បន្ទាយមានជ័យ ៖ ពលករក្មេង/ចាស់ ប្រុស/ស្រីរាប់រយនាក់បាននាំគ្នាសម្រុកចេញពីលំនៅដ្ឋានជិះរថយន្តនីសាន់សំដៅទៅរកការងារធ្វើនៅប្រទេសថៃដូចទឹកបាក់ទំនប់អញ្ចឹង ក្រោយពេលមកលេងបងប្អូនក្នុងឱកាសបុណ្យភ្ជុំបិណ្ឌប្រពៃណីខ្មែរចំនួន៣ថ្ងៃនោះកន្លងផុតទៅ។
នៅថ្ងៃទី១៨ ខែតុលា ឆ្នាំ២០១៥ ក្នុងបេនឡានថ្មីមានពលករក្មេងចាស់ប្រុសស្រីជាច្រើនរយនាក់ មានតាំងពីអង្ក របស់របរហូបចុក ប៊ីដុងទឹក បាននាំគ្នាត្រៀមឡើងជិះរថយន្តធ្វើដំណើរទៅស្រុកថៃដើម្បីស្វែងរកការងារធ្វើ។
ប្អូនប្រុសម្នាក់ឈ្មោះ ដន អាន អាយុ២០ឆ្នាំ សព្វថ្ងៃរស់នៅភូមិឈ្នួរ ឃុំឈ្នួរ ស្រុកក្រឡាញ់ ខេត្តសៀមរាប បានរៀបរាប់ប្រាប់អ្នកយកព័ត៌មានឲ្យដឹងថា ដោយសារតែភាពក្រីក្រ និងធ្វើស្រែមិនបានទៀតនោះ ប្រជាពលរដ្ឋរស់នៅក្នុងភូមិ/ឃុំ ក្នុងស្រុកក្រឡាញ់នោះ មានក្មេងចាស់ប្រុសស្រីបាននាំគ្នាចេញពីលំនៅដ្ឋានទៅស្វែងរកការងារធ្វើនៅប្រទេសថៃ ដើម្បីបានប្រាក់យកមកចិញ្ចឹមគ្រួសារស្ទើរស្ងាត់អស់ពីភូមិនៅសល់តែចាស់ៗនៅមើលកូនចៅតែប៉ុណ្ណោះ។
ប្អូន ដន អាន បាននិយាយបន្តទៀតថា ការទៅស៊ីឈ្នួលធ្វើការឲ្យថៃក្នុងរយៈពេលធ្វើការបាន៣ខែម្នាក់បានលុយប្រហែល៤.០០០បាតនោះ នាំគ្នាវិលត្រឡប់មកផ្ទះវិញ ដើម្បីយកលុយកាក់មកឲ្យម៉ែឪដែលគាត់នៅចាំផ្ទះ ហើយក៏ធ្វើដំណើរទៅធ្វើការងារនៅប្រទេសថៃវិញតាមទម្លាប់។
ប្អូនប្រុសនោះបាននិយាយបន្តទៀតថា ពលករទាំងអស់ជិះរថយន្តចេញពីព្រំដែនខ្មែរ-ថៃនោះសមត្ថកិច្ចដែលយាមកាមនៅពីនោះពុំបានយកលុយកាក់ពីពលករនោះឡើយ សមត្ថកិច្ចទាំងនោះថែមទាំងសម្រួលឲ្យពលករទាំងនោះចេញទៅធ្វើការងារនៅប្រទេសថៃដោយស្រួលទៀតផង ដោយសំអាងថា ពលករទាំងនោះទៅស៊ីឈ្នួលថៃមិនមានលុយច្រើនជាប់នៅក្នុងខ្លួនឡើយ។
បើតាមការអះអាងរបស់អ្នកលក់ទំនិញនៅក្នុងបេនឡានថ្មីម្នាក់បានឲ្យដឹងថា ក្នុងរយៈពេលបុណ្យភ្ជុំបិណ្ឌរួចបាន៤ថ្ងៃកន្លងមក ពលករទៅរកការងារធ្វើនៅប្រទេសថៃនៅតែច្រើនបើធ្វើការសន្មតវិញ ពលករចេញទៅរកការងារធ្វើនៅស្រុកថៃគ្រប់ច្រកល្ហកនោះក្នុងមួយថ្ងៃមិនខ្វះពី៥.០០០នាក់នោះឡើយ ដោយសារភាពក្រីក្រ និងធ្វើស្រែមិនបានផល និងភាពចាញ់បោករបស់មេខ្យល់ជាដើម៕
នៅតែមានពលករនាំគ្នាសម្រុកចេញទៅធ្វើការនៅប្រទេសថែច្រើនដដែល
0 Comments