ប៉ោយប៉ែត ៖ ពលករចំណាកស្រុកចំនួន២៩នាក់ក្នុងចំណោម៣៤នាក់ត្រូវបានទាហានថៃចាប់បាននៅក្នុងព្រៃ ខណៈដែលកំពុងស៊ីឈ្នួលកាប់ឈើគ្រញូង ហើយក៏ត្រូវបានគេលោមព័ទ្ធចាប់បានរួចយកទៅដាក់គុកមួយយប់មួយថ្ងៃរួចបញ្ជូនជនទាំងនោះមកស្រុកកំណើតវិញតាមរថយន្តទ្រុងរបស់ថៃតែម្តង។
សូមបញ្ជាក់ថា ការចាប់បញ្ជូនពលករខាងលើមកស្រុកកំណើតវិញនេះគឺកើតឡើងនៅល្ងាចថ្ងៃទី១៧ ខែតុលា ឆ្នាំ២០១៥នេះនៅចំណតទីតាំងសំចតទទួលពលករដែលស្ថិតនៅក្នុងក្រុងប៉ោយប៉ែត ខេត្តបន្ទាយមានជ័យតែម្តង ស្របពេលដែលទាហានថៃបានដើរល្បាតក្នុងព្រៃ ហើយក៏ប្រទះនឹងកម្លាំងកាប់ឈើគ្រញូងរបស់ខ្មែររួចបាញ់រះពេញព្រៃបណ្ដាលឲ្យពលករខ្លះទៀតរត់រួច ឯខ្លះទៀតចាប់ខ្លួនបាននោះ។
តាមការរៀបរាប់របស់ជនរងគ្រោះទាំង២៩នាក់បានឲ្យដឹងថា ពួកខ្លួនបានចាញ់បោកមេខ្យល់យកទៅឲ្យកាប់ឈើគ្រញូងក្នុងព្រៃធំមួយស្ថិតនៅក្នុងខេត្តប្រាជីមបូរីដែលមានសរុបចំនួន៣៤នាក់ឯណោះ។ ពលករដដែលក៏បានបន្តទៀតថា ពួកគេមកពីខេត្តខុសៗគ្នាគឺមកពីខេត្តសៀមរាប១៣នាក់ មកពីខេត្តកំពង់ធំ៨នាក់ មកពីខេត្តឧត្តរមានជ័យ៨នាក់ ហើយគេបានបន្តថា ក្នុងថ្ងៃចាប់ខ្លួននោះគឺទាហានថៃបានធ្វើទារុណកម្មមកលើពួកគេដូចសត្វធាតុរួចយកមកដាក់គុកទៀតផង ចំពោះអ្នកបាត់ខ្លួននោះមិនដឹងជាស្លាប់ ឬរស់នោះឡើយ៕
ថៃចាប់ខ្លួនពលករកាប់ឈើគ្រញូង២៩នាក់យកទៅដាក់គុក ឯ១៣នាក់ផ្សេងទៀតកំពុងបាត់ខ្លួន
0 Comments