ(១)ការវាយតម្លៃសមត្ថភាពមន្ត្រី និងបើកវគ្គបណ្តុះបណ្តាលសាកល្បងនៅខេត្តមួយ ដែលមិនមែនជាខេត្តគោលដៅនៃគម្រោង (គឺបានជ្រើសរើសយកខេត្តកំពង់ស្ពឺជាខេត្តសាកល្បង) (២)ការបើកវគ្គបណ្តុះបណ្តាលពេញលេញនៅថ្នាក់ខេត្ត-ក្រុង និងទីប្រជុំជនគោលដៅចំនួន ០៩ ដែលមានក្រុងប៉ោយប៉ែត ក្រុងសិរីសោភ័ណ ក្រុងបាត់ដំបង ក្រុងពោធិ៍សាត់ ក្រុងសៀមរាប ក្រុងស្ទឹងសែន ក្រុងកំពង់ឆ្នាំង ក្រុងបាវិត និងទីប្រជុំជនអ្នកលឿង (៣)ការកែ សម្រួលកញ្ចប់ឯកសារ«ក្របខណ្ឌយុទ្ធសាស្ត្រជាតិស្តីពីការអភិវឌ្ឍទីក្រុង»(NUDSF) ដោយពិភាក្សាជាមួយក្រសួង-ស្ថាប័នពាក់ព័ន្ធ អង្គការសង្គមស៊ីវិល និង (៤)ការពង្រឹងស្ថាប័ន និងធ្វើការបណ្តុះបណ្តាលគ្រូបង្គោលថ្នាក់ជាតិ ដើម្បីបន្តការបណ្តុះបណ្តាលនាពេលខាងមុខ។ លោកបណ្ឌិតក៏បានលើកទឹកចិត្តដល់អង្គពិភាក្សាទាំងមូលចូលរួមផ្តល់នូវគំនិត ទស្សនៈ មតិយោបល់ឱ្យបានស៊ីជម្រៅក្នុងគោលដៅ ដើម្បីទទួលបាននូវយុទ្ធសាស្ត្រជាតិមួយប្រកបដោយការគិតគូរគ្រប់ជ្រុងជ្រោយ និងពេញលក្ខណៈជាក្របខណ្ឌជាតិ ដើម្បីឱ្យការអភិវឌ្ឍទីក្រុងរបស់យើងមានហេដ្ឋារចនាសម្ព័ន្ធ មានសេវាសាធារណៈ មានលំហសាធារណៈ មានផ្ទៃបៃតង មានការអភិវឌ្ឍ មានការវិនិយោគ និងមានសោភ័ណភាពកាន់តែប្រសើរឡើងៗ។ លោកបណ្ឌិតក៏បានសំណូមពរដល់រាជរដ្ឋាភិបាលប្រទេសជប៉ុន និងធនាគារអភិវឌ្ឍន៍អាស៊ី ADB ព្រមទាំងដៃគូអភិវឌ្ឍន៍ពាក់ព័ន្ធបន្តជួយគាំទ្រមូលនិធិសិក្សារៀបចំបញ្ចប់កម្រិតលម្អិតនូវយុទ្ធសាស្ត្រជាតិអភិវឌ្ឍទីក្រុង-ទីប្រជុំជនពេញលេញ និងក្របខណ្ឌទូទាំងប្រទេសបន្ត។
បើតាមប្រសាសន៍លោកបណ្ឌិត ម៉េង ប៊ុណ្ណារីទ្ធ អគ្គលេខាធិការរង នៃគណៈកម្មាធិការរៀបចំដែនដី និងនគរូបនីយកម្មថ្នាក់ជាតិ និងជាប្រធានគម្រោងបានឱ្យដឹងថា រយៈពេលនៃការអនុវត្តគម្រោងនេះមាន ២៤ខែ ដោយបានចាប់ផ្តើមអនុវត្តតាំងពីខែ ឧសភា ឆ្នាំ២០១៣ និងបានបិទបញ្ចប់គម្រោងជាផ្លូវការកាលពីខែកក្កដា ឆ្នាំ២០១៥មកនេះ។ កម្មវិធីសំខាន់ក្នុងសិក្ខាសាលាថ្ងៃនេះ គឺជាការបន្តពិភាក្សាលើលទ្ធផលទី៣ គឺការកសាងក្របខណ្ឌយុទ្ធសាស្ត្រជាតិស្ដីពីការអភិវឌ្ឍទីក្រុង ដើម្បីឱ្យខ្លឹមសារនៃឯកសារនេះកាន់តែមានភាពពេញលេញបន្ថែមទៀត៕
លើកកម្ពស់សមត្ថភាពកសាង និងអភិវឌ្ឍន៍ទីក្រុង-ទីប្រជុំជនឱ្យកាន់តែប្រសើរឡើង
0 Comments