*គូ បឺត ខាំ និងWatcharalek មានបញ្ហារឿងអាប៊ីត
*ម៉ឺន ដា ឈ្នះឯម ម៉ូលី ឯ គួន សុវណ្ណ ឈ្នះអ៊ុល រាត្រី
*ជុន សាវុធ ជាម្ចាស់ពានរង្វាន់ប្រាក់លានបាយ័ន
*ផង់ សុភាព និងវី សេរីចាន់ឌីន ឡើងទៅវគ្គផ្ដាច់ព្រ័ត្រ
ប្រដាល់ ៖ ទីបំផុតអ្នកប្រដាល់ជើងខ្លាំងរបស់កម្ពុជា២រូប គឺបឺត ខាំ ក្លិបសាលវ័ន្តកីឡា និងឡៅ ស៊ីណាត អ្នកប្រដាល់ក្លិបកងពលតូចទ័ពឆ័ត្រយោង៩១១ ត្រូវបានឡើងទៅជួបគ្នាក្នុងវគ្គពាក់កណ្ដាលផ្ដាច់ព្រ័ត្រដណ្ដើមខ្សែក្រវាត់ខារ៉ាបាវវគ្គII ទម្ងន់៦៩គីឡូក្រាម ដែលអមដោយប្រាក់រង្វាន់ចំនួន៥.០០០ដុល្លារនោះ។ ចំណែកអ្នកប្រដាល់ថៃ២រូបគឺ Watcharalek OR. Kwanmueng និងKlakhunserk Chompea Tour បានធ្លាក់ទៅជួបគ្នា ដើម្បីដណ្ដើមចំណាត់ថ្នាក់លេខ៣។
ក្នុងការប្រកួតពាក់កណ្ដាលផ្ដាច់ព្រ័ត្រនៅលើសង្វៀនបាយ័នស្ទឹងមានជ័យនាយប់ថ្ងៃអាទិត្យទី១៨ ខែតុលា ឆ្នាំ២០១៥នេះ បឺត ខាំ បានវាយឈ្នះ Watcharalek ដោយពិន្ទុមិនឯកច្ឆន្ទ។ ក្នុងចំណោមចៅក្រម៥រូប មាន៣រូបបានឲ្យ បឺត ខាំ ឈ្នះក្នុងពិន្ទុ៩៨ទល់៩៧ដូចគ្នា គឺមានលោក ធី ណារិទ្ធ លោក ហង់ ស៊ឺន និងលោក ធន់ សុភា ហើយចៅក្រម២រូបដែលឲ្យ Watcharalek ឈ្នះក្នុងពិន្ទុ៩៨ទល់៩៧ដែរនោះ គឺលោក អ៊ូ សាធ និងលោក ឈឿម ឆៃ។
យ៉ាងណានៅក្នុងការប្រកួតគូនេះ គឺមានបញ្ហាចម្រូងចម្រាស និងថ្នាំងថ្នាក់កើតឡើងពីសំណាក់កីឡាករថៃ Watcharalek និងអ្នកទស្សនា ដែលខឹងសំបារចំពោះអាជ្ញាកណ្ដាលលោក ទេព ស៊ីវុត្ថា ដែលកាត់ក្ដីមិនត្រឹមត្រូវ នាំឲ្យអ្នកប្រដាល់ថៃ Watcharalek ដោះស្រោមដៃដើរចេញពីសង្វៀន និងមានអ្នកទស្សនាមួយចំនួនបានចោលដបទឹកសុទ្ធមកលើរេញនៅក្នុងទឹកទី៤។
Watcharalek និងអ្នកទស្សនា បានខឹងនឹងអាជ្ញាកណ្ដាលលោក ទេព ស៊ីវុត្ថា ដោយសារតែពេលដែល Watcharalek ចាប់បោក បឺត ខាំ ឲ្យដួលលើរេញនោះ ត្រូវអាជ្ញាកណ្ដាលរូបនេះព្រមាន ហើយមុននេះ បឺត ខាំ ក៏ចាប់បោក Watcharalek ដែរតែមិនត្រូវបានទទួលការព្រមាន ធ្វើឲ្យ Watcharalek ខឹងដោះស្រោមដៃដើរចេញពីសង្វៀនតែម្ដង ហើយព្រមជាមួយគ្នានោះអ្នកទស្សនាមួយចំនួន ក៏ចោលដបទឹកសុទ្ធមកលើរេញ ធ្វើឲ្យកើតចលាចលមួយសន្ទុះ។ ប៉ុន្តែយ៉ាងណា សភាពការណ៍បានវិលមកភាពប្រក្រតីវិញ ដោយ Watcharalekគេបានបន្តការប្រកួតវិញរហូតដល់ចប់ទឹកទី៥ និងចាញ់ត្រឹមពិន្ទុ។
គួរបញ្ជាក់ថា កាលពីជួបគ្នាក្នុងវគ្គជម្រុះ Watcharalekនេះ ក៏ប្រកួតចាញ់ បឺត ខាំ ដោយពិន្ទុដែរ។
ចំពោះការប្រកួតរវាង ឡៅ ស៊ីណាត និងKlakhunserk វិញ ពុំមានបញ្ហាអ្វីកើតឡើងទេ គឺបានប្រព្រឹត្តទៅដោយរលូនពេញប្រាំទឹក។ Klakhunserk បានចាញ់ពិន្ទុឡៅ ស៊ីណាត។ កាលពីជួបគ្នាក្នុងជម្រុះ អ្នកប្រដាល់ថៃរូបនេះ ក៏វាយចាញ់ ស៊ីណាត ដោយពិន្ទុដែរ។
ដូច្នេះ បឺត ខាំ និងឡៅ ស៊ីណាត ត្រូវទៅជួបគ្នាក្នុងវគ្គផ្ដាច់ព្រ័ត្រ ហើយ Watcharalek និង Klakhunserk ជួបគ្នាដណ្ដើមចំណាត់ថ្នាក់លេខ៣។
*សង្វៀនបឹងស្នោ
ប្រដាល់ ៖ អ្នកប្រដាល់ជើងថ្មី ម៉ឺន ដា ក្លិបខ្លារខិនមានរិទ្ធ បានប្រកួតឈ្នះអ្នកប្រដាល់ជើងចាស់ ឯម ម៉ូលី ក្លិបឫទ្ធីពោធិសែនជ័យ ដោយពិន្ទុ ក្នុងការជួបគ្នាលើសង្វៀនបាយ័នបឹងស្នោនារសៀលថ្ងៃអាទិត្យទី១៨តុលានេះដែរ។
ម៉ឺន ដា ទើបឡើងប្រកួតបានប៉ុន្មានដងតែប៉ុណ្ណោះ ប៉ុន្តែអាចធ្វើឲ្យ ឯម ម៉ូលី វង្វេងវង្វាន់ម្តងៗទៅហើយក្នុងការប្រកួតនេះ។ ឯម ម៉ូលី ត្រូវម៉ឺន ដា វាយឲ្យអាជ្ញាកណ្ដាលរាប់៨ដល់ទៅពីរដង ក្នុងទឹកទី២ និងទឹកទី៤។ ប៉ុន្តែយ៉ាងណា បញ្ចប់ការប្រកួត ឯម ម៉ូលី ចាញ់ម៉ឺន ដា ដោយពិន្ទុប៉ុណ្ណោះ។
គួន សុវណ្ណ អ្នកប្រដាល់ក្លិបសុភានូមានជ័យ ក៏ប្រកួតឈ្នះ អ៊ុល រាត្រី អ្នកប្រដាល់ក្លិបពន្លឺវិបុលរិទ្ធីដោយពិន្ទុដែរ។ ពួកគេប្រកួតគ្នាប្រាំទឹកពេញ។ រាត្រី ត្រូវ សុវណ្ណ វាយឡើងទ្រោមខ្លួន តែយ៉ាងណា រាត្រី ទប់បានរហូតដល់ចប់ទឹក៥ និងចាញ់ត្រឹមពិន្ទុប៉ុណ្ណោះ។
ចំពោះ គឹម វាសនា អ្នកប្រដាល់ជើងថ្មី នៃក្លិបកងពលតូចទ័ពឆ័ត្រយោង៩១១ បានយកឈ្នះអ្នកប្រដាល់ជើងចាស់ទឹម សាន្ត ក្លិបកុសលកីឡាដោយពិន្ទុ។ សាន្ត ត្រូវវាសនា សម្រុកវាយសឹងតែទប់មិនជាប់ បើកុំតែគេមានមុខរឹង ម្ល៉េះមិនអាចទ្រាំជាមួយកណ្តាប់ដៃរបស់ វាសនា បានឡើយ។
ឯម សុធី អ្នកប្រដាល់ក្លិបឫទ្ធីពោធិសែនជ័យបានផ្តួល ចៅ ចេកខ្ចី អ្នកប្រដាល់ក្លិបសំរោងកោងខេត្តបាត់ដំបងឲ្យសន្លប់ក្នុងទឹកទី៣។
*ខ្សែក្រវាត់LEOពាក់កណ្ដាលផ្ដាច់ព្រ័ត្រ
ប្រដាល់ ៖ ព្រឹត្តិការណ៍ប្រកួតដណ្ដើមខ្សែក្រវាត់ជើងឯកលេខ១ ស្រាបៀរLeo ទម្ងន់៦៧គីឡូក្រាម វគ្គពាក់កណ្ដាលផ្ដាច់ព្រ័ត្រកាលពីនារសៀលថ្ងៃអាទិត្យទី១៨ ខែតុលា នៅលើសង្វៀនបាយ័នបឹងស្នោនេះដែរ ហ៊ឹម សារ៉ាន់ អ្នកប្រដាល់សមាគមកីឡាក្រសួងការពារជាតិ ប្រកួតចាញ់ វី សេរីចាន់ឌីន អ្នកប្រដាល់ក្លិបខ្លារខិនមានរិទ្ធក្នុងទឹកទី២ ហើយអ្នកប្រដាល់ផង់ សុភាព ក្លិបរាជសីហ៍ខេត្តរតនគិរី ក៏ផ្ដួល ពុទ្ធ ផនកុសល អ្នកប្រដាល់ក្លិបពុទ្ធសេរីវង្សកីឡាក្នុងទឹកទី២ដែរ។
ដូច្នេះ វី សេរីចាន់ឌីន និងផង់ សុភាព គេទាំងពីរត្រូវឡើងទៅជួបគ្នាក្នុងវគ្គផ្ដាច់ព្រ័ត្រ ដើម្បីដណ្ដើមជើងឯកខ្សែក្រវាត់ស្រាបៀរLeo ទម្ងន់៦៧គីឡូក្រាម ឯហ៊ឹម សារ៉ាន់ និងពុទ្ធ ផនកុសលវិញ ពួកគេនឹងត្រូវជួបគ្នាដណ្ដើមចំណាត់ថ្នាក់លេខ៣។
*ពានបាយ័នទម្ងន់៥៧គ.ក្រលើកទី៧
ប្រដាល់ ៖ ជុន សាវុធ អ្នកប្រដាល់ក្លិបពោធិជ័យកីឡាបានក្លាយជាម្ចាស់នៃពានអនុស្សាវរីយ៍បាយ័នលើកទី៧ សម្រាប់ប្រភេទទម្ងន់៥៧គីឡូក្រាម ឆ្នាំ២០១៥ ក្រោយពីគេបានយកឈ្នះលើអ្នកប្រដាល់ គួន ប៊ុនហ៊ីម ក្លិបពន្លឺសាមគ្គីខេត្តបាត់ដំបងដោយពិន្ទុ កាលពីល្ងាចថ្ងៃទី១៧តុលា នៅលើសង្វៀនស្ទឹងមានជ័យនោះ។
នុងការប្រកួតជម្រុះដែលធ្វើក្នុងពេលតែមួយនោះ ជុន សាវុធ បានវាយឈ្នះឯម សារ៉ាក់ អ្នកប្រដាល់ក្លិបឫទ្ធីពោធិសែនជ័យដោយពិន្ទុ។ ឯ គួន ប៊ុនហ៊ីម គេប្រកួតជម្រុះ ឈ្នះភីរម្យ ភក្តី អ្នកប្រដាល់ក្លិបភីរម្យគុនខ្មែរដោយពិន្ទុដែរ។
ជុន សាវុធ និង គួន ប៊ុនហ៊ីម បានជួបគ្នាក្នុងវគ្គផ្ដាច់ព្រ័ត្រ តែដោយសារ ប៊ុនហ៊ីម ធ្លាប់ចាញ់ម្តងរួចមកហើយនោះ លើកនេះក៏ត្រូវចាញ់ជុន សាវុធទៀត ធ្វើឲ្យ សាវុធ ក្លាយជាម្ចាស់ពានរង្វាន់បាយ័នទម្ងន់៥៧គីឡូក្រាម៕
បឺត ខាំ និងឡៅ ស៊ីណាត ឡើងទៅជួបគ្នាវគ្គផ្ដាច់ព្រ័ត្រខ្សែក្រវាត់ខារ៉ាបាវ
0 Comments